KE MELE A SOLOMONA 7 - Ka Baibala Hemolele

MOKUNA VII.

¹ ¶ “Nani wale kou mau wāwae i loko o nā kāmaʻa, e ke kaikamahine aliʻi! ʻO ke apo o kou mau ʻūhā, ua like ia me ka lei o ka ʻāʻī, Ka mea a nā lima o ka poʻe akamai i hana ai.

² “ʻO kou piko me he kīʻaha poepoe lā ia, ʻAʻole nele i ka waina ʻala. ʻO kou ʻōpū me he pūʻā palaoa lā, Ua nakinaki ʻia i nā līlia.

³ “ʻO kou mau waiū, ua like me nā ʻanetelope ʻelua, He mau māhoe ʻanetelope lāua.

⁴ “ʻO kou ʻāʻī, ua like ia me ka hale kiaʻi niho ʻelepani; ʻO kou mau maka, me nā pūnāwai o Hesebona, Aia ma ka ʻīpuka ʻo Bete Rabima; ʻO kou ihu ua like ia me ka hale kiaʻi o Lebanona, Aia kona alo i Damaseko.

⁵ “ʻO kou poʻo ma luna ou, ua like ia me Karemela, ʻO kou lauoho ma luna o kou poʻo, me he mea ʻulaʻula lā; Ua paʻa ke aliʻi i loko o nā keʻena ma luna.

⁶ “Manomano kou nani, a me kou maikaʻi, E kaʻu mea i aloha ai, no ka ʻoliʻoli!

⁷ “ʻO kou kiʻekiʻe, ua like ia me ka lāʻau pāma, A ʻo kou mau waiū me he mau huhui waina lā.

⁸ “ʻĪ ihola au, ‘E piʻi au i luna o ka lāʻau pāma, A paʻa aku au i kona mau lālā.’ ʻĀnō, e lilo mai kou mau waiū me he mau huhui waina lā; A ʻo ke ʻala o kou ihu e like me nā ʻōhiʻa.

⁹ “A ʻo ke ā luna o kou waha me ka waina maikaʻi.” “No kaʻu mea i aloha ai, e kahe ʻoluʻolu ana, A ʻōlelo aʻela nā lehelehe o ka poʻe hiamoe.

¹⁰ ¶ “No kaʻu mea i aloha ai ʻo wau, A ʻo kona makemake, eia nō iaʻu.

¹¹ “Inā kāua, e kaʻu mea i aloha ai, e hele kāua i ke kula, E noho kāua ma nā kauhale.

¹² “E ala aʻe i ke kakahiaka ma ka māla waina, e ʻike i ka ulu ʻana o ka waina, E nānā i ka pua ʻana o ka waina, A me ke kupu ʻana o ka pomeraite; Ma laila au e hāʻawi ai iā ʻoe i koʻu aloha.

¹³ “Ua ʻala mai nā dudima, A ma ko mākou mau ʻīpuka, aia nā hua ʻono a pau, He mea kahiko, a me ka mea hou, ʻO nā mea aʻu i waiho ai nou, e kaʻu mea i aloha ai.