KA BUKE ʻAKOLU A MOSE, I KAPA ʻIA ʻOIHANA KAHUNA 19 - Ka Baibala Hemolele

1 He mau kānāwai hoʻomaopopo ʻia.

MOKUNA XIX.

¹ ¶ ʻŌlelo maila hoʻi ʻo Iēhova iā Mose, ʻī maila,

² “E ʻōlelo aku ʻoe i ke anaina a pau o nā mamo a ʻIseraʻela, a e ʻī aku iā lākou, ‘I hemolele ʻoukou; no ka mea, he hemolele nō wau ʻo Iēhova ko ʻoukou Akua.

³ ‘E weliweli ʻoukou kēlā kanaka kēia kanaka i kona makuahine a i kona makua kāne, a e mālama hoʻi i kuʻu mau Sābati; ʻo wau nō Iēhova ko ʻoukou Akua.

⁴ ‘Mai huli ʻoukou ma nā kiʻi, ʻaʻole hoʻi e hana i nā akua i hoʻoheheʻe ʻia no ʻoukou; ʻo wau nō Iēhova ko ʻoukou Akua.

⁵ ¶ ‘A inā e kaumaha aku ʻoukou i ka ʻālana o nā mōhai hoʻomalu, iā Iēhova, e kaumaha ʻoukou ia na ko ʻoukou makemake iho.

⁶ ‘E ʻai ʻia ia i ka lā i kaumaha ai ʻoukou ia mea, a ia lā aku hoʻi; a inā e koe kauwahi i ke kolu o ka lā, e hoʻopau ʻia ia i ke ahi.

⁷ ‘A inā e ʻai iki iā ia i ke kolu o ka lā, e hoʻowahāwahā ʻia ia, ʻaʻole e maliu ʻia.

⁸ ‘No laila, ʻo ka mea e ʻai ia, e kau nō kona hewa ma luna ona, no kāna hōʻino ʻana i ka mea hoʻāno no Iēhova; a e ʻoki ʻia aku kēlā kanaka mai waena aku o kona poʻe kānaka.

⁹ ¶ ‘Aia ʻoki ʻoukou i ka ʻai o ko ʻoukou ʻāina, mai ʻoki loa i nā kihi o kāu mahina ʻai, ʻaʻole hoʻi ʻoe e hōʻiliʻili i nā haʻulena o kāu ʻai.

¹⁰ ‘Mai ʻohi loa i ko kāu māla waina, ʻaʻole hoʻi ʻoe e hōʻiliʻili i nā hua waina a pau loa o kāu māla waina; e waiho nō ʻoe ia mau mea na ka mea ʻilihune, a me ka malihini; ʻo wau nō Iēhova ko ʻoukou Akua.

¹¹ ¶ ‘Mai ʻaihue ʻoukou, ʻaʻole hoʻi e hoʻokamani, ʻaʻole hoʻi e hoʻopunipuni kekahi i kekahi.

¹² ‘Mai hoʻohiki ʻoukou ma koʻu inoa me ka wahaheʻe, ʻaʻole hoʻi ʻoe e hōʻino i ka inoa o kou Akua; ʻo wau nō Iēhova.

¹³ ¶ ‘Mai ʻālunu ʻoe i kou hoalauna, ʻaʻole hoʻi ʻoe e kāʻili wale; ʻo ka uku o ka mea i hoʻolimalima ʻia, mai waiho pū me ʻoe i ka pō ʻokoʻa a kakahiaka aʻe.

¹⁴ ‘Mai kūamuamu aku ʻoe i ke kuli, ʻaʻole hoʻi ʻoe e waiho i ka mea e hina ai ma mua o ka makapō; akā, e makaʻu ʻoe i kou Akua; ʻo wau nō Iēhova.

¹⁵ ¶ ‘Mai hana ʻino ʻoukou ma ka hoʻopaʻi ʻana; mai manaʻo ʻoe i ke kino o ka mea ʻilihune, ʻaʻole hoʻi e mahalo i ke kino o ka mea ikaika; akā, ma ka pololei e hoʻoponopono ai ʻoe i kou hoalauna.

¹⁶ ‘Mai hele ʻoe i ʻō i ʻaneʻi me he holoholo ʻōlelo lā i waena o kou poʻe kānaka; ʻaʻole hoʻi ʻoe e kūʻē i ke koko o kou hoalauna; ʻo wau nō Iēhova.

¹⁷ ¶ ‘Mai inaina aku ʻoe i kou hoahānau i loko o kou naʻau; e aʻo ʻiʻo aku nō ʻoe i kou hoalauna, ʻaʻole hoʻi e waiho i ka hewa ma luna ona.

¹⁸ ‘Mai hoʻomaʻau, mai hoʻomauhala i nā keiki o kou poʻe kānaka; akā, e aloha ʻoe i kou hoalauna e like me ʻoe iho; ʻo wau nō Iēhova.

