KA BUKE O NĀ HALELŪ 9 - Ka Baibala Hemolele

HALELŪ IX.

I ka Luna Mele ma Muta Labena. He Halelū na Dāvida.

¹ ¶ E hoʻonani aku au iā ʻoe, e Iēhova, me koʻu naʻau a pau; E heluhelu aku au i kāu mau hana kupaianaha a pau.

² E ʻoliʻoli nō au, a e hauʻoli nō hoʻi iā ʻoe; E hoʻoleʻa aku hoʻi au i kou inoa, e ka Mea Kiʻekiʻe Loa.

³ ¶ I ka hoʻi hope ʻana o koʻu poʻe ʻenemi, E hāʻule nō lākou a make ma kou alo.

⁴ Ua hoʻopono mai ʻoe iaʻu, ua hoʻokō mai ʻoe i koʻu, Ua noho ʻoe ma ka noho aliʻi e hoʻopaʻi pololei ana.

⁵ Ua pāpā ʻoe i nā lāhui kanaka ʻē; Ua luku iho nō hoʻi ʻoe i ka poʻe hewa; Ua hōkai mau loa ʻoe i ko lākou inoa i ka wā pau ʻole.

⁶ A ʻo ka ʻenemi, ua pau ia i ka make mau loa; Ua pau nā kūlanakauhale iā ʻoe i ka luku ʻia; Ua lilo hoʻi ko lākou kaulana i ka make.

⁷ ¶ Akā, e mau loa ana nō ʻo Iēhova; Ua hoʻomākaukau ʻo ia i kona noho aliʻi no ka hoʻokolokolo ʻana.

⁸ E hoʻokolokolo mai nō ia i ko ke ao nei ma ka pono; E hoʻopaʻi mai nō ia i kānaka me ka ʻewaʻewa ʻole.

⁹ E lilo ana nō ʻo Iēhova i puʻuhonua no ka poʻe i hoʻoluhi hewa ʻia, I mea e pakele ai i ka manawa pōpilikia.

¹⁰ ʻO ka poʻe i ʻike i kou inoa e hilinaʻi aku lākou iā ʻoe; ʻO ka poʻe i ʻimi aku iā ʻoe, ʻaʻole ʻoe, e Iēhova, i haʻalele iā lākou.

¹¹ ¶ E hoʻoleʻa aku iā Iēhova i ka Mea e noho ana ma Ziona! E haʻi aku i waena o nā kānaka i kāna mau hana.

¹² A i ʻimi mai ʻo ia i ke koko e hoʻopaʻi mai, E manaʻo mai nō ia iā lākou; ʻAʻole ʻo ia i hoʻopoina i ka ʻulono ʻana a ka poʻe haʻahaʻa.

¹³ E aloha mai ʻoe iaʻu, e Iēhova; E manaʻo ʻoe i ka hōʻino ʻana mai o ka poʻe inaina mai iaʻu, ʻO ʻoe ka mea nāna i hoʻāla au mai ka puka mai o ka make;

¹⁴ I hōʻike aku au i kou nani a pau, Ma nā puka pā hale o ke kaikamahine a Ziona; E hauʻoli nō hoʻi au i kou ola.

¹⁵ Ua pohō i lalo ko nā ʻāina ʻē i ka lua a lākou i hana ai, I ka ʻupena a lākou i hūnā ai i hei ai ko lākou wāwae.

¹⁶ Ua ʻikea ʻo Iēhova, ua hana mai ia i ka pono; Ua punihei ka mea kolohe i ka hana a kona mau lima iho. Hikaiona. Sila.

¹⁷ ¶ E auhulihia ka poʻe hewa i lalo i ka malu o ka make, A me nā lāhui kanaka a pau i hoʻopoina i ke Akua.

¹⁸ Akā, ʻaʻole e hoʻopoina mau ʻia mai ka poʻe i hoʻoluhi ʻia, A ʻo ka manaʻolana o ka ʻilihune ʻaʻole loa ia e hoka.

¹⁹ E kū aʻe ʻoe, e Iēhova; mai lanakila kanaka; E hoʻokolokolo ʻia mai nā lāhui kanaka i mua o kou alo.

²⁰ E hoʻoweliweli mai ʻoe iā lākou, e Iēhova; I ʻike pono ko nā ʻāina, he mau kānaka wale nō lākou. Sila.