KA BUKE ʻAKOLU A MOSE, I KAPA ʻIA ʻOIHANA KAHUNA 15 - Ka Baibala Hemolele

1 Kānāwai o ka maʻi hilo, a me ka maʻi kahe.

MOKUNA XV.

¹ ¶ ʻŌlelo maila hoʻi ʻo Iēhova iā Mose a me ʻAʻarona, ʻī maila,

² “E ʻōlelo ʻolua i nā mamo a ʻIseraʻela, e ʻī aku iā lākou, ‘ʻO ke kanaka, he maʻi kahe mai loko aku o kona ʻiʻo; e haumia nō ia, no kona hilo.

³ ‘ʻO kona haumia nō ia i loko o kona hilo; inā e kahe ana kona ʻiʻo i kona hilo, a inā i paʻa paha kona ʻiʻo, ʻaʻole kahe i kona hilo, ʻo kona haumia nō ia.

⁴ ‘ʻO kēlā moe kēia moe a ka mea hilo e moe ai ma luna iho, e haumia nō ia; a ʻo ka mea āna e noho ai ma luna iho, e haumia nō ia.

⁵ ‘A ʻo ka mea i pā i kona moe, e holoi ʻo ia i kona mau kapa, a e ʻauʻau i ka wai, a e haumia a hiki i ke ahiahi.

⁶ ‘ʻO ka mea e noho ma ka mea a ka mea hilo i noho ai, e ʻauʻau ʻo ia i ka wai, a e haumia ia a hiki i ke ahiahi.

⁷ ‘A ʻo ka mea i pā i ka ʻiʻo o ka mea hilo, e holoi ʻo ia i kona kapa, a e ʻauʻau i ka wai, a e haumia a hiki i ke ahiahi.

⁸ ‘A inā e kuha ka mea hilo ma luna o ka mea maʻemaʻe; a laila e holoi ʻo ia i kona mau kapa, a e ʻauʻau i ka wai, a e haumia a hiki i ke ahiahi.

⁹ ‘A ʻo ka noho lio a ka mea hilo e holo ai, e haumia ia.

¹⁰ ‘A ʻo ka mea i pā i kekahi mea ma lalo ona, e haumia ia a hiki i ke ahiahi; a ʻo ka mea e hali i kauwahi o ia mau mea, e holoi ʻo ia i kona mau kapa, a e ʻauʻau hoʻi i ka wai, a e haumia nō a hiki i ke ahiahi.

¹¹ ‘A ʻo ka mea a ka mea hilo e hoʻopā aku ai, ʻaʻole hoʻi i holoi kona lima i ka wai, e holoi ʻo ia i kona mau kapa, a e ʻauʻau i ka wai, a e haumia hoʻi ia a hiki i ke ahiahi.

¹² ‘A ʻo ka ipu lepo a ka mea hilo i pā ai, e wāwahi ʻia ia; a ʻo nā ipu lāʻau, e holoi ʻia ia i ka wai.

¹³ ¶ ‘A i ka wā e maʻemaʻe ai ka mea hilo i kona hilo, a laila e helu ʻo ia nona i nā lā ʻehiku no kona hoʻomaʻemaʻe ʻia ʻana, a e holoi i kona mau kapa, a e hōʻauʻau i kona ʻiʻo i ka waikahe, a e maʻemaʻe hoʻi ia.

¹⁴ ‘A i ka walu o ka lā, e lawe ʻo ia nona i nā kuhukukū ʻelua, a i ʻole ia, i ʻelua manu nūnū ʻōpiopio, a e hele mai i mua o ke alo o Iēhova, ma ka puka o ka halelewa o ke anaina, a e hāʻawi ia mau mea i ke kahuna.

¹⁵ ‘A e kaumaha aku ke kahuna ia mau mea, hoʻokahi i mōhai lawehala, a i kekahi i mōhai kuni; a e hana ke kahuna i kalahala nona ma ke alo o Iēhova, no kona hilo.

¹⁶ ¶ ‘A inā e puka aku ka ʻanoʻano o ke kanaka mai loko aku ona, a laila e holoi ʻo ia i kona kino ʻokoʻa i ka wai, a e haumia hoʻi a hiki i ke ahiahi.

