KA BUKE ʻAKOLU A MOSE, I KAPA ʻIA ʻOIHANA KAHUNA 16 - Ka Baibala Hemolele

1 No ke komo ʻana o ke kahuna nui i loko o Kahi Hoʻāno, a me ka hana ʻana i kalahala no ke anaina, no ka makahiki.

MOKUNA XVI.

¹ ¶ ʻŌlelo maila ʻo Iēhova iā Mose ma hope iho o ka make ʻana o nā keiki ʻelua a ʻAʻarona, i ko lāua kaumaha ʻana i mua o Iēhova a make ihola;

² ʻī maila hoʻi ʻo Iēhova iā Mose, “E ʻōlelo aʻe ʻoe iā ʻAʻarona i kou kaikuaʻana, i ʻole ai ia e hele mai i nā wā a pau i loko o Kahi Hoʻāno, ma loko o ka pākū, ma ke alo o ka noho aloha, ka mea ma luna o ka pahu, o make ia; no ka mea, e ʻikea au i loko o ke ao, ma luna o ka noho aloha.

³ “Penei e komo ai ʻo ʻAʻarona i loko o Kahi Hoʻāno, me ka bipi kāne ʻōpiopio i mōhai lawehala, a me ka hipa kāne i mōhai kuni.

⁴ “E hoʻokomo ʻo ia i kahi kapa komo olonā hoʻāno, a ʻo ka lole wāwae olonā kahi ma kona ʻiʻo, a e kāʻei ʻia ʻo ia me ke kāʻei olonā, a me ka pāpale olonā ʻo ia e kāhiko ʻia ai; ʻo ia nā kapa hoʻāno; no laila e holoi ʻo ia i kona ʻiʻo i ka wai, a pēlā e hoʻokomo ai ia mau mea.

⁵ “E lawe ʻo ia i nā keiki kao ʻelua o ke anaina o nā mamo a ʻIseraʻela, i mōhai lawehala, a i ka hipa kāne i mōhai kuni.

⁶ “A e kaumaha ʻo ʻAʻarona i kāna bipi kāne he mōhai lawehala, ka mea nona iho, a e hana i kalahala nona iho, a i kalahala no kona ʻohana.

⁷ “A e lawe ʻo ia i ua mau kao lā ʻelua, a e hōʻike hoʻi iā lāua ma ke alo o Iēhova, ma ka puka o ka halelewa o ke anaina.

⁸ “A e hailona iho ʻo ʻAʻarona no nā kao ʻelua, ʻo kekahi no Iēhova, ʻo kekahi no ke kao hele.

⁹ “A e lawe mai ʻo ʻAʻarona i ke kao i lilo no Iēhova, a e kaumaha hoʻi ia i mōhai lawehala.

¹⁰ “Akā, ʻo ke kao i lilo i kao hele, ʻo ia ke hōʻike ola ʻia ma ke alo o Iēhova, e hana i kalahala me ia, a e hoʻokuʻu ʻia aʻe e hele ia i kao hele i loko o ka wao nahele.

¹¹ ¶ “A e lawe mai ʻo ʻAʻarona i ka bipi kāne he mōhai lawehala, ka mea nona iho, a e hana ʻo ia i kalahala nona iho, a no kona ʻohana, a e pepehi hoʻi ʻo ia i ka bipi kāne o ka mōhai lawehala, ka mea nona iho.

¹² “A e lawe ʻo ia i hoʻokahi ipu kapuahi piha i nā lānahu ahi e ʻaʻā ana, mai luna iho o ke kuahu ma ke alo o Iēhova, a me ka piha o kona mau lima i ka mea ʻala i hoʻowali ʻia, a e hali aʻe, i loko aʻe o ka pākū.

¹³ “A e kau ʻo ia i ka mea ʻala ma luna iho o ke ahi ma ke alo o Iēhova, i uhi aʻe ke ao o ka mea ʻala, i ka noho aloha ma luna o ka berita, i ʻole ai ia e make.

¹⁴ “E lawe hoʻi ʻo ia i kauwahi o ke koko o ka bipi kāne, a e pīpī aʻe ia ma luna o ka noho aloha, me kona manamana lima, ma ka hikina; a ma ke alo o ka noho aloha ʻo ia e pīpī aʻe i ke koko, me kona manamana lima, ʻehiku ka pīpī ʻana.

¹⁵ ¶ “A laila e pepehi ʻo ia i ke kao, i ka mōhai lawehala no nā kānaka, a e lawe mai i kona koko ma loko o ka pākū, a e hana me ia koko e like me kāna i hana ai me ke koko o ka bipi kāne, a e pīpī aʻe ia ma luna o ka noho aloha, a ma ke alo o ka noho aloha.

¹⁶ “A e hana ʻo ia i kalahala no kahi hoʻāno, no ka haumia o nā mamo a ʻIseraʻela, a no ko lākou mau hala ma ko lākou hewa a pau; a pēlā nō ʻo ia e hana ai no ka halelewa o ke anaina, e waiho ana i waena o lākou, i waenakonu o ko lākou haumia.

¹⁷ “ʻAʻole loa he kanaka ma loko o ka halelewa o ke anaina i kona wā e komo ai e hana i kalahala ma Kahi Hoʻāno, a puka hou ia, a ua hana hoʻi ʻo ia i kalahala nona iho, a no kona ʻohana, a no ke anaina a pau o kā ʻIseraʻela.

