KA BUKE ʻAKOLU A MOSE, I KAPA ʻIA ʻOIHANA KAHUNA 11 - Ka Baibala Hemolele

1 No nā holoholona e ʻai ʻia, a e ʻai ʻole ʻia. 8 ʻO nā iʻa. 13 ʻO nā manu. 24 ʻO ka haumia ʻana ma nā mea haumia. 41 ʻO nā mea kolo. 43 ʻO ka maʻemaʻe ʻana.

MOKUNA XI.

¹ ¶ ʻŌlelo maila hoʻi ʻo Iēhova iā Mose a me ʻAʻarona, ʻī maila iā lāua,

² “E ʻōlelo ʻolua i nā mamo a ʻIseraʻela, penei, ‘Eia nā holoholona a ʻoukou e ʻai ai, ʻo ko nā holoholona a pau ma luna o ka honua.

³ ‘ʻO ka mea mahele i ka māiʻuʻu, a ua kapuaʻi mahele ʻia, a ua nau i ka mea hoʻolualuaʻi ʻia, i waena o nā holoholona, ʻo ia kā ʻoukou e ʻai ai.

⁴ ‘Akā, ʻaʻole ʻoukou e ʻai i kēia mau mea o nā mea nau i ka mea hoʻolualuaʻi ʻia, a ʻo nā mea mahele māiʻuʻu, ʻo ke kāmelo; no ka mea, ua nau ia i ka mea hoʻolualuaʻi ʻia, ʻaʻole naʻe i mahele i ka māiʻuʻu, he haumia ia iā ʻoukou;

⁵ a ʻo ke kone hoʻi; no ka mea, ua nau nō ia i ka mea hoʻolualuaʻi ʻia, ʻaʻole mahele i ka māiʻuʻu, he haumia ia iā ʻoukou;

⁶ a ʻo ka hare hoʻi; no ka mea, ua nau nō ia i ka mea hoʻolualuaʻi ʻia, ʻaʻole hoʻi i mahele i ka māiʻuʻu, he haumia ia iā ʻoukou;

⁷ a ʻo ka puaʻa hoʻi; no ka mea, ua mahele nō ia i ka māiʻuʻu, ua kapuaʻi mahele ʻia, ʻaʻole hoʻi ia i nau i ka mea hoʻolualuaʻi ʻia, he haumia ia iā ʻoukou.

⁸ ‘ʻAʻole ʻoukou e ʻai i ko lākou ʻiʻo, ʻaʻole e hoʻopā i ko lākou kupapaʻu, he haumia lākou iā ʻoukou.

⁹ ¶ ‘Eia nā mea e ʻai ai ʻoukou, ʻo nā mea ma loko o nā wai, ʻo ka mea halo, a me ka unahi, i loko o nā wai a me nā kai, a me nā muliwai, ʻo lākou kā ʻoukou e ʻai ai.

¹⁰ ‘A ʻo ka mea halo ʻole, a me ka unahi ʻole, i loko o nā kai, a me nā muliwai, ʻo nā mea a pau e ʻoni ana i loko o nā wai, a ʻo nā mea ola i loko o nā wai, he mea hoʻowahāwahā ʻia iā ʻoukou.

¹¹ ‘He mau mea e hoʻowahāwahā ʻia iā ʻoukou; ʻaʻole ʻoukou e ʻai i ko lākou ʻiʻo, a e hoʻopailua ʻoukou i ko lākou mau kupapaʻu.

¹² ‘ʻO ka mea halo ʻole, a unahi ʻole ma loko o nā wai, ʻo ia ke hoʻowahāwahā ʻia e ʻoukou.