¹⁹ ¶ ‘E mālama ʻoukou i koʻu mau kānāwai. Mai kuʻu aku ʻoe e hoʻohānau kāu holoholona me ka holoholona ʻano ʻokoʻa; ʻaʻole hoʻi ʻoe e lūlū i kou mahina ʻai, me nā hua ʻano ʻelua; ʻaʻole hoʻi e kau i ke kapa olonā me ka hulu hipa i hui ʻia, ma luna ou.

²⁰ ‘ʻO ka mea moe aku i ka wahine, he kauā wahine, i hoʻopalau ʻia na ke kāne, ʻaʻole i uku pānaʻi ʻia, ʻaʻole i hāʻawi ʻia iā ia ke kū i ka wā; e uhau ʻia ana; ʻaʻole e hoʻomake ʻia lāua; no ka mea, ʻaʻole i kaʻawale ia wahine.

²¹ ‘A e lawe mai ua kanaka lā i ka mōhai hala iā Iēhova, i ka puka o ka halelewa o ke anaina, he hipa kāne, i mōhai hala.

²² ‘A e hana ke kahuna i kalahala nona me ka hipa kāne mōhai hala, ma ke alo o Iēhova, no kona hewa āna i hana ai; a e kala ʻia kona hewa āna i hana ai.

²³ ¶ ‘A komo ʻoukou i ka ʻāina, a kanu i kēlā lāʻau i kēia lāʻau i mea ʻai, a laila e kapa aʻe ʻoukou i kona hua he ʻoki poepoe ʻole ʻia; ʻekolu makahiki he ʻoki poepoe ʻole ʻia ia iā ʻoukou; ʻaʻole e ʻai ʻia.

²⁴ ‘Akā, i ka hā o ka makahiki, e hoʻāno ko nā hua a pau, i mea e hoʻoleʻa ai iā Iēhova.

²⁵ ‘A i ka lima o ka makahiki, e ʻai ʻoukou i kona hua, e hāʻawi ai ʻo ia i kona hua iā ʻoukou; ʻo wau nō Iēhova ko ʻoukou Akua.

²⁶ ¶ ‘Mai ʻai ʻoukou me ke koko; ʻaʻole hoʻi e kūkā moʻo, ʻaʻole hoʻi e nānā ao.

²⁷ ‘Mai hoʻopoepoe i nā kihi o ko ʻoukou mau poʻo, ʻaʻole hoʻi ʻoe e hōʻino i nā kihi o kou ʻumiʻumi.

²⁸ ‘Mai ʻokiʻoki i ko ʻoukou ʻiʻo no ka mea make, ʻaʻole hoʻi e kākau kaha ma ko ʻoukou kino; ʻo wau nō Iēhova.

²⁹ ¶ ‘Mai hoʻonoa i kāu kaikamahine e hoʻolilo iā ia i hoʻokamakama; o lilo ka ʻāina i ka moekolohe, a piha aʻela ka ʻāina i ka hewa.

³⁰ ‘E mālama ʻoukou i koʻu mau Sābati, a e mahalo i koʻu keʻena kapu; ʻo wau nō Iēhova.

³¹ ¶ ‘Mai manaʻo ʻoukou i nā mea nīnau ʻuhane, ʻaʻole hoʻi e ʻimi aku i nā kupua, e haumia ai ʻoukou iā lākou; ʻo wau nō Iēhova ko ʻoukou Akua.

³² ¶ ‘Ma ke alo o ke poʻo hina, e kū aʻe ai ʻoe i luna, a e mahalo aku i ke alo o ka ʻelemakule, a e weliweli i kou Akua; ʻo wau nō Iēhova.

³³ ¶ ‘A inā e noho ka malihini me ʻoe ma ko ʻoukou ʻāina, mai hoʻoluhihewa iā ia.

³⁴ ‘Akā, ʻo ka malihini e noho ana me ʻoukou, e like auaneʻi ia iā ʻoukou me he kupa lā i hānau i waena o ʻoukou, a e aloha ʻoe iā ia e like me ʻoe iho; no ka mea, he mau malihini nō ʻoukou ma ka ʻāina ʻo ʻAigupita; ʻo wau nō Iēhova ko ʻoukou Akua.

³⁵ ¶ ‘Mai hana kekeʻe ʻoukou i ka hoʻoponopono ʻana, ma ke ana ʻana, ma ka paona, a ma ke ana.

³⁶ ‘E mālama nō ʻoukou i paona pololei, i pōkā pono, i ʻepa pono, i hina pono; ʻo wau nō Iēhova ko ʻoukou Akua nāna ʻoukou i lawe mai, mai loko mai o ka ʻāina ʻo ʻAigupita.

³⁷ ‘No laila, e mālama ʻoukou i kaʻu mau kauoha a pau, a me koʻu mau kānāwai a pau, a e hana ma ia mau mea; ʻo wau nō Iēhova.’”