KA BUKE ʻAKOLU A MOSE, I KAPA ʻIA ʻOIHANA KAHUNA 12 - Ka Baibala Hemolele

1 Ke kānāwai no ka haumia ʻana a me ka maʻemaʻe ʻana o ka mea hānau keiki.

MOKUNA XII.

¹ ¶ ʻŌlelo maila hoʻi ʻo Iēhova iā Mose, ʻī maila,

² “E ʻōlelo aku ʻoe i nā mamo a ʻIseraʻela, penei, ‘Inā i hāpai ka wahine a hānau he keiki kāne, e haumia ka wahine i nā lā ʻehiku, e like me nā lā o kona kaʻawale ʻana no kona maʻi, e haumia ana nō ia.

³ ‘A i ka walu o ka lā e ʻoki poepoe ʻia ai kona ʻili ʻōmaka.

⁴ ‘A laila noho ka wahine i loko o kona koko o kona hoʻomaʻemaʻe ʻia, i nā lā he kanakolukumamākolu; ʻaʻole e pā aku ʻo ia i ka mea hoʻāno, ʻaʻole hoʻi e komo i ke keʻena kapu, a pau aʻe nā lā o kona hoʻomaʻemaʻe ʻana.

⁵ ‘Akā, inā i hānau ʻo ia he kaikamahine, a laila e haumia ia i nā hebedoma ʻelua, me ia i kona kaʻawale ʻana; a e noho nō ʻo ia i loko o ke koko o kona hoʻomaʻemaʻe ʻia i nā lā he kanaonokumamāono.

⁶ ¶ ‘Aia pau nā lā o kona hoʻomaʻemaʻe ʻana, no ke keiki kāne, a no ke kaikamahine paha, e lawe mai nō ʻo ia i ke keiki hipa o ka makahiki hoʻokahi, i mōhai kuni, a i ka manu nūnū ʻōpiopio, a i ke kuhukukū paha i mōhai lawehala, i ka puka o ka halelewa o ke anaina, i ke kahuna.

⁷ ‘Nāna nō ia e kaumaha aku ma ke alo o Iēhova, a e hana i kalahala nona, a e hoʻomaʻemaʻe ʻia ʻo ia mai ke kahe ʻana o kona koko. ʻO ia ke kānāwai no ka wahine i hānau he kāne, he wahine paha.

⁸ ‘A inā e hiki ʻole iā ia ke lawe mai i ke keiki hipa, a laila e lawe mai ʻo ia i nā kuhukukū ʻelua, a i nā manu nūnū ʻōpiopio paha, i kekahi i mōhai kuni, a i kekahi i mōhai lawehala; a e hana ke kahuna i kalahala nona, a maʻemaʻe nō ia.’”