KA BUKE ʻAKOLU A MOSE, I KAPA ʻIA ʻOIHANA KAHUNA 1 - Ka Baibala Hemolele

1 Nā kānāwai no nā mōhai kuni o ka bipi. 10 ʻO ka hipa. 14 ʻO ka manu.

MOKUNA I.

¹ ¶ Kāhea maila ʻo Iēhova iā Mose, ʻōlelo maila hoʻi iā ia mai loko mai o ka halelewa o ke anaina, ʻī maila,

² “E ʻōlelo aku ʻoe i nā mamo a ʻIseraʻela, e ʻī aku hoʻi iā lākou, ‘Inā e lawe kekahi kanaka o ʻoukou i ka mōhai iā Iēhova, no nā holoholona e lawe ai ʻoukou i kā ʻoukou mōhai, no ka ʻohana bipi, a no ka ʻohana hipa.

³ ‘Inā ʻo kāna mōhai he mōhai kuni no loko o ka ʻohana bipi, e mōhai ʻo ia i ke kāne kīnā ʻole; e mōhai aku hoʻi ʻo ia ia no kona makemake iho ma ka puka o ka halelewa o ke anaina, ma ke alo o Iēhova.

⁴ ‘A e kau aʻe ʻo ia i kona lima ma luna o ke poʻo o ka mōhai kuni; a e maliu ʻia nona e hoʻolilo ʻia i kalahala nona.

⁵ ‘A e pepehi ʻo ia i ka bipi kāne ma ke alo o Iēhova; a e lawe mai nā kāhuna, kā ʻAʻarona mau keiki, i ke koko, a e pīpī i ke koko a puni ma luna iho o ke kuahu, ka mea ma ka puka o ka halelewa o ke anaina.

⁶ ‘A e lole ʻo ia i ka ʻili o ka mōhai kuni, a e ʻokiʻoki i ka mōhai i mau ʻāpana.

⁷ ‘A e kau aʻe nā keiki a ʻAʻarona ke kahuna i ke ahi ma luna o ke kuahu, a e kau pono i ka wahie ma luna o ke ahi.

⁸ ‘A e kau nā kāhuna, kā ʻAʻarona mau keiki i nā ʻāpana, i ke poʻo, a me ke kaikea, a pono ma luna o ka wahie ka mea ma luna o ke ahi, ka mea ma luna o ke kuahu.

⁹ ‘Akā, e holoi ʻo ia i kona naʻau, a me kona mau wāwae, me ka wai; a e kuni ke kahuna i nā mea a pau ma luna o ke kuahu, i mōhai kuni, he mōhai i kaumaha ʻia ma ke ahi, he mea ʻala ʻono iā Iēhova.

¹⁰ ¶ ‘A inā no loko o ka ʻohana o nā hipa, a ʻo nā kao kona mōhai i mōhai kuni, e lawe mai ʻo ia ia he kāne kīnā ʻole.

¹¹ ‘A e pepehi ʻo ia iā ia ma ka ʻaoʻao kūkulu ʻākau ma ke alo o Iēhova; a e pīpī nā kāhuna kā ʻAʻarona mau keiki i kona koko a puni ma luna o ke kuahu.

¹² ‘A e ʻokiʻoki iho ʻo ia i mau ʻāpana ona me kona poʻo a me kona konāhua; a e kau ke kahuna ia mau mea a pono, ma luna o ka wahie, ka mea ma luna o ke ahi, ka mea ma luna o ke kuahu;

¹³ akā, e holoi ʻo ia i ka naʻau, a me kona mau wāwae me ka wai; a e lawe pū mai ke kahuna a e kuni ma luna iho o ke kuahu; he mōhai kuni ia, he mōhai i kaumaha ʻia ma ke ahi, he mea ʻala ʻono iā Iēhova.

¹⁴ ¶ ‘A inā nō nā manu ka mōhai kuni kona mōhai iā Iēhova, a laila e lawe mai ʻo ia i kāna mōhai no nā kuhukukū, a i ʻole ia, no nā nūnū ʻōpiopio.

¹⁵ ‘A e lawe mai ke kahuna ia i ke kuahu, a e wili i kona poʻo, a e kuni aku ia ma ke kuahu, a e ʻuī ʻia kona koko ma ka ʻaoʻao o ke kuahu.

¹⁶ ‘A e unuhi aʻe ʻo ia i kona ʻōpū a me kona haumia, a e holoi aʻe ia ma ka ʻaoʻao o ke kuahu, ma ka hikina, ma kahi o ka lehu.

¹⁷ ‘A e mahele ʻo ia iā ia me kona mau ʻēheu, ʻaʻole hoʻi e hoʻokaʻawale loa; a e kuni ke kahuna ia ma ke kuahu ma luna o ka wahie ka mea i luna o ke ahi; he mōhai kuni ia, he mōhai kaumaha ia ma ke ahi, he mea ʻala ʻono iā Iēhova.