KE KAHUNA 6 - Ka Baibala Hemolele

1 Ka lapuwale o ka waiwai me ka manaʻo ʻole e mālama pono ia mea.

MOKUNA VI.

¹ ¶ Aia nō ka mea pono ʻole aʻu i ʻike ai ma lalo iho o ka lā, a he mea nui ia ma luna o nā kānaka.

² ʻO ke kanaka ka mea a ke Akua i hāʻawi mai ai i ka waiwai nona, a me ka lako me ka hanohano; ʻaʻole nele iki kona ʻuhane i nā mea āna e makemake ai; akā hoʻi, ʻaʻole i ʻae mai ke Akua e ʻai ia i kēia mau mea; akā, ua ʻai ʻia kāna e ka malihini. He mea lapuwale kēia, a he mea ʻino hoʻi.

³ Inā i loaʻa i ke kanaka nā keiki hoʻokahi haneri, a ola ia i nā makahiki he nui loa, ʻaʻole ʻokana mai nā lā o kona mau makahiki, ʻaʻole naʻe i māʻona kona ʻuhane i ka maikaʻi, ʻaʻole hoʻi ona wahi e kanu ʻia ai; ke haʻi aku nei au, “Ua ʻoi aku ka maikaʻi o ke keiki ʻōʻili wale i kona;

⁴ no ka mea, ua puka mai ʻo ia ma ka lapuwale, a hele akula ia ma ka pouli, a ua uhi ʻia kona inoa i ka pouli.

⁵ “ʻAʻole hoʻi ia i nānā i ka lā, ʻaʻole ʻo ia i ʻike iki, ua ʻoi aku ko ia nei ʻoluʻolu i ko ia lā.

⁶ “ʻO ia, inā e ola ia i nā makahiki hoʻokahi tausani ke pālua ʻia, ʻaʻole hoʻi ʻo ia i ʻike i ka maikaʻi. ʻAʻole anei e hele nā mea a pau i kahi hoʻokahi?”

⁷ ¶ ʻO nā hana a pau a ke kanaka, na kona waha iho nō ia, ʻaʻole naʻe i māʻona kona ʻōpū.

⁸ Ma nā mea hea i ʻoi aku ai ka mea naʻauao ma mua o ka mea naʻaupō? He aha ka mea i loaʻa i ka ʻilihune, ka mea i ʻike i ka hele ʻana i mua o ka poʻe ola?

⁹ Ua ʻoi aku ka maikaʻi o ka ʻike maka ʻana ma mua o ka hele ʻana aku o ka manaʻo. He mea lapuwale kēia, a me ka luhi hewa.

¹⁰ ¶ ʻO ka mea i hala aku nei, ua kapa ʻia kona inoa, a ʻo ke kanaka hoʻi ua ʻike ʻia ʻo ia, ʻaʻole hiki iā ia ke kūʻē i ka mea mana ma mua ona.

¹¹ No laila, ua māhuahua ka lapuwale ma nā mea he nui loa; a pehea lā e pono ai ke kanaka?

¹² No ka mea, ʻo wai ka mea i ʻike i ka mea e pono ai ke kanaka i kona ola ʻana, i nā lā a pau o kona ola lapuwale ʻana i hoʻopau ai me he aka lā; a ʻo wai hoʻi ka mea nāna e haʻi aku i ke kanaka i nā mea e hiki mai ana ma hope ona ma lalo iho o ka lā?