KE KAHUNA 5 - Ka Baibala Hemolele

1 Ua hoʻoikaika ʻia nā kānaka e mālama iā lākou iho ma ka luakini, a ma nā wahi ʻē aʻe nō hoʻi.

MOKUNA V.

¹ ¶ E mālama ʻoe i kou wāwae i kou hele ʻana i ka hale o ke Akua, e hoʻolohe koke, ʻaʻole hoʻi ʻoe e hāʻawi i ka mōhai a ka poʻe naʻaupō; no ka mea, ʻaʻole lākou i manaʻo pono, ua hana hewa lākou.

² Mai ʻōlelo wawe kou waha, ʻaʻole hoʻi e wikiwiki kou naʻau e hoʻopuka aku i kekahi mea i mua o ke Akua; no ka mea, aia ke Akua ma ka lani; akā, eia nō ʻoe ma ka honua nei, no ia mea, e hoʻoʻuʻuku i kāu mau ʻōlelo.

³ No ka mea, no ka nui o ka hana, e hiki mai ai ka moeʻuhane; a ʻo ka leo o ka naʻaupō, ua ʻike ʻia nō ka lehulehu o kāna ʻōlelo ʻana.

⁴ Inā e ʻōlelo ʻoe e hoʻohiki i ke Akua, mai hoʻohākālia ʻoe i ka hoʻokō aku; no ka mea, ʻaʻole ʻoluʻolu ke Akua, i ka poʻe naʻaupō; e hoʻokō aku ʻoe i kāu mea i hoʻohiki ai.

⁵ Ua ʻoi aku kou maikaʻi ke hoʻohiki ʻole, ma mua o kou maikaʻi ke hoʻohiki ʻoe, ʻaʻole hoʻi e hoʻokō aku.

⁶ E mālama ʻoe i kou waha i ʻole e hoʻohihia ai kou kino; mai ʻōlelo ʻoe i mua o ke kahuna, He kuhi hewa ia. No ke aha lā e huhū mai ai ke Akua i kou leo, a e hoʻohiolo i ka hana a kou mau lima?

⁷ No ka mea, ma ka lehulehu o nā moeʻuhane, a me nā ʻōlelo he nui wale, aia nā mea lapuwale. Akā hoʻi, e makaʻu aku ʻoe i ke Akua.

⁸ ¶ I kou ʻike ʻana i ka hoʻoluhi ʻia o ka poʻe ʻilihune, a me ka hoʻokahuli ʻana i ka ʻoiaʻiʻo, a me ka pono ma ka ʻāina, mai kāhāhā kou naʻau i kēia; no ka mea, ʻo ka mea kiʻekiʻe o nā mea kiʻekiʻe a pau, ʻo ia ka mea i ʻike mai, a aia hoʻi nā mea kiʻekiʻe ma luna o lākou.

⁹ ʻO ka hua o ka honua, na nā mea ia a pau; a ʻo ke aliʻi pū kekahi i hānai ʻia e ka ʻāina.

¹⁰ ¶ ʻO ka mea makemake i ke kālā, ʻaʻole pau kona ʻono i ke kālā; a ʻo ka mea makemake i nā mea nui, ʻaʻole ia e ana i ka nui o ka waiwai. He mea lapuwale kēia.

¹¹ I ka māhuahua ʻana o nā mea maikaʻi, māhuahua nō hoʻi ka poʻe e hoʻopau ana ia mau mea; a he aha ka pono i loaʻa mai i ka poʻe nāna ia mau mea? ʻO ka ʻike wale ʻana o ko lākou mau maka.

¹² Ua leʻa ka hiamoe o ka poʻe hana, ke ʻai ʻuʻuku lākou a ke ʻai nui hoʻi; akā, ʻo ka māʻona nui o ka mea waiwai, he mea ia e leʻa ʻole ai kona hiamoe ʻana.

¹³ ¶ Eia kekahi mea pono ʻole aʻu i ʻike ai ma lalo iho o ka lā, ʻo ka waiwai i mālama ʻia i mea e pōʻino ai ka poʻe nona ia.

¹⁴ Akā, e pau auaneʻi kēia waiwai i ka hana pono ʻole; a ua hānau aku kāna keiki; akā, ʻaʻohe mea ma kona lima.

¹⁵ E like me kona puka ʻana mai, mai ka ʻōpū mai o kona makuahine, pēlā nō ia e hoʻi hou aku ai me ke kapa ʻole, e like me kona puka ʻana mai; ʻaʻole hiki iā ia ke lawe aku ma kona lima i kekahi mea āna i hana ai.

¹⁶ Eia ka mea pono ʻole; e like loa me kona puka ʻana mai, pēlā nō kona hele ʻana aku. He aha kona pono i kāna hana ʻana no ka makani?

¹⁷ A ʻo kona mau lā a pau, ua ʻai ʻo ia i loko o ka pouli, a i kona wā maʻi, ua kaumaha ʻo ia no ka huhū.

¹⁸ ¶ Aia hoʻi, ka mea aʻu i ʻike ai, he mea maikaʻi kēia, a he nani hoʻi, e ʻai kekahi, a e inu hoʻi, a e ʻoliʻoli i ka hana a pau āna i hana ai ma lalo iho o ka lā, i nā lā a pau loa o kona ola ʻana a ke Akua i hāʻawi mai ai nāna; no ka mea, ʻo ia kona haʻawina.

¹⁹ A ʻo kēlā kanaka, kēia kanaka, ka mea a ke Akua i hāʻawi mai ai i ka waiwai a me ka lako, a ua ʻae mai hoʻi ʻo ia i kāna ʻai ʻana, a me kona lawe ʻana i kona haʻawina, a i kona ʻoliʻoli ʻana i ka hana āna i hana ai. ʻO ia ka mea a ke Akua i hāʻawi mai ai.

²⁰ ʻAʻole ia e hoʻomanaʻo nui i nā lā o kona ola ʻana; no ka mea, ua ʻae mai ke Akua i ka ʻoliʻoli o kona naʻau.