KA BUKE ʻAKOLU A MOSE, I KAPA ʻIA ʻOIHANA KAHUNA 13 - Ka Baibala Hemolele

1 No ka lēpera o ke kanaka. 47 Ka lēpera o ke kapa.

MOKUNA XIII.

¹ ¶ ʻŌlelo maila hoʻi ʻo Iēhova iā Mose a me ʻAʻarona, ʻī maila,

² “A loaʻa i ke kanaka ka pehu ʻana ma ka ʻili o kona ʻiʻo, a ʻo ka pehu pala paha, a ʻo kahi lilelile paha, a i loko nō o ka ʻili o kona ʻiʻo e like me ka maʻi lēpera; a laila e lawe ʻia mai ʻo ia i o ʻAʻarona lā ke kahuna, a i kekahi paha o nā keiki āna, nā kāhuna pule.

³ “A e nānā iho ke kahuna pule i ka maʻi i loko o ka ʻili o kona ʻiʻo, a i lilo ka huluhulu i loko o ka maʻi i keʻokeʻo, a inā ma lalo iho o ka ʻili o kona ʻiʻo ka maʻi i ʻike ʻia, he maʻi lēpera ia; a e nānā aʻe ke kahuna iā ia a e ʻōlelo aku, he haumia ia.

⁴ “A inā he keʻokeʻo kahi lilelile i loko o ka ʻili o kona ʻiʻo, a inā ʻaʻole ma lalo ia o ka ʻili i ka ʻike ʻia, ʻaʻole hoʻi i lilo ko laila huluhulu i keʻokeʻo; a laila e papani i ka mea maʻi, i nā lā ʻehiku.

⁵ “A i ka hiku o ka lā e nānā hou aku ke kahuna iā ia; aia hoʻi, inā ʻaʻole ʻai ka maʻi, ʻaʻole hoʻi i nui aʻe ma loko o ka ʻili; a laila e papani hou ke kahuna iā ia i nā lā hou ʻehiku.

⁶ “A i ka hiku o ka lā, e nānā hou aku ke kahuna iā ia; aia hoʻi, inā i ʻeleʻele iki mai ka maʻi, ʻaʻole hoʻi i nui aʻe ka maʻi i loko o ka ʻili, a laila e ʻōlelo ke kahuna he maʻemaʻe ʻo ia; he pehu pala ia, e holoi ʻo ia i kona kapa, a e maʻemaʻe ia.

⁷ ¶ “Akā, inā i nunui aʻe ka pehu pala i loko o ka ʻili, ma hope iho o kona ʻike ʻia ʻana e ke kahuna, e ʻike hou ʻia ʻo ia e ke kahuna pule.

⁸ “A inā i ʻike ke kahuna pule, aia hoʻi, ua nunui aʻe ka pehu pala i loko o ka ʻili, a laila e ʻōlelo aku ke kahuna, ua haumia ia, he lēpera ia maʻi.

⁹ ¶ “A inā he maʻi lēpera i loko o ke kanaka, e lawe ʻia mai ʻo ia i ke kahuna pule;

¹⁰ a e nānā aku ke kahuna iā ia; aia hoʻi, inā he keʻokeʻo ka pehu ʻana i loko o ka ʻili, a ua hoʻolilo aʻe i ka huluhulu i keʻokeʻo, a he ʻiʻo kupu ma loko o ka pehu ʻana,

¹¹ he maʻi lēpera kahiko ia i loko o ka ʻili o kona ʻiʻo, a e ʻōlelo ke kahuna he haumia ʻo ia, ʻaʻole e papani aʻe iā ia; no ka mea he haumia ia.

¹² “Inā i pohā ka maʻi lēpera i loko o ka ʻili, a paʻapū i ka lēpera ka ʻili o ka mea maʻi lēpera mai kona poʻo a hiki i kona kapuaʻi, ma kēlā wahi kēia wahi a puni a ke kahuna i nānā ai;

¹³ a laila, e noʻonoʻo aʻe ke kahuna; aia hoʻi, inā ua paʻapū kona ʻiʻo a pau i ka maʻi lēpera, e ʻōlelo aʻe nō ia he maʻemaʻe ka mea maʻi; ua pau aʻe i ke keʻokeʻo, he maʻemaʻe ʻo ia.

