KE KAHUNA 4 - Ka Baibala Hemolele

1 No ka hoʻoluhi ʻia o nā kānaka. 4 No ka huāhuā. 5 No ka moloā, a me ka makeʻe waiwai.

MOKUNA IV.

¹ ¶ A laila, hāliu au a ʻike akula i nā mea luhi i hana ʻia ma lalo iho o ka lā, aia hoʻi, nā waimaka o ka poʻe i hoʻoluhi ʻia, ʻaʻohe mea nāna lākou e kōkua mai; a ma ka ʻaoʻao o ka poʻe nāna lākou i hoʻoluhi, he ikaika; akā, ʻaʻohe mea nāna lākou e kōkua mai.

² No ia mea, hoʻomaikaʻi akula au i ka poʻe make, ka poʻe i make i ka wā i hala aku nei, ma mua o ka poʻe ola, ka poʻe ola i kēia wā e noho nei kākou.

³ ʻO ia hoʻi, ua ʻoi aku ma mua o lāua a ʻelua ka maikaʻi o ka mea i hānau ʻole ʻia, ka mea i ʻike ʻole i ka hana ʻino i hana ʻia ma lalo iho o ka lā.

⁴ ¶ Ua ʻike au i nā mea luhi a pau, a me nā hana pololei a pau, aia hoʻi, no ia mau mea, ua huāhuā ʻia mai ke kanaka e kona hoalauna. He mea lapuwale kēia a me ka luhi hewa.

⁵ Ua hoʻokuʻi maila ka mea naʻaupō i kona mau lima, a ʻai ihola i kona ʻiʻo iho.

⁶ Ua ʻoi aku ka piha ʻana o ka lima hoʻokahi me ka noho ʻoluʻolu ma mua o ko nā lima ʻelua me ka hana kaumaha, a me ka luhi hewa.

⁷ ¶ A laila, hāliu hou aʻela au, a ʻike i ka mea lapuwale ma lalo iho o ka lā.

⁸ Aia he mea hoʻokahi, ʻaʻole ona lua, ʻaʻole āna keiki, ʻaʻole ona hoahānau; akā, ʻo kāna hana ʻana, ʻaʻole e pau, ʻaʻole pili iki kona mau maka i ka nānā i ka waiwai, ʻaʻole ia i nīnau iho, “No wai koʻu e hana nei, a i hoʻonele i koʻu ʻuhane i ka maikaʻi?” He mea lapuwale kēia, a he mea luhi loa nō hoʻi.

⁹ ¶ Ua ʻoi aku ka maikaʻi o nā mea ʻelua ma mua o ka mea hoʻokahi; no ka mea, iā lāua ka uku maikaʻi no kā lāua hana ʻana.

¹⁰ No ka mea, inā e hāʻule kekahi, e hoʻāla kekahi i kona hoa; akā, auē hoʻi ka mea hoʻokahi i kona hāʻule ʻana; no ka mea, ʻaʻohe mea nāna ia e hoʻāla mai.

¹¹ Inā e moe pū nā mea ʻelua e pumehana nō lāua; akā hoʻi, pehea e mehana ai ka mea hoʻokahi?

¹² Inā e hana ʻeha ʻia mai kekahi, e hiki nō i nā mea ʻelua ke lanakila ma luna o ia mea, a ʻo ke kaula kā ʻakolu, ʻaʻole ia e moku koke.

¹³ ¶ ʻOi aku ka maikaʻi o ke keiki ʻilihune me ka naʻauao, ma mua o ke aliʻi ʻelemakule me ka naʻaupō, ka mea hiki ʻole ke aʻo ʻia mai.

¹⁴ No ka mea, puka mai ia mai ka hale hoʻoluhi e aliʻi ai; akā, ʻo ka mea i hānau aliʻi ʻia ua lilo ia i mea ʻilihune.

¹⁵ ʻIke ihola au i ka poʻe ola a pau e hele ana ma lalo iho o ka lā, me ka lua o ke keiki, i kū i kona hakahaka.

¹⁶ ʻAʻole pau i ka helu ʻia nā kānaka, ka poʻe ma mua o lākou; a ʻo ka poʻe ma hope, ʻaʻole lākou ʻoliʻoli iā ia. He mea lapuwale kēia, a me ka luhi hewa.