KE MELE A SOLOMONA 4 - Ka Baibala Hemolele

MOKUNA IV.

¹ ¶ “Aia hoʻi, he nani kou, e kaʻu mea i aloha ai aia hoʻi, he nani kou; ʻO kou mau maka, ua like me nā maka manu nūnū, I loko o kou pale; Ua like kou lauoho me ko ka poʻe kao, I ko lākou noho ʻana ma ka mauna ʻo Gileada.

² “Ua like kou mau niho me ka poʻe hipa i ʻako ʻia, E hele mai ana, mai ka ʻauʻau ʻana mai; Ua hānau pālua lākou a pau, ʻAʻohe mea pā ma waena o lākou a pau.

³ “Ua like kou mau lehelehe me ke kaula ʻulaʻula, A ua maikaʻi kāu ʻōlelo ʻana; E like me ka ʻāpana pomeraite, pēlā kou mau maka, I loko o kou pale.

⁴ “ʻO kou ʻāʻī, ua like ia me ka hale kiaʻi o Dāvida, I kūkulu ʻia ai i hale kāhiko kaua. Ua kau lākou ma laila i hoʻokahi tausani pale kaua; He mau pale kaua lākou a pau no ka poʻe koa.

⁵ “ʻO kou mau waiū, ua like ia me nā ʻanetelope i hānau pālua ʻia, E ʻai ana ma waena o nā līlia.

⁶ “A i ka wā ʻoluʻolu o ka lā, a ʻauheʻe nā aka, E hele au i ka mauna mura, a i ka puʻu libano.

⁷ ¶ “He nani loa kou a pau, e kaʻu mea i aloha ai, ʻAʻole ou wahi kīnā iki.

⁸ “E hele pū me aʻu, mai Lebanona mai, e kaʻu wahine, Me aʻu pū, mai Lebanona mai, E nānā mai ka piko mai o ʻAmana, Mai ka piko mai o Sinera, a me Heremona, Mai ka lua mai o nā liona, A mai ka mauna mai o nā leopadi.

⁹ “Ua hoʻoʻeha mai ʻoe i koʻu naʻau, e koʻu kaikuahine, e kaʻu wahine; Ua hoʻoʻeha mai ʻoe i koʻu naʻau me kekahi o kou mau maka, Me kekahi lei hoʻi o kou ʻāʻī.

¹⁰ “Nani kou aloha, e koʻu kaikuahine, e kaʻu wahine! Maikaʻi kou aloha ma mua o ka waina, A me ke ʻala o kou mea kāhinu, Ma mua o nā mea ʻala a pau loa.

¹¹ “ʻO kou lehelehe, e kaʻu wahine, ua hāʻule ka meli ma laila iho; Aia ma lalo iho o kou elelo, ka meli a me ka waiū; A ʻo ke ʻala o kou kapa, Ua like ia me ke ʻala o Lebanona.

¹² “ʻO koʻu kaikuahine, ʻo kaʻu wahine, he kīhāpai ia i paʻa i ka pā, He kiʻo wai i uhi ʻia, he pūnāwai hoʻi i kāpili ʻia.

¹³ “ʻO kou mau kawowo, ʻo ke kīhāpai pomeraite nō ia me nā hua ʻono, ʻO ke kūpero me ka naredo;

¹⁴ “ʻO kā nā naredo, a me ke keroko, a me ke kalamo, a me ke kinemona, Me nā lāʻau ʻala a pau, ʻo ka mura a me ka ʻaloe, Me nā mea ʻala maikaʻi a pau.

¹⁵ “ʻO ka pūnāwai o nā kīhāpai, ʻo ka luawai o ka wai ola, A me nā waikahe mai Lebanona mai.”

¹⁶ ¶ “E ala mai, e ka makani kūkulu ʻākau, E ka makani kūkulu hema, e hele mai; E pā mai i koʻu kīhāpai i moani aku kona mea ʻala. E komo mai, ʻo kaʻu mea i aloha ai i loko o kona kīhāpai, E ʻai ia i ka hua o kona kīhāpai.”