KA BUKE ʻAKOLU A MOSE, I KAPA ʻIA ʻOIHANA KAHUNA 14 - Ka Baibala Hemolele

1 Nā mōhai no ka lēpero ola. 33 Ka lēpera o ka hale.

MOKUNA XIV.

¹ ¶ ʻŌlelo maila hoʻi ʻo Iēhova iā Mose, ʻī maila,

² “Eia ke kānāwai o ka lēpero i kona lā e hoʻomaʻemaʻe ʻia ai; e lawe ʻia mai ia i ke kahuna pule.

³ “A e hele aku ke kahuna mai loko aku o kahi hoʻomoana, a e nānā ke kahuna, aia hoʻi, inā ua ola ka maʻi lēpera i loko o ka lēpero;

⁴ a laila e kauoha ke kahuna e lawe iho no ka mea e hoʻomaʻemaʻe ʻia ana, ʻelua manu ola, maʻemaʻe, a me ka lāʻau kedera, a me ka lole ʻula, a me ka husopa.

⁵ “A e kauoha ke kahuna e pepehi ʻia kekahi o nā manu ma loko o ka ipu lepo, ma luna o ka wai e kahe ana.

⁶ “A ʻo ka manu ola, e lālau ʻo ia ia, a me ka lāʻau kedera, a me ka lole ʻula, a me ka husopa, a e hoʻū iho ia mau mea me ka manu ola, i loko o ke koko o ka manu i pepehi ʻia ma luna o ka wai e kahe ana.

⁷ “A e pīpī aku ʻo ia ma luna o ka mea e hoʻomaʻemaʻe ʻia ana i ka lēpera, i ʻehiku ka pīpī ʻana, a e ʻōlelo aku he maʻemaʻe ia, a e hoʻokuʻu aku ʻo ia i ka manu ola ma waho ma ke kula.

⁸ “A ʻo ka mea e hoʻomaʻemaʻe ʻia ana, e holoi ʻo ia i kona kapa, a e koli i kona lauoho a pau, a e ʻauʻau ia i ka wai, i maʻemaʻe ia; a ma hope iho, e hele mai ia i kahi hoʻomoana, a e noho ma waho o kona halelewa i nā lā ʻehiku.

⁹ “A i ka hiku o ka lā, e koli ʻo ia i kona lauoho a pau ma kona poʻo, a me kona ʻumiʻumi, a me kona hulu kuʻemaka, ʻo kona lauoho a pau kāna e koli ai; a e holoi i kona kapa, a e holoi hoʻi ʻo ia i kona kino iho i ka wai, a e maʻemaʻe ia.

¹⁰ ¶ “A i ka walu o ka lā, e lawe ʻo ia i ʻelua keiki hipa kāne kīnā ʻole, a i hoʻokahi keiki hipa wahine kīnā ʻole o ka makahiki hoʻokahi, a i ʻekolu paha ʻumi ʻepa o ka palaoa wali, i mōhai ʻai i hui ʻia me ka ʻaila, a i hoʻokahi loga ʻaila.

¹¹ “A ʻo ke kahuna e hoʻomaʻemaʻe ana iā ia, e hōʻike ʻo ia i ke kanaka e hoʻomaʻemaʻe ʻia ana a me kēlā mau mea, ma ke alo o Iēhova ma ka puka o ka halelewa o ke anaina.

¹² “A e lawe ke kahuna i kekahi o ua mau keiki hipa kāne lā, a e kaumaha aku i mōhai hala, a me ka loga ʻaila, a e hoʻoluli aʻe ia mau mea i mōhai hoʻāli i mua o ke alo o Iēhova.

¹³ “A e pepehi ai ʻo ia i ke keiki hipa ma kahi e pepehi ai ʻo ia i ka mōhai lawehala, a me ka mōhai kuni, ma kahi hoʻāno; no ka mea, no ke kahuna pule ka mōhai lawehala, pēlā ka mōhai hala, he laʻa loa ia.

¹⁴ “A e lawe ke kahuna i kauwahi o ke koko o ka mōhai hala, a e kau aku ke kahuna ia ma ke kihi o ka pepeiao ʻākau o ka mea e hoʻomaʻemaʻe ʻia ana, a ma ka manamana nui o kona lima ʻākau, a ma ka manamana nui hoʻi o kona kapuaʻi ʻākau.

¹⁵ “A e lawe ke kahuna i kauwahi o ka loga ʻaila, a e ninini iho ma loko o ka poho o kona lima hema.

¹⁶ “A e hoʻō iho ke kahuna i kona manamana lima ʻākau i loko o ka ʻaila ka mea i loko o kona lima hema, a e pīpī i ka ʻaila me kona manamana lima, ʻehiku ka pīpī ʻana i mua o Iēhova.

