KE KAHUNA 12 - Ka Baibala Hemolele

1 E pono ke hoʻomanaʻo i ke Akua i ka wā ʻōpiopio. 2 Nā mea e pōʻino ai ka poʻe ʻelemakule 13 Ka mea nui e pono ai.

MOKUNA XII.

¹ ¶ E hoʻomanaʻo ʻoe i kou Mea nāna i hana, i nā lā o kou noho ʻōpiopio ʻana; ʻoi hiki ʻole mai nā lā ʻino, a hoʻokokoke ʻole ʻia mai nā makahiki āu e ʻōlelo ai, “ʻAʻole oʻu ʻoluʻolu i kēia mau mea”;

² i ka wā i pouli ʻole ai ka lā, a me ka mālamalama, ʻo ka mahina hoʻi a me nā hōkū; a hoʻi ʻole mai nā ao ma hope o ka ua;

³ i ka lā i haʻalulu ai nā kiaʻi hale, a kūlou i lalo nā kānaka ikaika; a oki ka poʻe wili no ka hapa, a i pouli ai nā mea nānā ma nā puka makani;

⁴ a pani ʻia nā puka ma ke alanui, i ka wā i ʻuʻuku mai ai ka leo o ka wili ʻana; a e ala aʻe ʻo ia i ka leo o ka manu, a e hoʻohaʻahaʻa ʻia nā kaikamāhine leʻa i ke oli a pau.

⁵ A makaʻu lākou i nā mea kiʻekiʻe; aia hoʻi ma ke alanui nā mea e weliweli ai, ua hoʻopailua hoʻi ka lāʻau ʻalemona, a ʻo ka ʻūhini, he mea ia e kaumaha ai, a lilo nō hoʻi ka hua kepa i mea mikomiko ʻole; no ka mea, hele ke kanaka i kona hale mau, a hele ka poʻe kanikau ma nā alanui.

⁶ ʻOi moku ʻole ʻia ke kaula kālā, ʻaʻole hoʻi i nahā ke kīʻaha gula; ʻaʻole nahā ka bākeke ma ka pūnāwai, ʻaʻole hoʻi i nahā ke kaʻa ma ka luawai.

⁷ A laila, e hoʻi ka lepo i ka honua e like me ia ma mua, a ʻo ka ʻuhane, e hoʻi ia i ke Akua nāna ia i hāʻawi mai.

⁸ “Lapuwale o nā lapuwale,” wahi a ke Kahuna, “pau nā mea i ka lapuwale!”

⁹ ¶ Eia hoʻi kekahi, i ko ke Kahuna naʻauao ʻana, ua aʻo mau aku ʻo ia i nā kānaka; ua noʻonoʻo ʻo ia, a ʻimi, a hoʻoponopono hoʻi i nā ʻōlelo akamai he nui loa.

¹⁰ Ua ʻimi ihola ke Kahuna e loaʻa mai nā ʻōlelo ʻoluʻolu, a ʻo nā mea i kākau ʻia, he ʻōlelo pololei ia a me ka ʻoiaʻiʻo hoʻi.

¹¹ ¶ ʻO nā ʻōlelo a ka poʻe naʻauao, ua like ia me nā mea ʻoi, a me nā kui i mākia ʻia a paʻa e ka poʻe luna o ka ʻaha kanaka, nā mea i hāʻawi ʻia aku ai e ke Kahu hoʻokahi.

¹² Eia hoʻi kekahi, e ao ʻia mai ʻoe, e kaʻu keiki, e kēia mau mea; ʻo ka hana ʻana i nā buke he nui loa, he mea hope ʻole ia, a ʻo ka ʻimi nui i ka palapala, he mea ia e luhi ai ke kino.

¹³ ¶ E hoʻolohe ʻoe i ka hope o kēia mau mea a pau. E makaʻu i ke Akua, a e mālama i kona mau kānāwai; no ka mea, ʻo ia kā ke kanaka pono a pau.

¹⁴ No ka mea, e hoʻokomo ana ke Akua i nā hana a pau, a me nā mea a pau i hūnā ʻia i loko o ka hoʻokolokolo ʻia, inā paha he pono, inā paha he hewa.