KE KAHUNA 3 - Ka Baibala Hemolele

1 He manawa no nā hana a pau. 19 Hoʻokahi hopena o nā kānaka a me nā holoholona.

MOKUNA III.

¹ ¶ Aia he manawa no nā mea a pau, a he wā hoʻi no nā hana a pau, ma lalo iho o ka lani.

² He wā e hānau ai, A he wā hoʻi e make ai; He wā e kanu ai, A he wā hoʻi e uhuki ai i ka mea i kanu ʻia;

³ He wā e pepehi ai, A he wā hoʻi e hoʻōla ai; He wā e wāwahi ai, A he wā hoʻi e kūkulu iho ai;

⁴ He wā e uē ai, A he wā hoʻi e ʻakaʻaka ai; He wā e kanikau ai, A he wā hoʻi e haʻa ai;

⁵ He wā e hoʻolei aku ai i nā pōhaku, A he wā hoʻi e hōʻiliʻili ai i nā pōhaku; He wā e ʻapo ai, A he wā e ʻapo ʻole ai.

⁶ He wā e ʻimi ai, A he wā hoʻi e lilo aku ai; He wā e mālama ai, A he wā hoʻi e hoʻolei wale aku ai.

⁷ He wā e haehae aku ai, A he wā hoʻi e humuhumu iho ai; He wā e hāmau ai, A he wā hoʻi e ʻōlelo ai.

⁸ He wā e aloha aku ai, A he wā hoʻi e inaina aku ai; He wā kaua, A he wā maluhia.

⁹ ¶ He aha ka uku a ka mea hana i ka mea āna i hana ai?

¹⁰ Ua ʻike au i ka hana a ke Akua i hāʻawi mai ai i nā keiki a kānaka e hana ai.

¹¹ Ua hana maila ʻo ia i nā mea a pau he maikaʻi i kona manawa; a hoʻokomo nō hoʻi ʻo ia i ko ke ao nei i loko o ko lākou mau naʻau, i ʻike ʻole ke kanaka i ka hana a ke Akua i hana ai, mai ka mua a hiki i ka hope.

¹² ¶ Ua ʻike au, ʻaʻohe mea maikaʻi i loko o ia mau mea, ke ʻole e hauʻoli [ke kanaka,] a e hana maikaʻi i kona ola ʻana.

¹³ A ʻo kēlā kanaka kēia kanaka e ʻai, a e inu hoʻi, a e ʻike i ka maikaʻi o kāna hana a pau, ʻo ia ka haʻawina a ke Akua.

¹⁴ Ua ʻike au, ʻo nā mea a pau a ke Akua i hana ai, e mau loa nō ia, ʻaʻole e hiki i kekahi ke hoʻonui, ʻaʻole e hiki i kekahi ke hoʻoemi; a na ke Akua nō i hana mai i makaʻu lākou i mua ona.

¹⁵ ʻO ka mea ma mua, ʻo ia ka mea e noho nei, a ʻo ka mea e hiki mai ana, ʻo ia nā mea ma mua aku; a ʻimi mai ke Akua i ke ʻano o nā mea i hala aku nei.

¹⁶ A ʻike akula au ma lalo iho o ka lā i kahi e ʻahaʻōlelo ai, a ma laila nō ka hewa; a i kahi o ka pono, a ma laila hoʻi ka hana ʻino.

¹⁷ ʻĪ ihola au i loko o koʻu naʻau, “E hoʻokolokolo ana ke Akua i ka poʻe pono, a me ka poʻe hewa; no ka mea, ʻo ia ka wā no nā mea a pau a me nā hana a pau.”

¹⁸ ʻĪ ihola au i loko o koʻu naʻau no nā keiki a kānaka, “I hoʻāʻo ke Akua iā lākou i ʻike lākou iā lākou iho, he poʻe holoholona.”

¹⁹ No ka mea, ʻo ka mea e hiki mai i nā keiki a kānaka, e hiki mai nō ia i nā holoholona, hoʻokahi mea iā lākou; e like me ka make ʻana o kēlā, pēlā nō ka make ʻana o kēia, hoʻokahi hanu iā lākou a pau; ʻaʻohe mea o ke kanaka i ʻoi aku ma mua o ka holoholona; no ka mea, ua pau nā mea i ka lapuwale.

²⁰ Ua hele lākou a pau i kahi hoʻokahi; no ka lepo mai lākou a pau, a e hoʻi hou aku ana lākou i ka lepo.

²¹ ʻO wai ka mea ʻike i ke ea o nā keiki a kānaka, ka mea i piʻi i luna, a me ke ea o nā holoholona ka mea i iho i lalo i ka honua?

²² No ia mea, ʻike ihola au, ʻaʻohe mea maikaʻi ʻē aʻe i ke kanaka, ʻo ka hauʻoli wale nō i kāna hana ʻana; no ka mea, ʻo ia kona haʻawina. A ʻo wai ka mea e hōʻike iā ia i ka mea e hiki mai ana ma hope ona?