¹⁷ “A ʻo ko ke koena o ka ʻaila i loko o kona lima hema, ʻo kā ke kahuna ia e kau ai ma ke kihi o ka pepeiao ʻākau o ke kanaka e hoʻomaʻemaʻe ʻia ana, a ma ka manamana nui o kona lima ʻākau, a ma ka manamana nui o kona kapuaʻi ʻākau ma luna iho o ke koko o ka mōhai lawehala.

¹⁸ “A ʻo ke koena o ka ʻaila i loko o ka lima o ke kahuna, ʻo ia kāna e ninini ai ma luna iho o ke poʻo o ka mea e hoʻomaʻemaʻe ʻia ana; a e hana ke kahuna i kalahala nona i mua o Iēhova.

¹⁹ “A e kaumaha aku ke kahuna i ka mōhai lawehala, a e hana hoʻi i kalahala no ka mea e hoʻomaʻemaʻe ʻia ana mai kona haumia ʻana; a ma hope iho e pepehi ai ʻo ia i ka mōhai kuni.

²⁰ “A e kaumaha aku ke kahuna i ka mōhai kuni, a me ka mōhai ʻai, ma luna o ke kuahu, a e hana ke kahuna i kalahala nona; a e maʻemaʻe ʻo ia.

²¹ ¶ “A inā he ʻilihune ia, ʻaʻole hoʻi hiki kēia mau mea iā ia; a laila e lawe ʻo ia i hoʻokahi keiki hipa i mōhai hala e hoʻoluli ʻia i kalahala nona, a i hoʻokahi hapaʻumi o ka ʻepa palaoa wali i hui ʻia me ka ʻaila i mōhai ʻai, a me ka loga ʻaila;

²² a i ʻelua kuhukukū, a i ʻole ia, i ʻelua manu nūnū ʻōpiopio, nā mea e loaʻa iā ia; a e lilo kekahi i mōhai lawehala, a ʻo kekahi i mōhai kuni.

²³ “A e lawe mai ʻo ia ia mau mea i ka walu o ka lā, e hoʻomaʻemaʻe ʻia ai ʻo ia, i ke kahuna ma ka puka o ka halelewa o ke anaina i mua o Iēhova.

²⁴ “A e lawe ke kahuna i ke keiki hipa mōhai hala a me ka loga ʻaila, a hoʻoluli ke kahuna ia mau mea i mōhai hoʻāli i mua o Iēhova.

²⁵ “A e pepehi ʻo ia i ke keiki hipa i mōhai hala, a e lawe ke kahuna i kauwahi o ke koko o ka mōhai hala, a e kau aʻe ma ke kihi o ka pepeiao ʻākau o ka mea e hoʻomaʻemaʻe ʻia ana, a ma ka manamana nui o kona lima ʻākau, a ma ka manamana nui o kona kapuaʻi ʻākau.

²⁶ “A e ninini ke kahuna i kauwahi o ka ʻaila ma ka poho o kona lima hema iho.

²⁷ “A e pīpī ke kahuna me kona manamana lima ʻākau i kauwahi o ka ʻaila i loko o kona lima hema, ʻehiku ka pīpī ʻana i mua o Iēhova.

²⁸ “A e kau ke kahuna i kauwahi o ka ʻaila ka mea i loko o kona lima, ma ke kihi o ka pepeiao ʻākau o ka mea e hoʻomaʻemaʻe ʻia ana, a ma ka manamana nui o kona lima ʻākau, a ma ka manamana nui o kona kapuaʻi ʻākau, ma kahi o ke koko o ka mōhai hala.

²⁹ “A ʻo ke koena o ka ʻaila ma loko o ka lima o ke kahuna, ʻo ia kāna e kau ai ma ke poʻo o ka mea e hoʻomaʻemaʻe ʻia ana, a e hana hoʻi i kalahala nona ma ke alo o Iēhova.

³⁰ “A e kaumaha hoʻi ʻo ia i kekahi o nā kuhukukū, a ʻo nā manu nūnū paha, ka mea e hiki ke loaʻa iā ia;

³¹ ka mea e hiki i kona lima, i kekahi i mōhai lawehala, a i kekahi i mōhai kuni, me ka mōhai ʻai; a e hana ke kahuna i kalahala no ka mea e hoʻomaʻemaʻe ʻia ana i mua o Iēhova.

³² “ʻO ia ke kānāwai no ka mea maʻi lēpera, ʻaʻole hiki ke loaʻa i kona lima nā mea no kona hoʻomaʻemaʻe ʻana.”

³³ ¶ ʻŌlelo maila hoʻi ʻo Iēhova iā Mose a me ʻAʻarona, ʻī maila,

³⁴ “Aia komo ʻoukou i ka ʻāina ʻo Kanaʻana aʻu e hāʻawi ai iā ʻoukou i hoʻoilina, a hoʻokomo au i ka ʻino lēpera i loko o ka hale o ka ʻāina o ʻoukou;

³⁵ a hele mai ka mea nona ka hale e haʻi i ke kahuna pule, e ʻī mai ana, ‘I kuʻu manaʻo, ʻeā, me he ʻino lēpera lā i loko o ka hale’;

³⁶ a laila e kauoha ke kahuna e hoʻokaʻawale i ka hale ma mua o ke komo ʻana o ke kahuna e ʻike i ka ʻino, i ʻole ai e pau i ka haumia ko loko o ka hale; a ma hope iho e hele aʻe ke kahuna i loko e nānā i ka hale.