¹⁴ “Akā, i nā lā i ʻike ʻia ka ʻiʻo kupu i loko ona, e haumia nō ia.

¹⁵ “A e nānā hoʻi ke kahuna i ka ʻiʻo, a e ʻōlelo aku hoʻi he haumia ia; he haumia ka ʻiʻo, he maʻi lēpera ia.

¹⁶ “A inā i ʻano hou ka ʻiʻo, a lilo ia i keʻokeʻo, e hele hou mai nō ia i ke kahuna pule.

¹⁷ “A e nānā ke kahuna iā ia; aia hoʻi, inā ua lilo ka maʻi i keʻokeʻo, a laila e ʻōlelo ke kahuna, he maʻemaʻe ka mea maʻi; he maʻemaʻe nō ia.

¹⁸ ¶ “A ʻo ka ʻiʻo hoʻi ma loko ona, a ma loko o ko laila ʻili, he maʻi heheʻe, a ua ola ia;

¹⁹ a inā ma kahi o ka maʻi heheʻe, he pehu keʻokeʻo, he wahi lilelile paha, he keʻokeʻo, he ʻula iki naʻe, a i hōʻike ʻia aʻe i ke kahuna pule;

²⁰ a ʻike ke kahuna, aia hoʻi, ma lalo o ka ʻili ia i ka ʻike ʻia, a ua lilo ko laila huluhulu i keʻokeʻo, a laila e ʻōlelo ke kahuna he haumia ia; he maʻi lēpera ia i pohā mai, mai loko mai o ka maʻi heheʻe.

²¹ “A inā i nānā ke kahuna ia mea, aia hoʻi, ʻaʻole huluhulu keʻokeʻo ma laila, ʻaʻole hoʻi ia ma loko o ka ʻili; akā, he ʻeleʻele iki; a laila e papani aku ke kahuna iā ia i nā lā ʻehiku;

²² a inā e pālahalaha nui aʻe ia ma ka ʻili, a laila e ʻōlelo ke kahuna he haumia ia, he maʻi ʻino ia.

²³ “Akā, inā e mau kahi lilelile ma kona wahi nō, ʻaʻole pālahalaha aʻe, he wewela ia; a e ʻōlelo ke kahuna he maʻemaʻe ia.

²⁴ ¶ “A inā he ʻiʻo i loko o ka ʻili kahi i wewela ai, a he wahi lilelile keʻokeʻo ko ka mea e wewela ana, he ʻulaʻula iki paha, he keʻokeʻo paha;

²⁵ a laila e nānā ke kahuna ia mea; aia hoʻi, inā ua lilo ka huluhulu ma loko o kahi lilelile, i keʻokeʻo, a ma lalo o ka ʻili ia i ka ʻike ʻia, he maʻi lēpera ia i pahū mai mai loko mai o ka wela; no laila e ʻōlelo ai ke kahuna he haumia ia; he maʻi lēpera ia.

²⁶ “A inā e nānā ke kahuna ia mea, aia hoʻi, ʻaʻole huluhulu keʻokeʻo ma kahi lilelile, ʻaʻole hoʻi ia ma lalo o kekahi ʻili; akā, he ʻeleʻele iki; a laila e papani aku ke kahuna iā ia i nā lā ʻehiku.

²⁷ “A i ka hiku o ka lā, e nānā hou ke kahuna iā ia; a inā ua pālahalaha nui aʻe ia ma ka ʻili, a laila e ʻōlelo ke kahuna he haumia ia; he maʻi lēpera ia.

²⁸ “A inā e mau kahi lilelile i kona wahi iho, ʻaʻole pālahalaha aʻe ma ka ʻili; akā, he ʻeleʻele iki naʻe ia, he pehu ia o ka wela, a e ʻōlelo ke kahuna he maʻemaʻe ia; he hōʻailona ia o ka wela.

