KE KAHUNA 1 - Ka Baibala Hemolele

1 ʻO ka lapuwale o nā mea a pau. 12 Ka noʻonoʻo ʻana o ke Kahuna ma nā mea a pau loa.

MOKUNA I.

¹ ¶ ʻO nā ʻōlelo a ke Kahuna, a ke keiki a Dāvida, ʻo ia ke aliʻi ma Ierusalema.

² “Lapuwale o nā lapuwale,” wahi a ke Kahuna; “Lapuwale o nā lapuwale, pau loa nā mea i ka lapuwale.”

³ ¶ He aha ka uku i ke kanaka i ka hana a pau āna I hana ai ma lalo iho o ka lā?

⁴ Hele akula kekahi hanauna, a hele maila kekahi hanauna; Akā, ua mau nō ka honua.

⁵ Puka mai ka lā, a napoʻo ka lā, A wikiwiki akula ia ma kona wahi i puka mai ai.

⁶ Puhi akula ka makani i ke kūkulu hema, A huli maila ia i ke kūkulu ʻākau; Huli aʻela ia i ʻō, a i ʻō; A hoʻi hou ka makani i kona wahi i puhi ai.

⁷ Kahe akula nā muliwai a pau i ke kai, ʻAʻole naʻe i piha ke kai; I kahi a lākou i kahe mai ai, Ma laila lākou e hoʻi hou aku ai.

⁸ He mea luhi nā ʻōlelo a pau, ʻAʻole hiki i ke kanaka ke haʻi aku; ʻAʻole i ana ka maka i ka ʻike ʻana, ʻAʻole hoʻi i piha ka pepeiao i ka lohe ʻana.

⁹ ʻO nā mea ma mua, ʻo ia nā mea e hiki mai ana; A ʻo nā mea i hana ʻia, ʻo ia nā mea e hana ʻia ma hope aku nei; ʻAʻohe mea hou ma lalo iho o ka lā.

¹⁰ No kekahi mea e hiki anei ke ʻōlelo mai, “Eiʻa! He mea hou kēia?” He mea nō ia i ka wā kahiko Ma mua loa o kākou.

¹¹ ʻAʻole i hoʻomanaʻo ʻia mai nā mea kahiko; A ʻo nā mea e hiki mai ana, ʻAʻole e hoʻomanaʻo ʻia ia mau mea E ka poʻe ma hope aku.

¹² ¶ ʻO wau ʻo ke Kahuna, ua noho au i aliʻi ma luna o kā ʻIseraʻela ma Ierusalema.

¹³ Ua hāʻawi au i koʻu naʻau e ʻimi, a e huli me ka noʻeau i nā mea a pau i hana ʻia ma lalo iho o ka lani. He mea kaumaha loa kēia a ke Akua i hāʻawi mai ai i nā keiki a kānaka e hana ai.

¹⁴ Ua ʻike au i nā mea a pau i hana ʻia ma lalo iho o ka lani, aia hoʻi, he mau mea lapuwale ia a pau a me ka luhi hewa.

¹⁵ ʻO nā mea kekeʻe, ʻaʻole ia e hoʻopololei ʻia; a ʻo ka mea nele, ʻaʻole hiki ke helu aku.

¹⁶ Ua kūkākūkā au me koʻu naʻau iho, a ʻī ihola, “Kā! Ua hoʻokiʻekiʻe ʻia aku au, a ua hoʻonui au i ka naʻauao ma mua o nā mea a pau ma Ierusalema; a ua hoʻomaopopo aku koʻu naʻau i ka noʻeau, a me ka ʻike.”

¹⁷ A hāʻawi au i koʻu naʻau e ʻike i ka naʻauao, a e ʻike nō hoʻi i ka ʻuhaʻuha, a me ka lapuwale; a ʻike ihola au, he mea luhi hewa ia.

¹⁸ No ka mea, ma ka naʻauao nui, ma laila ke kaumaha; a ʻo ka mea i hoʻonui i ka ʻike, hoʻonui nō ia i ka ʻeha.