KA BUKE ʻAKOLU A MOSE, I KAPA ʻIA ʻOIHANA KAHUNA 2 - Ka Baibala Hemolele

1 Nā kānāwai no nā mōhai ʻai.

MOKUNA II.

¹ ¶ ‘A inā e lawe mai kekahi i ka mōhai ʻai, iā Iēhova, ʻo kāna mōhai auaneʻi he palaoa wali; a e ninini iho ʻo ia i ka ʻaila ma luna iho, a e kau hoʻi i ka libano ma luna iho.

² ‘A e lawe mai ʻo ia ia i kā ʻAʻarona mau keiki, i nā kāhuna; a e lawe aʻe no loko, a piha kona lima i kona palaoa, a me kona ʻaila me kona libano a pau, a e kuni ke kahuna i kona mea hoʻomanaʻo, ma luna o ke kuahu, i mōhai i kaumaha ʻia ma ke ahi, he mea ʻala ʻono iā Iēhova.

³ ‘A e lilo ke koena na ʻAʻarona, a me kāna mau keiki, he mea hoʻāno loa no nā mōhai puhi o Iēhova.

⁴ ¶ ‘A inā e lawe mai ʻoe i ka ʻālana o ka mōhai ʻai i kahu ʻia ma ka umu, he mau pōpō palaoa hū ʻole i hui pū me ka ʻaila, a i ʻole ia he mau papa palaoa i hamo ʻia me ka ʻaila.

⁵ ‘A inā ʻo kāu ʻālana he mōhai ʻai moʻa ma ke pā, ka palaoa hū ʻole nō ia i hui me ka ʻaila.

⁶ ‘E wāwahi hoʻi ʻoe i mau ʻāpana, a e ninini i ka ʻaila ma luna; he mōhai ʻai ia.

⁷ ‘A inā ʻo kāu ʻālana he mōhai ʻai moʻa ma ke pā parai, e hana ʻia ia no ka palaoa a me ka ʻaila.

⁸ ‘A e lawe mai ʻoe i ka mōhai ʻai i hana ʻia no ia mau mea iā Iēhova; a hāʻawi ʻia aʻe i ke kahuna, e lawe ʻo ia ia i ke kuahu.

⁹ ‘A e lawe ke kahuna i ka mea hoʻomanaʻo mai loko mai o ka mōhai ʻai, a e kuni aku ia mea ma ke kuahu; he mōhai ia i ʻālana ʻia ma ke ahi, he mea ʻala ʻono iā Iēhova.

¹⁰ ‘‘A ʻo ke koena o ka mōhai ʻai, e lilo ia no ʻAʻarona, a me kāna mau keiki; he mea hoʻāno loa nō nā mōhai i kaumaha ʻia ma ke ahi no Iēhova.

¹¹ ¶ ‘ʻAʻole e hana ʻia me ka hū ka mōhai ʻai a ʻoukou e lawe ai iā Iēhova; no ka mea, ʻaʻole ʻoukou e kuni i ka hū, ʻaʻole hoʻi i ka meli, i loko o nā mōhai puhi na Iēhova.

¹² ‘A ʻo ka ʻālana o nā hua mua, e mōhai aku nō ʻoukou ia mau mea iā Iēhova; ʻaʻole hoʻi lākou e kuni ʻia ma ke kuahu i mea ʻala ʻono.

¹³ ‘A ʻo nā ʻālana a pau o kāu mau mōhai ʻai, ʻo ia kāu e hoʻomiko ai me ka paʻakai; ʻaʻole ʻoe e hoʻonele i kāu mau mōhai ʻai i ka paʻakai o ka berita o kou Akua; me kāu mau mōhai a pau, e mōhai pū ʻoe i ka paʻakai.

¹⁴ ¶ ‘A inā e mōhai aku ʻoe na Iēhova i ka mōhai ʻai no kāu mau hua mua, ʻo nā ʻōpuʻu maka moʻa ma ke ahi, nā hua hohoa ʻia, ʻo ia kāu e ʻālana ai i mōhai ʻai no kāu mau hua mua.

¹⁵ ‘A e ninini ʻoe i ka ʻaila ma luna a me ka libano; he mōhai ʻai nō ia.

¹⁶ ‘A e kuni ke kahuna i ka mea hoʻomanaʻo ona: ʻo kona hua hohoa ʻia, a ʻo kona ʻaila, a me kona libano a pau, he mōhai puhi no Iēhova.