²⁹ ¶ “Inā he maʻi ko ke kanaka paha, ko ka wahine paha ma ke poʻo paha, ma ka ʻumiʻumi paha;

³⁰ a laila e nānā ke kahuna i ka maʻi ʻino, aia hoʻi, inā ma lalo ia o ka ʻili i ka ʻike ʻia, a ma laila ke oho melemele lahilahi; a laila e ʻōlelo ke kahuna he haumia ia, he maʻi lēpera ia, he maʻi lēpera ma ke poʻo paha, a ma ka ʻumiʻumi paha;

³¹ a inā e nānā ke kahuna i ka maʻi lēpera, aia hoʻi, ʻaʻole ma lalo iho ia o ka ʻili i ka ʻike ʻia, ʻaʻole hoʻi oho ʻeleʻele i loko ona; a laila e papani aku ke kahuna i ka mea maʻi lēpera i nā lā ʻehiku.

³² “A i ka hiku o ka lā, e nānā hou ke kahuna i ka maʻi; aia hoʻi, i pālahalaha ʻole aʻe ka maʻi lēpera, ʻaʻole hoʻi oho melemele ma laila, ʻaʻole hoʻi ka maʻi lēpera ma lalo o ka ʻili;

³³ e kahi ʻia ʻo ia; akā, ʻaʻole e kahi i ka maʻi lēpera; a e papani aku ke kahuna i ka mea maʻi lēpera i nā lā hou ʻehiku.

³⁴ “A i ka hiku o ka lā, e nānā hou ke kahuna i ka maʻi lēpera; aia hoʻi, inā ʻaʻole pālahalaha aʻe ka maʻi lēpera ma ka ʻili, ʻaʻole hoʻi ia ma lalo o ka ʻili i ka ʻike ʻia; a laila e ʻōlelo ke kahuna he maʻemaʻe ia, a e holoi ʻo ia i kona kapa, a e maʻemaʻe nō hoʻi.

³⁵ “Akā, inā i pālahalaha nui aʻe ka maʻi lēpera ma ka ʻili ma hope o kona maʻemaʻe ʻana,

³⁶ a laila e nānā ke kahuna iā ia; aia hoʻi, inā ua pālahalaha aʻe ka maʻi lēpera ma ka ʻili, ʻaʻole e ʻimi ke kahuna i ke oho melemele, he haumia nō ia.

³⁷ “Akā, inā he mau ko ka maʻi lēpera i ka ʻike ʻia, a ua kupu ke oho ʻeleʻele i loko, ua ola ia maʻi lēpera, he maʻemaʻe nō ʻo ia; a e ʻōlelo ke kahuna he maʻemaʻe ia.

³⁸ ¶ “A inā he mau wahi lilelile, he lilelile keʻokeʻo ko ke kanaka paha, ko ka wahine paha, i loko o ko lāua ʻili;

³⁹ a laila e nānā ke kahuna, aia hoʻi, inā he keʻokeʻo ʻeleʻele iki, he wahi ʻāhinahina ia e ulu ana i loko o ka ʻili; he maʻemaʻe nō ia.

⁴⁰ ¶ “A ʻo ke kanaka ua hāʻule iho kona lauoho mai kona poʻo iho, he ʻōhule ia, he maʻemaʻe naʻe.

⁴¹ “A ʻo ke kanaka ua hāʻule ka lauoho mai kahi e kokoke ana i kona maka, he lae ʻōhule ia, he maʻemaʻe naʻe.

⁴² “A inā ma kahi ʻōhule o ke poʻo, a ʻo ka lae paha he maʻi keʻokeʻo ʻulaʻula iki; he maʻi lēpera ia i kupu ma kona poʻo ʻōhule, a ma kona lae ʻōhule paha.

⁴³ “A laila e nānā ke kahuna pule ia mea; aia hoʻi, inā ʻo ka pehu ʻana o ka maʻi he ʻulaʻula keʻokeʻo, ma kona poʻo ʻōhule paha, a ma kona lae ʻōhule paha, e like me ka maʻi lēpera i ka nānā ʻia ma ka ʻili o ka ʻiʻo;

⁴⁴ he kanaka lēpera ia, he haumia; e ʻōlelo ke kahuna, he haumia loa ia, ma kona poʻo kona maʻi.

⁴⁵ ¶ “A ʻo ka lēpera i loko ona ka maʻi, e uhae ʻia kona kapa, a e pāpale ʻole kona poʻo, a e uhi i kona lehelehe luna, a e kāhea aku, ‘He haumia, he haumia!’