¹⁸ “A e hele aʻe ia i waho i ke kuahu, ka mea ma ke alo o Iēhova, a e hana i kalahala nona; a e lawe ʻo ia i kauwahi o ke koko o ka bipi kāne, a me kauwahi o ke koko o ke kao, a e kau ma nā pepeiaohao o ke kuahu a puni.

¹⁹ “A e pīpī ʻo ia i kauwahi o ke koko ma luna ona, me kona manamana lima, ʻehiku ka pīpī ʻana; a e hoʻomaʻemaʻe ia mea, a e hoʻāno hoʻi ia mai ka haumia o nā mamo a ʻIseraʻela.

²⁰ ¶ “A pau kona huikala ʻana i Kahi Hoʻāno, a me ka halelewa o ke anaina, a me ke kuahu, a laila e lawe mai ʻo ia i ke kao ola.

²¹ “A e kau ʻo ʻAʻarona i kona mau lima ma luna o ke poʻo o ke kao ola; a e haʻi aʻe ma luna ona i nā hewa a pau o nā mamo a ʻIseraʻela, a me ko lākou hala a pau, ma ko lākou lawehala ʻana a pau, e waiho ana ia mau mea ma ke poʻo o ke kao, a e hoʻokuʻu aku iā ia ma ka lima o ke kanaka pono, i loko o ka wao nahele.

²² “A e hali aku ke kao i ko lākou hewa a pau ma luna ona i ka ʻāina kanaka ʻole; a e hoʻokuʻu wale aku ʻo ia i ke kao i loko o ka wao nahele.

²³ ¶ “A e komo ʻo ʻAʻarona ma loko o ka halelewa o ke anaina, a e hoʻohemo aʻe i kona kapa olonā, āna i hoʻokomo ai i kona wā i hele ai i loko o Kahi Hoʻāno, a e waiho iho ia mau mea ma laila.

²⁴ “A e holoi ʻo ia i kona ʻiʻo i ka wai, ma Kahi Hoʻāno, a e hoʻokomo ʻo ia i kona mau kapa, a e hele i waho, a e kaumaha i kona mōhai kuni, a me ka mōhai kuni o nā kānaka, a e hana hoʻi ʻo ia i kalahala nona iho, a no nā kānaka.

²⁵ “A ʻo ke kaikea o ka mōhai lawehala, ʻo ia kāna e kuni ai ma luna o ke kuahu.

²⁶ “A ʻo ka mea nāna i hoʻokuʻu i ke kao i ka wao akua, e holoi ʻo ia i kona kapa, a e ʻauʻau i ka wai, a ma hope iho e hele mai ia i loko o kahi hoʻomoana.

²⁷ “A ʻo ka bipi kāne, ka mōhai lawehala, a me ke kao, ka mōhai lawehala, ua lawe ʻia ko lāua koko i loko e hana i kalahala ma Kahi Hoʻāno, ʻo ia ke lawe ʻia aʻe ma waho o kahi hoʻomoana; a e hoʻopau lākou i ke ahi i ko lāua mau ʻili, a me ko lāua ʻiʻo, a me ko lāua lepo.

²⁸ “A ʻo ka mea i puhi ia mau mea, e holoi ʻo ia i kona mau kapa, a e ʻauʻau i ka wai, a ma hope iho e hele mai ia i loko o kahi hoʻomoana.

²⁹ ¶ “Eia hoʻi ke kānāwai e mau ana no ʻoukou; i ka hiku o ka malama, i ka lā ʻumi o ka malama, e hoʻokaumaha i ko ʻoukou mau ʻuhane, ʻaʻole e hana iki i ka hana, ʻo ke kanaka o ko ʻoukou ʻāina iho, a ʻo ka malihini e noho ana i waena o ʻoukou.

³⁰ “No ka mea, ʻo ia ka lā e hana ai i kalahala no ʻoukou, e huikala ai iā ʻoukou i maʻemaʻe ʻoukou, mai ko ʻoukou hewa a pau, i mua o ke alo o Iēhova.

³¹ “E lilo hoʻi ia i sābati e maha ai no ʻoukou, a e hoʻokaumaha i ko ʻoukou mau ʻuhane, ma ke kānāwai mau loa.

³² “A ʻo ke kahuna āna e poni ai, a e hoʻolaʻa ai, e hana ma ka ʻoihana kahuna ma kahi o kona makua kāne, ʻo ia ke hana i kalahala, a e hoʻokomo i nā kapa olonā, i nā kapa hoʻāno.

³³ “A e hana ʻo ia i kalahala no ke Keʻena Kapu Hoʻāno, a e hana hoʻi ʻo ia i kalahala no ka halelewa o ke anaina, a me ke kuahu; a e hana hoʻi i kalahala no nā kāhuna, a me nā kānaka a pau o ke anaina.

³⁴ “E lilo ia i kānāwai mau loa no ʻoukou, e hana i kalahala no nā mamo a ʻIseraʻela no ko lākou hewa a pau, pākahi i ka makahiki.” Hana ihola ia e like me kā Iēhova kauoha iā Mose.