¹³ ¶ ‘Eia hoʻi nā mea a ʻoukou e hoʻowahāwahā ai i waena o nā manu, ʻaʻole e ʻai ʻia lākou, he mea e hoʻowahāwahā ʻia nō: ʻo ka ʻaeto, a me ka ʻoseferaga, a me ka ʻosepera;

¹⁴ a ʻo ka vuletura, a me ka falekona me kona like;

¹⁵ a ʻo ke koraka me kona like;

¹⁶ a ʻo ka iana, a me ke tama, a me ke kūkū, a me ka nisu me kona like;

¹⁷ a ʻo ka pueo pepeiao, a me ka lawaiʻa, a me ka pueo;

¹⁸ a ʻo ka noketura, a me ka pelikana a me ka vuletura keʻokeʻo;

¹⁹ a ʻo ke kikonia, a me ka ʻaredea me kona like, a me ka upupā, a me ka ʻōpeʻapeʻa.

²⁰ ¶ ‘ʻO nā manu kolo e hele ana ma nā hā, he mea ia e hoʻowahāwahā ʻia e ʻoukou.

²¹ ‘Eia naʻe nā mea e pono ke ʻai ʻoukou, ʻo nā mea lele e kolo ana, nā mea hele ma nā hā, he mau wāwae hoʻi ko lākou ma luna o nā kapuaʻi, e mahiki ai ma ka honua.

²² ‘ʻO nēia poʻe o lākou e pono ke ʻai ʻoukou: ʻo ka ʻūhini me kona like, a me ka ʻūhini wāwae hā me kona like, a me ka ʻūhini lele me kona like, a me ka ʻūhini ʻakerida me kona like.

²³ ‘Akā, ʻo nā mea lele ʻē aʻe a pau e kolo ana, me nā wāwae hā, he mea ia e hoʻopailua ʻia e ʻoukou.

²⁴ ¶ ‘‘A no ia mau mea e haumia ai ʻoukou; ʻo ka mea i pā aku i ko lākou kupapaʻu e haumia ia a hiki i ke ahiahi.

²⁵ ‘A ʻo ka mea e hali i kauwahi o ke kupapaʻu o lākou, e holoi ʻo ia i kona mau kapa, a e haumia hoʻi ia a hiki i ke ahiahi.

²⁶ ‘ʻO ke kupapaʻu o ka holoholona i mahele i ka māiʻuʻu, ʻaʻole mahele leʻa ʻia ke kapuaʻi, ʻaʻole nau i ka mea i hoʻolualuaʻi ʻia, ʻo ia ke haumia iā ʻoukou, ʻo ka mea e pā ʻia lākou e haumia nō ia.

²⁷ ‘ʻO ka mea hele ma kona mau kapuaʻi manamana, ʻo ko nā holoholona a pau e hele ana ma nā hā, he haumia ia iā ʻoukou; a ʻo ka mea i pā i ko lākou kupapaʻu e haumia ia a hiki i ke ahiahi.

²⁸ ‘A ʻo ka mea nāna e hali i ko lākou kupapaʻu, e holoi ʻo ia i kona kapa, a e haumia a hiki i ke ahiahi, he mau mea haumia iā ʻoukou.

²⁹ ¶ ‘Eia hoʻi nā mea haumia iā ʻoukou i waena o nā mea kolo e kolo ana ma ka lepo, ʻo ka mole, ʻo ka ʻiole, a me ka honu me kona like,

³⁰ a me ke ʻanaka, a me ke koa, a me ka moʻo, a me ka hometa, a me ke kameleona.

³¹ ‘He mau mea haumia ia iā ʻoukou i waena o nā mea a pau e kolo ana; ʻo ka mea e pā ia mau mea ma hope o ko lākou make ʻana, e haumia nō ia a hiki i ke ahiahi.

³² ‘A ʻo ka mea i hāʻule ʻia iho e kekahi mea i make o lākou, a haumia nō ia; inā he ipu lāʻau, a he kapa paha, a he ʻili, he ʻeke, ʻo kēlā ipu kēia ipu, kahi e hana ʻia ai ka hana, e hoʻokomo ʻia i loko o ka wai, a e haumia ia a hiki i ke ahiahi, a laila e hoʻomaʻemaʻe ʻia ia.

