KA BUKE ʻAKOLU A MOSE, I KAPA ʻIA ʻOIHANA KAHUNA 18 - Ka Baibala Hemolele

1 Ka pono ʻole o ʻAigupita me Kanaʻana. 6 Ke kānāwai mare. 19 Nā kuko ʻino e haumia ai.

MOKUNA XVIII.

¹ ¶ ʻŌlelo maila hoʻi ʻo Iēhova iā Mose, ʻī maila,

² “E ʻōlelo aku i nā mamo a ʻIseraʻela, a e ʻī aku iā lākou, ‘ʻO wau nō Iēhova ko ʻoukou Akua.

³ ‘Ma muli o nā hana a ka ʻāina ʻo ʻAigupita, kahi i noho ai ʻoukou, ʻaʻole ʻoukou e hana aku; a ma muli o nā hana a ka ʻāina ʻo Kanaʻana, kahi e lawe aʻe ai au iā ʻoukou, ʻaʻole ʻoukou e hana aku; ʻaʻole hoʻi ʻoukou e hele ma kā lākou mau ʻoihana.

⁴ ‘E hana hoʻi ʻoukou ma koʻu mau kānāwai, a e mālama i kaʻu mau ʻoihana, e hele ma laila; ʻo wau nō Iēhova ko ʻoukou Akua.

⁵ ‘No laila, e mālama ʻoukou i kaʻu mau kauoha, a me koʻu mau kānāwai; inā e hana ke kanaka ia, e ola nō ʻo ia ia mau mea; ʻo wau nō Iēhova.

⁶ ¶ ‘ʻAʻole kekahi o ʻoukou e hoʻokokoke aku i ka ʻiʻo o kona ʻiʻo iho; e wehe i kahi huna; ʻo wau nō Iēhova.

⁷ ‘ʻO kahi huna o kou makua kāne, a ʻo kahi huna o kou makuahine, mai wehe ʻoe; ʻo kou makuahine nō ia, mai wehe ʻoe i kahi huna ona.

⁸ ‘ʻO kahi huna o ka wahine a kou makua kāne, mai wehe ʻoe; ʻo kahi huna ia o kou makua kāne.

⁹ ‘ʻO kahi huna o kou kaikuahine, ʻo ke kaikamahine a kou makua kāne, ʻo ke kaikamahine o kou makuahine paha, ua hānau ma kou wahi noho paha, ua hānau ma kahi ʻē paha, mai wehe ʻoe i kahi huna o lāua.

¹⁰ ‘ʻO kahi huna o ke kaikamahine a kāu keiki kāne, a me ke kaikamahine a kāu kaikamahine, mai wehe ʻoe i kahi huna o lāua; no ka mea, ʻo ko lāua, ʻo kou wahi huna nō ia.

¹¹ ‘ʻO kahi huna o ke kaikamahine a ka wahine a kou makua kāne, na kou makua kāne i hānau, ʻo kou kaikuahine nō ia, mai wehe ʻoe i kona wahi huna.

¹² ‘Mai wehe ʻoe i kahi huna o ke kaikuahine o kou makua kāne, ʻo ka ʻiʻo nō ia o kou makua kāne.

¹³ ‘Mai wehe ʻoe i kahi huna o ka hoahānau wahine o kou makuahine; no ka mea, ʻo ka ʻiʻo nō ia o kou makuahine.

¹⁴ ‘Mai wehe ʻoe i kahi huna o ka hoahānau kāne o kou makua kāne, mai hoʻokokoke aku i kāna wahine, he makuahine ia nou.

¹⁵ ‘Mai wehe ʻoe i kahi huna o kāu hūnōna wahine; ʻo ka wahine ia a kāu keiki; mai wehe ʻoe i kona wahi huna.

¹⁶ ‘Mai wehe ʻoe i kahi huna o ka wahine a kou hoahānau kāne; ʻo kahi huna ia o kou hoahānau kāne.

¹⁷ ‘Mai wehe ʻoe i kahi huna o ka wahine a me kāna kaikamahine, ʻaʻole hoʻi ʻoe e lawe i ke kaikamahine a kāna keiki, ʻaʻole hoʻi i ke kaikamahine a kāna kaikamahine, e wehe i kona wahi huna; ʻo kona ʻiʻo nō lākou; he mea hewa ia.

¹⁸ ‘Mai lawe ʻoe i ka wahine me kona hoahānau wahine pū, e hōʻino iā ia, i ka wehe i kona wahi huna, i ka wā e ola ana kēlā.

¹⁹ ¶ ʻAʻole hoʻi ʻoe e hoʻokokoke aku i ka wahine e wehe i kona wahi huna, i ka wā e hoʻokaʻawale ʻia ai ia no kona haumia.

²⁰ ‘Mai moe ʻoe i ka wahine a kou hoalauna, e hoʻohaumia iho iā ʻoe iho me ia.

²¹ ‘Mai hāʻawi i kahi keiki āu e lilo iā Moleka, ʻaʻole hoʻi ʻoe e hōʻino i ka inoa o kou Akua; ʻo wau nō Iēhova.

²² ‘Mai moe i ke kanaka, me he wahine lā; he mea ia e inaina ʻia.

²³ ‘ʻAʻole hoʻi ʻoe e moe i ka holoholona, e hoʻohaumia iho iā ʻoe iho me ia; ʻaʻole hoʻi e kū ka wahine i mua o ka holoholona e moe iho iā ia; he mea haumia hilahila ia.

²⁴ ¶ ‘Mai hoʻohaumia ʻoukou iā ʻoukou iho ma kekahi o kēia mau mea; no ka mea, ma kēia mau mea a pau ua haumia nā lāhui kanaka aʻu e kipaku aku ai mai mua aku o ʻoukou.

²⁵ ‘Ua haumia ka ʻāina; no laila, ke hoʻopaʻi nei au i kona hewa ma luna iho ona, a ke luaʻi aku nei nō ka ʻāina i kona poʻe kamaʻāina.

²⁶ ‘No ia mea, e mālama ʻoukou i kaʻu mau kauoha a me koʻu mau kānāwai, ʻaʻole hoʻi e hana i kekahi o kēia mau mea e inaina ʻia, ʻaʻole kekahi o ko ʻoukou lāhui kanaka, ʻaʻole hoʻi ʻo ka malihini e noho ana i waena o ʻoukou;

²⁷ (no ka mea, ua hana nā kānaka o ka ʻāina ma mua o ʻoukou, i kēia mau mea inaina ʻia a pau, a ua haumia ka ʻāina);

²⁸ i ʻole ai e luaʻi aku ka ʻāina iā ʻoukou kekahi, i ka wā e hoʻohaumia ai ʻoukou iā ia, e like me kona luaʻi ʻana aku i nā lāhui kanaka, ka poʻe ma mua o ʻoukou.

²⁹ ‘No ka mea, ʻo ka mea e hana i kekahi o kēia mau mea inaina ʻia, ʻo nā kānaka e hana, e ʻoki ʻia lākou mai waena aku o ko lākou poʻe kānaka.

³⁰ ‘No laila, e mālama ʻoukou i kaʻu ʻoihana, ʻaʻole e hana ma kēia mau hana inaina ʻia, i hana ʻia ma mua o ʻoukou; ʻaʻole hoʻi ʻoukou e hoʻohaumia iā ʻoukou iho ma laila; ʻo wau nō Iēhova ko ʻoukou Akua.’”