⁴⁶ “I nā lā a pau e noho ai ka maʻi i loko ona, e maʻemaʻe ʻole nō ia; he haumia nō, e noho kaʻawale ia, ma waho o kahi hoʻomoana kona wahi e noho ai.

⁴⁷ “ʻO ke kapa hoʻi ko loko ona ka maʻi lēpera, inā he kapa hulu hipa, inā he kapa olonā;

⁴⁸ inā ma ka maʻawe loloa, a inā ma ka maʻawe pokopoko, ʻo ke olonā paha, ʻo ka hulu hipa; a inā ma ka ʻili, a inā ma kekahi mea i hana ʻia o ka ʻili;

⁴⁹ a inā he ʻōmaʻomaʻo iki, a he ʻulaʻula iki ka lēpera i loko o ke kapa paha, a i loko paha o ka ʻili, a i loko paha o ka maʻawe loloa, a ma ka maʻawe pokopoko paha, a i loko paha o ka mea i hana ʻia no ka ʻili; he maʻi lēpera ia, a e hōʻike ʻia ia i ke kahuna pule.

⁵⁰ “A e nānā ke kahuna i ka lēpera, a e papani aku i ka mea lēpera i nā lā ʻehiku.

⁵¹ “A i ka hiku o ka lā, e nānā aku ʻo ia i ka lēpera; a inā i pālahalaha aʻe ka lēpera i loko o ke kapa, inā ma loko o ka maʻawe loloa, a inā ma ka maʻawe pokopoko, a inā ma ka ʻili, a inā ma ka mea i hana ʻia no ka ʻili; he lēpera ʻaʻai ia, he haumia nō ia.

⁵² “E puhi hoʻi ʻo ia ia kapa, inā he maʻawe loloa, inā he maʻawe pokopoko, a inā ma ka hulu hipa, inā ma ke olonā, a inā ma ko ka ʻili, kahi e noho ai ka lēpera; no ka mea he lēpera ʻaʻai ia, e hoʻopau ʻia ia i ke ahi.

⁵³ ¶ “A inā e nānā ke kahuna, aia hoʻi, ʻaʻole i pālahalaha aʻe ka lēpera i loko o ke kapa, ma ka maʻawe loloa, ka maʻawe pokopoko, a ma ka mea paha i hana ʻia no ka ʻili;

⁵⁴ a laila e kauoha ke kahuna e holoi lākou i ka mea lēpera, a e papani hou ʻo ia i nā lā hou ʻehiku.

⁵⁵ “A e nānā ke kahuna i ka lēpera ma hope o ka holoi ʻana; aia hoʻi, inā ʻaʻole ʻano hou, ʻaʻole i pālahalaha aʻe ka lēpera, he haumia nō ia; e puhi ʻoe ia mea i ke ahi, ua ʻaʻai nō ia, ua kuakea ma ke kua a ma ke alo paha.

⁵⁶ ¶ “A inā e nānā ke kahuna, aia hoʻi, ua ʻeleʻele iki ka lēpera ma hope iho o ka holoi ʻana ia mea; a laila e uhae ʻo ia ia mea mai loko aʻe o ke kapa paha, a ʻo ka ʻili paha, a ʻo ka maʻawe loloa paha, a ʻo ka maʻawe pokopoko paha.

⁵⁷ “A i ʻike mau ʻia ia i loko o ke kapa, inā ma ka maʻawe loloa, a inā ma ka maʻawe pokopoko, a inā ma ka mea ʻili, he mea e pālahalaha ana; e puhi ʻoe i ka mea lēpera i ke ahi.

⁵⁸ “A ʻo ke kapa, ʻo ka maʻawe loloa, a ʻo ka maʻawe pokopoko, a ʻo ka mea ʻili, āu e holoi ai, inā ua haʻalele aku ka lēpera mai laila aku, a laila e holoi hou ʻia aʻe ia mea, a e maʻemaʻe nō.

⁵⁹ ¶ “ʻO ia ke kānāwai o ka lēpera i loko o ke kapa hulu hipa, a he olonā, ma ka maʻawe loloa paha, ka maʻawe pokopoko paha, a he mea ʻili paha, a e ʻōlelo ai he maʻemaʻe, a e ʻōlelo ai hoʻi he haumia.”