KE MELE A SOLOMONA 2 - Ka Baibala Hemolele

MOKUNA II.

¹ ¶ “ʻO wau nō ka rose o Sārona, A me ka līlia o nā awāwa.”

² ¶ “E like me ka līlia ma waena o nā kākalaioa, Pēlā nō kaʻu mea i aloha ai ma waena o nā kaikamāhine.”

³ ¶ “E like me ka lāʻau ʻōhiʻa ma waena o nā lāʻau o ka nāhelehele, Pēlā kaʻu mea i aloha ai ma waena o nā keiki kāne; Ua noho iho au ma lalo o kona malu me ka ʻoluʻolu, A ua ʻono kona hua i kuʻu ʻai ʻana.

⁴ “Ua hoʻokomo mai ʻo ia iaʻu i loko o ka hale ʻaha inu, A ʻo kona hae ma luna iho oʻu, he aloha nō ia.

⁵ “E hōʻoluʻolu mai iaʻu i ka paʻi hua waina, E hānai mai hoʻi iaʻu i ka hua ʻōhiʻa; No ka mea, ua maʻi au i ke aloha.

⁶ “Aia kona lima hema ma lalo iho o koʻu poʻo, ʻO kona lima ʻākau hoʻi, ua ʻapo mai iaʻu.”

⁷ ¶ “Ke kauoha aku nei au iā ʻoukou, e nā kaikamāhine o Ierusalema, Ma nā ʻanetelope a me nā dia o ke kula, E hoʻoluliluli ʻole aku ʻoukou, a e hoʻāla ʻole aku i kaʻu mea i aloha ai, a ala wale mai ia.”

⁸ ¶ “He leo kā, no kaʻu mea i aloha ai Aia hoʻi, e hiki mai ana ia, E lele ana ma luna o nā mauna, E lēhai ana hoʻi ma luna o nā puʻu.

⁹ “Ua like kaʻu mea i aloha ai, me ka ʻanetelope, A me ka dia keiki hoʻi; Aia kā, kū ihola ʻo ia ma hope o ko mākou pā, E nānā ana ma nā puka makani, E mākaʻikaʻi ana ma nā puka ʻōlepelepe.

¹⁰ ¶ “ʻŌlelo maila kaʻu mea i aloha ai, ʻī mai iaʻu, ‘E kaʻu mea i aloha ai, e koʻu mea nani, e kū aʻe, a e hele mai ʻoe.

¹¹ ‘No ka mea, aia hoʻi, ua hala ka hoʻoilo, Ua pau ka ua, a ua mālie;

¹² ‘Ua ʻike ʻia mai nā pua ma ka honua; Ua hiki mai ka wā e ʻoki ai, Ua lohe ʻia hoʻi ka leo o ke kuhukukū ma ko mākou ʻāina;

¹³ ‘ʻO ka lāʻau fiku ua hua mai ia i kona hua ʻōpiopio, Ua ʻaʻala mai ka pua o ka waina. E kaʻu mea i aloha ai, e koʻu mea maikaʻi, e ala, a e hele mai ʻoe.’”

¹⁴ ¶ “E koʻu nūnū, ma nā wahi malu o ka pōhaku, a me nā wahi hūnā ʻia o ka pali, E ʻae mai e ʻike au i kou helehelena. A e lohe hoʻi i kou leo; No ka mea, ua ʻoluʻolu kou leo, a ʻo kou helehelena, ua maikaʻi nō ia.”

¹⁵ ¶ “E hopu aku no mākou i nā ʻalopeke, I nā ʻalopeke liʻiliʻi, nā mea i ʻino ai nā māla waina; No ka mea, ua pua mai ko kākou māla waina.”

¹⁶ ¶ “Noʻu nō kaʻu mea i aloha ai, A nona hoʻi au; E ʻai ana ʻo ia ma waena o nā līlia.

¹⁷ “A i ka wā ʻoluʻolu o ka lā, a ʻauheʻe nā aka, E huli ʻoe, e kaʻu mea i aloha ai, A lilo ʻoe i ʻanetelope, A i dia keiki paha ma luna o nā mauna palipali.”