KE KAHUNA 10 - Ka Baibala Hemolele

1 No ka naʻauao a me ka naʻaupō. 13 No ka hana ʻuhaʻuha. 19 No ka hana a nā aliʻi, a me ko lākou poʻe kānaka.

MOKUNA X.

¹ ¶ ʻO nā nalo make, he mea ia e pilau ai ka lāʻau hamo a ka mea hana lāʻau, pēlā nō ka hana ʻuhaʻuha iki ʻana, ka mea i manaʻo ʻia he naʻauao, a he hanohano hoʻi.

² ʻO ka naʻau o ka mea naʻauao, aia nō ia ma kona lima ʻākau; akā hoʻi, ʻo ka naʻau o ka mea naʻaupō, aia nō ia ma kona lima hema.

³ Aia hoʻi i ka hele ʻana o ka mea naʻaupō ma ke alanui, ua nalowale kona ʻike, a ua ʻī ihola ia no nā mea a pau, he naʻaupō ia.

⁴ Inā e kūʻē iā ʻoe ka manaʻo o ke aliʻi, mai haʻalele i kou wahi; no ka mea, ʻo ka noho mālie, ʻo ia ka mea e hōʻoluʻolu aku ai ka huhū nui.

⁵ ¶ Aia ka hewa aʻu i ʻike iho ai ma lalo iho o ka lā, e like me ka hewa i puka mai ai mai ke aliʻi mai.

⁶ Ua hoʻonoho ʻia ka naʻaupō ma nā wahi kiʻekiʻe, a ʻo ka mea waiwai, ua noho ʻo ia ma kahi haʻahaʻa.

⁷ Ua ʻike au i nā kauā ma luna o nā lio, a i nā aliʻi e hele wāwae ana ma ka honua, me he poʻe kauā lā.

⁸ ¶ ʻO ka mea i ʻeli i ka lua, e hāʻule auaneʻi ʻo ia i loko; a ʻo ka mea i wāwahi i ka pā, e nahu mai ka nahesa iā ia.

⁹ ʻO ka mea e uneune i nā pōhaku, e ʻeha auaneʻi ʻo ia iā lākou; a ʻo ka mea i kākā iho i ka wahie, e moku auaneʻi ia i laila.

¹⁰ Inā kūmūmū ka hao, ʻaʻole hoʻi ia e hoʻokala i kona maka, a laila pono ke hoʻonui i ka ikaika; akā, he pono ka naʻauao i mea e hoʻopōmaikaʻi ai.

¹¹ ʻOiaʻiʻo, e nahu mai ka nahesa ke hoʻowalewale ʻole ʻia mai; ʻaʻole hoʻi i ʻoi aku ka maikaʻi o ka mea holoholo ʻōlelo.

¹² ʻO nā ʻōlelo a ka waha o ka mea naʻauao, ua lokomaikaʻi nō; akā, ʻo nā lehelehe o ka mea naʻaupō, e ale auaneʻi iā ia iho.

¹³ ʻO ka mua o nā ʻōlelo o kona waha, he mea lapuwale ia; a ʻo ka hope o kona waha, he huhū kolohe nō ia.

¹⁴ Ua hoʻomāhuahua ka mea naʻaupō i kāna mau ʻōlelo; ʻaʻole naʻe i ʻike ke kanaka i nā mea e hiki mai ana; a ʻo nā mea e hiki mai ana ma hope ona, na wai e haʻi aku iā ia?

¹⁵ ʻO ka hana a ka poʻe naʻaupō, he mea ia e hoʻomāluhiluhi ai iā lākou; no ka mea, ʻaʻole ia i ʻike i ka hele i ke kūlanakauhale.

¹⁶ Auē ʻoe, e ka ʻāina, i ka wā i noho ai he keiki i aliʻi nou, a e ʻai ai hoʻi kou poʻe kaukaualiʻi i ke kakahiaka!

¹⁷ Pōmaikaʻi ʻoe, e ka ʻāina, i ka wā i noho ai ke keiki a nā aliʻi i aliʻi nou, a e ʻai ai kāu poʻe kaukaualiʻi i ka wā pono, no ka ikaika, ʻaʻole no ka ʻuhaʻuha.

¹⁸ No ka palaualelo, ua popopo nā kaola; a no ka moloā o nā lima, ua kulu ka hale.

¹⁹ ʻO ka ʻahaʻaina he mea ia e ʻakaʻaka ai, a ʻo ka waina, he mea ia e ʻoliʻoli ai; akā, ʻo ke kālā, he mea ia e hiki ai nā mea a pau.

²⁰ Mai hōʻino aku ʻoe i ke aliʻi, ʻaʻole hoʻi ma kou manaʻo; mai hōʻino aku hoʻi i ka poʻe waiwai i loko o kou keʻena moe; no ka mea, ʻo nā manu o ka lewa, e lawe aku lākou i ka leo, a ʻo nā mea ʻēheu, na lākou hoʻi e haʻi aku ia mea.