KE KAHUNA 7 - Ka Baibala Hemolele

1 No ka inoa maikaʻi. 11 No ka noʻonoʻo, ka hoʻomanawanui a me ka naʻauao.

MOKUNA VII.

¹ ¶ Ua ʻoi aku ka inoa maikaʻi ma mua o ka mea poni maikaʻi, A ʻo ka lā make ma mua o ka lā i hānau ai.

² Ua ʻoi aku ka maikaʻi o ka hele ʻana i ka hale kanikau Ma mua o ka hele ʻana i ka hale ʻahaʻaina; No ka mea, ma laila ka hopena o nā kānaka a pau, A e hoʻopili ke kanaka ola ia mea i kona naʻau iho.

³ Ua ʻoi aku ka maikaʻi o ka uē ʻana ma mua o ka ʻakaʻaka; No ka mea, ma ka ʻinoʻino o ka maka, e maikaʻi ai ka naʻau.

⁴ ʻO ka naʻau o ka mea naʻauao, aia nō ia ma ka hale kanikau; Akā hoʻi, ʻo ka naʻau o ka mea naʻaupō, aia nō ia ma ka hale pāʻani.

⁵ Ua ʻoi aku ka maikaʻi o ka lohe ʻana i ka ʻōlelo aʻo a ka poʻe naʻauao, Ma mua o ko ke kanaka lohe ʻana i ke mele leʻa a ka poʻe naʻaupō.

⁶ No ka mea, e like me ka paʻapaʻaʻina o nā kākalaioa ma lalo iho o ka ipu hao, Pēlā nō ka ʻakaʻaka ʻana o ka mea naʻaupō. He mea lapuwale hoʻi kēia.

⁷ No ka mea, ʻo ka hoʻoluhi, ʻo ia ka mea e pupule ai ka mea naʻauao; A ʻo ke kīpē he mea ia e lolelua ai ka naʻau.

⁸ Ua ʻoi aku ka maikaʻi o ka hope o kekahi mea ma mua o ka hoʻomaka ʻana; A ʻo ka mea naʻau hoʻomanawanui ma mua o ka mea hoʻokiʻekiʻe.

⁹ Mai wikiwiki kou naʻau, e huhū aku; No ka mea, ʻo ka huhū, aia nō ia ma ka naʻau o ka poʻe naʻaupō.

¹⁰ Mai ʻōlelo aʻe ʻoe, “No ke aha lā i ʻoi aku ai ka maikaʻi o nā lā kahiko ma mua o kēia mau lā?” No ka mea, ʻaʻole i naʻauao kāu nīnau ʻana mai pēlā.

¹¹ Ua maikaʻi ka naʻauao me ka waiwai hoʻoili, ʻO ia hoʻi ka mea e pono ai nā mea i ʻike i ka lā.

¹² No ka mea, ʻo ka naʻauao, ʻo ia ka mea e malu ai, a ʻo ke kālā ʻo ia hoʻi kekahi mea e malu ai; Akā, eia ka maikaʻi o ka ʻike, ʻo ka naʻauao, ʻo ia ka mea e ola ai ka poʻe nona ia.

¹³ E noʻonoʻo ʻoe i ka hana a ke Akua i hana ai; No ka mea, ʻo wai ka mea e hiki ai ke hoʻopololei i ka mea āna i hana ai a kekeʻe?

¹⁴ I ka lā pōmaikaʻi e ʻoliʻoli ai ʻoe, A i ka lā pōpilikia e noʻonoʻo ai. Ua hoʻonoho ke Akua i kekahi e kū pono i kekahi, I loaʻa ʻole ai i ke kanaka kekahi mea e hiki mai ana ma hope ona.

¹⁵ ¶ Ua ʻike au i kēia mau mea a pau i nā lā o kou noho lapuwale ʻana; aia nō ke kanaka hoʻopono e make ana i kona pono iho; a eia nō ka mea hewa e hoʻolōʻihi ana i kona mau lā i loko o kona hewa.

¹⁶ Mai hoʻonui i kou pono, ʻaʻole hoʻi ʻoe e hoʻomāhuahua i kou naʻauao; no ke aha lā ʻoe e hoʻomake iā ʻoe iho?

¹⁷ Mai hoʻonui ʻoe i kou hewa, ʻaʻole hoʻi e noho naʻaupō; no ke aha lā ʻoe e make ai ma mua o kou manawa?

¹⁸ He mea maikaʻi nou e lālau i kēlā, ʻaʻole hoʻi e hoʻokuʻu i kēia mai kou lima aku; no ka mea ʻo ka mea i makaʻu i ke Akua, ʻo ia ka mea e puka, mai ia mau mea a pau.

¹⁹ ¶ ʻO ka naʻauao ka mea e ikaika ai ka mea naʻauao ma mua o nā kānaka koʻikoʻi he ʻumi i loko o ke kūlanakauhale.

²⁰ No ka mea, ʻaʻohe kanaka pono ma ka honua, nāna e hana maikaʻi, me ka hana hewa ʻole.

²¹ Mai manaʻo hoʻi ʻoe i nā ʻōlelo a pau loa i ʻōlelo ʻia, o lohe auaneʻi ʻoe i kāu kauā e hōʻino ana iā ʻoe.

²² No ka mea, ua ʻike pinepine kou naʻau iho, ua hōʻino ʻoe iā haʻi.

²³ ¶ Ua hoʻāʻo ihola au i kēia mau mea a pau me ka naʻauao. ʻĪ ihola au, “E lilo auaneʻi au i kanaka naʻauao”; akā hoʻi, ua mamao loa ia mea mai oʻu aku.

²⁴ ʻO ka mea ma kahi lōʻihi aku, a hohonu loa hoʻi, ʻo wai ka mea e loaʻa ai?

²⁵ Ua hāʻawi au i koʻu naʻau e ʻike, a e huli, a e ʻimi hoʻi i ka naʻauao, a me ke ʻano o nā mea, a e ʻike hoʻi i ka hewa o ka naʻaupō, a ʻo ka noho lapuwale, a me ka ʻuhaʻuha.

²⁶ A ua loaʻa mai iaʻu kēia, ʻo ka wahine nona ka naʻau e hoʻohihia ai, a e hoʻohei ai, nona hoʻi nā lima e paʻa ai me he kaula lā, ua ʻoi aku kona ʻawaʻawa ma mua o ka make; ʻo ka mea maikaʻi i mua o ke Akua e pakele nō ia mai ona aku lā; akā, ʻo ka mea hewa, e hihia auaneʻi ʻo ia iā ia.

²⁷ ¶ “Aia hoʻi! Ua loaʻa iaʻu kēia,” wahi a ke kahuna, “ma ka helu pākahi ʻana nō e loaʻa mai ai ka huina.

²⁸ “Ka mea a koʻu ʻuhane i ʻimi ai, ʻaʻole naʻe i loaʻa; hoʻokahi kanaka ma waena o kekahi tausani ua loaʻa mai iaʻu; akā, ʻo ka wahine ma waena o kēia poʻe a pau loa, ʻaʻole i loaʻa.

²⁹ “Aia hoʻi, eia ka mea i loaʻa mai iaʻu; hana ihola ke Akua i ke kanaka i mea pololei; akā hoʻi, ua ʻimi ʻo ia i nā mea kekeʻe he nui wale.”