KE MELE A SOLOMONA 3 - Ka Baibala Hemolele

MOKUNA III.

¹ ¶ “Ma luna o koʻu wahi moe, i ka pō, Ua ʻimi au i kaʻu mea i aloha ai; ʻImi au iā ia, ʻaʻole naʻe i loaʻa.

² ‘E kū au i luna, ʻānō, e hele a puni ke kūlanakauhale, Ma nā alanui, a me nā wahi ākea, E ʻimi i ka mea a koʻu ʻuhane i aloha ai.’ Ua ʻimi au iā ia, ʻaʻole naʻe i loaʻa.

³ “Ua loaʻa au i ka poʻe kiaʻi, Ka poʻe hele a puni ke kūlanakauhale; ʻĪ akula au, ‘Ua ʻike anei ʻoukou i kaʻu mea i aloha ai?’

⁴ “ʻAʻole liʻuliʻu koʻu hele ʻana mai o lākou aku, A loaʻa mai iaʻu ka mea a koʻu ʻuhane i aloha ai; Ua lālau au iā ia, ʻaʻole naʻe e hoʻokuʻu aku; A hoʻokomo au iā ia i loko o ka hale o koʻu makuahine, A i loko o ke keʻena o ka mea nāna au i hānau mai.”

⁵ ¶ “Ke kauoha aku nei au iā ʻoukou, e nā kaikamāhine o Ierusalema, Ma nā ʻanetelope a me nā dia o ke kula, E hoʻoluliluli ʻole aku ʻoukou, a e hoʻāla ʻole i kaʻu mea i aloha ai, a ala wale mai ia.”

⁶ ¶ “ʻO wai kēia e hōʻea mai ana mai ka wao nahele mai, E like me nā pūnohu uahi? Ua moani mai kona mura, a me kona libano, A me nā mea ʻala a pau a ka mea kālepa.

⁷ “Aia hoʻi, ʻo kona wahi e moe ai, no Solomona ia, He kanaono kānaka koa e kū ana a puni ia, He poʻe ikaika o kā ʻIseraʻela.

⁸ “Ua lālau lākou a pau i nā pahi kaua, He poʻe akamai lākou i ke kaua; Aia nō ka pahi a kēlā mea kēia mea ma kona ʻūhā, No ka makaʻu i ka pō.

⁹ “Hana ihola ke aliʻi ʻo Solomona i hale ʻauamo nona, I ka lāʻau o Lebanona.

¹⁰ “Hana ihola ʻo ia i nā kia he kālā; A ʻo ke kino, hana ihola i ke gula; ʻO ka noho ona, he mea ʻulaʻula ia; Ua kīpapa ʻia kona wālua i ke aloha, No nā kaikamāhine mai o Ierusalema.

¹¹ “E puka i waho, e nā kaikamāhine o Ziona, a e ʻike i ke aliʻi iā Solomona, Me kona pāpale aliʻi, ka mea a kona makuahine i kau ma luna ona, I kona lā i mare ʻia ai, i ka lā i ʻoliʻoli ai kona naʻau.”