¹⁷ ‘A ʻo ke kapa, a ʻo ka ʻili, he ʻanoʻano kanaka ma luna iho, e holoi ʻia ia i ka wai, a e haumia hoʻi a hiki i ke ahiahi.

¹⁸ ‘A ʻo ka wahine hoʻi a ke kanaka i moe aku ai, me ka ʻanoʻano, e ʻauʻau nō lāua i ka wai, a e haumia hoʻi a hiki i ke ahiahi.

¹⁹ ¶ ‘A inā he maʻi kahe ko ka wahine, a he koko ka mea kahe o kona ʻiʻo, e hoʻokaʻawale ʻia aʻe ʻo ia i nā lā ʻehiku; a ʻo ka mea i hoʻopā iā ia, e haumia ʻo ia a hiki i ke ahiahi.

²⁰ ‘A ʻo ka mea āna e moe ai ma luna iho, i kona kaʻawale ʻana, e haumia ia; a ʻo ka mea āna e noho ai ma luna iho, e haumia nō ia.

²¹ ‘ʻO ka mea i pā i kona wahi moe, e holoi ʻo ia i kona mau kapa, a e ʻauʻau i ka wai, a e haumia hoʻi ia a hiki i ke ahiahi.

²² ‘ʻO ka mea hoʻi i pā i ka mea āna i noho ai ma luna iho, e holoi nō hoʻi ʻo ia i kona mau kapa, a e ʻauʻau i ka wai, a e haumia hoʻi a hiki i ke ahiahi.

²³ ‘Inā hoʻi he mea ma luna o ka moe, a ma luna o kahi āna i noho ai ma luna iho, aia pā aku ke kanaka ia, e haumia ia a hiki i ke ahiahi.

²⁴ ‘A inā e moe ke kanaka me ia a pili kona koko iā ia, e haumia nō ia i nā lā ʻehiku; a ʻo ka moe a pau a ia kanaka i moe ai ma luna iho, e haumia ia.

²⁵ ¶ ‘A inā he heʻe koko ko ka wahine i nā lā he nui ma waho o ka wā o kona kaʻawale ʻana, a inā e kahe hou nō ia ma hope o ka pau ʻana o kona wā kaʻawale, e like nō hoʻi nā lā a pau o kona haumia me nā lā o kona kaʻawale ʻana, e haumia nō ia.

²⁶ ‘ʻO kēlā moe kēia moe āna e moe ai i nā lā a pau o kona heʻe koko ʻana, e like nō ia iā ia me ka moe o kona kaʻawale ʻana; a ʻo ka mea āna i noho ai ma luna iho, e haumia ia, e like me ka haumia o kona kaʻawale ʻana.

²⁷ ‘A ʻo ka mea i pā ia mau mea, e haumia nō ia, a e holoi i kona mau kapa, a e ʻauʻau i ka wai, a e haumia hoʻi a hiki i ke ahiahi.

²⁸ ‘Akā, inā i hoʻomaʻemaʻe ʻia ʻo ia i kona heʻe koko ʻana, a laila e helu ʻo ia nona i nā lā ʻehiku, a ma hope iho e maʻemaʻe nō ia.

²⁹ ‘A i ka walu o ka lā, e lawe ʻo ia nāna i ʻelua kuhukukū, a i ʻole ia, i ʻelua manu nūnū ʻōpiopio, a e hali mai i ke kahuna ma ka puka o ka halelewa o ke anaina.

³⁰ ‘A e kaumaha aku ke kahuna i kekahi i mōhai lawehala, a ʻo kekahi i mōhai kuni; a e hana ke kahuna i kalahala nona i mua o Iēhova no kona heʻe koko haumia.

³¹ ¶ ‘Pēlā e hoʻokaʻawale ai ʻoukou i nā mamo a ʻIseraʻela mai ko lākou haumia ʻana, i ʻole ai lākou e make i loko o ko lākou haumia, i ko lākou hoʻohaumia ʻana i kuʻu halelewa i waena o lākou.

³² ‘ʻO ia ke kānāwai no ka mea hilo, a no ka mea ua puka mai loko aʻe ona kona ʻanoʻano i haumia ai ʻo ia;

³³ ‘A no ka wahine maʻi heʻe koko hoʻi, a me ka mea hilo; ʻo ke kanaka, a ʻo ka wahine, a me ka mea moe me ka wahine haumia.’”