³⁷ “A e nānā aku ʻo ia i ka maʻi ʻino, aia hoʻi, inā ma nā paia ka maʻi ʻino, he mau ʻaluʻalu, he ʻōmaʻomaʻo iki, a he ʻulaʻula iki paha, ua poʻopoʻo i loko o ka paia i ka nānā aku;

³⁸ a laila e puka aku ke kahuna ma waho o ka hale a i ka puka o ka hale, a e papani i ka hale i nā lā ʻehiku.

³⁹ “A e hoʻi mai ke kahuna i ka hiku o ka lā, a e nānā; aia hoʻi, inā ua pālahalaha aʻe ka ʻino ma nā paia o ka hale;

⁴⁰ a laila e kauoha ke kahuna e lawe aku lākou i nā pōhaku i pili ai ka ʻino, a e kiola lākou ia mau mea ma waho o ke kūlanakauhale, ma kahi haumia.

⁴¹ “E kepa aʻe ʻo ia iā loko o ka hale a puni, a e ninini aku lākou i ka lepo a lākou i kepa ai, ma waho o ke kūlanakauhale ma kahi haumia.

⁴² “A e lawe lākou i nā pōhaku hou a hahao ma kahi o kēlā mau pōhaku; a e lawe ʻo ia i ka puna hou e hamo i ka hale.

⁴³ ¶ “A inā e hiki hou mai ka ʻino, a pohā hou ma hope iho o ka lawe ʻana aku o nā pōhaku, a ma hope hoʻi o kona kepa ʻana i ka hale, a ma hope hoʻi o kona hamo ʻia ʻana;

⁴⁴ a laila e hele mai ke kahuna a e nānā, aia hoʻi, inā ua pālahalaha aʻe ka ʻino ma loko o ka hale, he lēpera ia e ʻaʻai ana i loko o ka hale, he haumia ia.

⁴⁵ “A e hoʻohiolo hoʻi ʻo ia i ka hale, i kona mau pōhaku a me kona mau lāʻau, a me ka puna a pau o ka hale; a e halihali ʻo ia ia mau mea ma waho o ke kūlanakauhale i kahi haumia.

⁴⁶ “ʻO ka mea hoʻi i hele aʻe i loko o ka hale i kona wā a pau i papani ʻia ai, e haumia ʻo ia a hiki i ke ahiahi.

⁴⁷ “A ʻo ka mea moe ma ia hale, e holoi ʻo ia i kona kapa; a ʻo ka mea ʻai ma loko o ka hale, e holoi ʻo ia i kona kapa.

⁴⁸ ¶ “A inā e komo ke kahuna, a e nānā aku ia mea, aia hoʻi, ʻaʻole i pālahalaha ka maʻi ʻino ma loko o ka hale ma hope iho o ka hamo ʻia ʻana o ka hale; a laila e ʻōlelo ke kahuna pule he maʻemaʻe ka hale; no ka mea, ua ola ka maʻi ʻino.

⁴⁹ “A lawe ʻo ia e hoʻomaʻemaʻe i ka hale, i nā manu ʻelua, a me ka lāʻau kedera, a me ka ʻulaʻula, a me ka husopa.

⁵⁰ “A e pepehi ʻo ia i kekahi o nā manu, ma loko o ka ipu lepo ma luna o ka wai e kahe ana;

⁵¹ a e lawe ʻo ia i ka lāʻau kedera, a me ka husopa, a me ka ʻulaʻula, a me ka manu e ola ana, a e hoʻū ia mau mea i loko o ke koko o ka manu i pepehi ʻia, a i loko hoʻi o ka wai e kahe ana, a e pīpī i ka hale, ʻehiku ka pīpī ʻana.

⁵² “A e hoʻomaʻemaʻe ʻo ia i ka hale me ke koko o ka manu a me ka wai e kahe ana, a me ka manu e ola ana, a me ka lāʻau kedera, a me ka husopa a me ka ʻulaʻula.

⁵³ “Akā, e hoʻokuʻu aku ʻo ia i ka manu e ola ana ma waho ma ke kula, a e hana i kalahala no ka hale; a e maʻemaʻe nō ia.

⁵⁴ ¶ “ʻO ia ke kānāwai no ka maʻi ʻino o kēlā lēpera kēia lēpera;

⁵⁵ a no ke kapa lēpera, a me ka hale nō hoʻi;

⁵⁶ a no ka pehu ʻana, a me ka pehu pala, a me kahi lilelile;

⁵⁷ e hoʻākāka ai i ka wā e haumia ai ia, a i ka wā e maʻemaʻe ai hoʻi; ʻo ia ke kānāwai o ka lēpera.”