³³ ‘A ʻo ka ipu lepo, i hāʻule ʻia i loko e kekahi o lākou, e haumia ka mea o loko, a e wāwahi ʻoukou ia.

³⁴ ‘A ʻo ka ʻai e ʻai ʻia, ke hiki ia wai ma luna iho, e haumia ia; a ʻo ka mea inu e inu ʻia ʻo loko o ia ipu, e haumia ia.

³⁵ ‘A ʻo ka mea i hāʻule ʻia ai e kauwahi o ko lākou kupapaʻu, e haumia ia, ʻo ka umu paha, kahi e kau ai nā ipu hao, e wāwahi ʻia nō ia mau mea; ua haumia, a e haumia hoʻi ia mau mea iā ʻoukou.

³⁶ ‘Akā, he kumu wai, a he lua paha, kahi wai nui, e maʻemaʻe ia; akā, ʻo ka mea pā i ko lākou kupapaʻu e haumia ʻo ia.

³⁷ ‘A inā e hāʻule iho kauwahi o ko lākou kupapaʻu ma luna o ka hua lūlū e lūlū ʻia ana, e maʻemaʻe hoʻi ia.

³⁸ ‘A inā i kau ka wai ma luna o ka hua, a hāʻule kauwahi o ko lākou kupapaʻu ma luna iho ona, e haumia ia iā ʻoukou.

³⁹ ¶ ‘A inā e make ka holoholona he pono ke ʻai ʻia e ʻoukou, ʻo ka mea i pā i kona kupapaʻu, e haumia ia a hiki i ke ahiahi.

⁴⁰ ‘A ʻo ka mea i ʻai i kona kupapaʻu, e holoi ʻo ia i kona kapa, a haumia hoʻi ia a hiki i ke ahiahi; a ʻo ka mea hali i kona kupapaʻu, e holoi ʻo ia i kona kapa, a haumia hoʻi a hiki i ke ahiahi.

⁴¹ ¶ ‘A ʻo ka mea kolo e kolo ana ma ka lepo, he mea hoʻowahāwahā ʻia, ʻaʻole ia e ʻai ʻia.

⁴² ‘A ʻo ka mea kolo ma ka ʻōpū, a ʻo ka mea hele ma nā hā, a ʻo ka mea he nui kona mau kapuaʻi, i waena o nā mea kolo a pau e kolo ana ma ka lepo, ʻaʻole ʻoukou e ʻai iā lākou; no ka mea, he mau mea hoʻowahāwahā ʻia.

⁴³ ‘Mai hoʻolilo iā ʻoukou iho i mea hoʻowahāwahā ʻia, i kekahi mea kolo e kolo ana; ʻaʻole hoʻi e hoʻohaumia iā ʻoukou me lākou i haumia ʻoukou i laila.

⁴⁴ ‘No ka mea, ʻo wau nō Iēhova ko ʻoukou Akua; no laila, e hoʻomaʻemaʻe ʻoukou iā ʻoukou iho i maʻemaʻe ʻoukou; no ka mea, he maʻemaʻe wau; ʻaʻole hoʻi ʻoukou e hoʻohaumia iā ʻoukou iho me kekahi mea kolo e kolo ana ma ka lepo.

⁴⁵ ‘No ka mea, ʻo wau nō Iēhova, e lawe ana iā ʻoukou mai loko mai o ka ʻāina ʻo ʻAigupita, i Akua no ʻoukou; no laila e hoʻāno ʻoukou; no ka mea, he hoʻāno nō wau.

⁴⁶ ¶ ‘ʻO ia ke kānāwai no nā holoholona, a no nā manu, a no nā mea ola e ʻoni ana i loko o ka wai, a no nā mea kolo e kolo ana ma ka lepo;

⁴⁷ e hoʻokaʻawale i waena o ka mea haumia a me ka mea maʻemaʻe, a i waena hoʻi o nā holoholona e pono ke ʻai ʻia a me nā holoholona pono ʻole ke ʻai ʻia.’”