KA BUKE O NĀ HALELŪ 89 - Ka Baibala Hemolele

HALELŪ LXXXIX.

He Halelū na ʻEtana no ʻEzera.

¹ ¶ E hoʻokani mau loa aku au i ka lokomaikaʻi o Iēhova; Ma koʻu waha e hōʻike aku ai au i kou ʻoiaʻiʻo i kēlā hanauna, i kēia hanauna.

² No ka mea, ua ʻōlelo nō wau, “E hoʻopaʻa mau loa ʻia kou lokomaikaʻi; A e hoʻokumu nō hoʻi ʻoe i kou ʻoiaʻiʻo ma ka lani.”

³ “Ua hana au i berita me kou poʻe i wae ʻia, Ua hoʻohiki aku au no Dāvida, kaʻu kauā,

⁴ “E hoʻonoho paʻa loa wau i kāu poʻe mamo, A e hana nō hoʻi au i noho aliʻi nou no nā hanauna a pau.” Sila.

⁵ ¶ Na ka lani nō e hoʻoleʻa i kou mau mea mana, e Iēhova, I kou ʻoiaʻiʻo kekahi, ma ke anaina o ka poʻe pono.

⁶ No ka mea, ʻo wai lā ka mea ma ke aouli e kū like me Iēhova? I waena hoʻi o nā keiki a ka poʻe kiʻekiʻe, e hoʻohālike ʻia me Iēhova?

⁷ He Akua weliweli loa hoʻi ia ma ke anaina o ka poʻe pono; A he mea ia e hopohopo ai no ka poʻe a pau e noho hoʻopuni ana iā ia.

⁸ E Iēhova, ke Akua o nā kaua, ʻO wai lā kekahi Iēhova e like me ʻoe? Me kou ʻoiaʻiʻo hoʻi e hoʻopuni ana iā ʻoe?

⁹ ʻO ʻoe nō kai hoʻoponopono i ke kūpikipikiʻō ʻana o ke kai; A piʻi nui aʻe kona mau ʻale, nāu ia e hoʻomālielie.

¹⁰ Ua paopao nō ʻoe iā Rahaba, me he mea lā i pepehi ʻia; I ka ikaika o kou lima, ua hoʻoʻauheʻe ʻoe i kou poʻe ʻenemi.

¹¹ ¶ Nāu nō ka lani, nāu nō hoʻi ka honua; Ua hoʻokumu nō ʻoe i ke ao, a me kona mau mea e piha ai.

¹² ʻO ke kūkulu ʻākau, a me ke kūkulu hema, nāu nō i hana ia mau mea; E ʻoliʻoli nō ʻo Tabora a me Heremona i kou inoa.

¹³ He lima nō kou i lako i ka ikaika; Ua ikaika nō kou lima, ua kiʻekiʻe hoʻi kou lima ʻākau.

¹⁴ ʻO ka pono, a me ka hoʻopono, ʻo ia ke kumu o kou noho aliʻi; E hele aʻe nō i mua o kou maka ka lokomaikaʻi, a me ka ʻoiaʻiʻo.

¹⁵ Pōmaikaʻi ka poʻe kānaka ʻike ia leo hauʻoli! E Iēhova, e hele nō lākou ma ka mālamalama o kou maka.

¹⁶ E hauʻoli nō lākou i kou inoa a pō ka lā; A ma kou pono hoʻi e hoʻokiʻekiʻe ʻia ai lākou.

¹⁷ No ka mea, ʻo ʻoe nō ka nani o ko lākou ikaika; A ma kou lokomaikaʻi e hoʻokiʻekiʻe ʻia ai ko mākou pepeiaohao.

¹⁸ No ka mea, aia nō iā Iēhova ko mākou pākū, A i ka Mea Hemolele hoʻi o kā ʻIseraʻela, ko mākou aliʻi.

¹⁹ ¶ A laila, ʻōlelo iho nō ʻoe i kou mea hemolele ma ke akakū, ʻĪ maila, “Ua kau aku au i ka mana ma luna o ka mea ikaika; Ua hoʻokiʻekiʻe au i ka mea i wae ʻia mai o nā kānaka.

²⁰ “Ua loaʻa iaʻu ʻo Dāvida, ʻo kaʻu kauā; Ua poni aku nō au iā ia me kuʻu ʻaila laʻa.

²¹ “E paʻa mau nō koʻu lima me ia, A e hoʻoikaika aku nō koʻu lima iā ia.

²² “ʻAʻole e kiʻi mai ka ʻenemi i kāna, ʻAʻole hoʻi e hoʻokaumaha ke keiki a ka hewa iā ia.

²³ “Naʻu nō e hoʻoʻauheʻe i kona poʻe ʻenemi i mua ona, A e luku aku hoʻi i ka poʻe inaina mai iā ia.

²⁴ “E noho nō koʻu ʻoiaʻiʻo a me koʻu lokomaikaʻi me ia; A ma koʻu inoa e hoʻokiʻekiʻe ʻia ai kona pepeiaohao.

²⁵ “E hoʻokau aku au i kona lima ma ke kai, A me kona lima ʻākau hoʻi ma nā muliwai.

²⁶ “E hea mai nō ʻo ia iaʻu, ‘ʻO ʻoe nō koʻu Makua, ʻO koʻu Akua hoʻi, a me ka Pōhaku o koʻu hoʻōla ʻia.’

²⁷ “E hoʻolilo nō wau iā ia i koʻu makahiapo, I mea kiʻekiʻe ma luna o nā aliʻi o ka honua.

²⁸ “E mālama mau loa nō wau i koʻu lokomaikaʻi iā ia, A e kūpaʻa loa nō koʻu berita me ia.

²⁹ “E hoʻomau loa nō wau i kona poʻe mamo, A me kona noho aliʻi hoʻi, e like me nā lā o ka lani.

³⁰ ¶ “Inā haʻalele kāna poʻe keiki i koʻu kānāwai, ʻAʻole hoʻi e hele ma kou hoʻopono ʻana;

³¹ “Inā kuʻu aku lākou i kaʻu ʻōlelo paʻa, ʻAʻole hoʻi e mālama i kaʻu mau kauoha;

³² “A laila e hoʻopaʻi aku au i ko lākou hewa i ka lāʻau hahau, A me ko lākou hala hoʻi i ke kaula.

³³ “ʻAʻole naʻe e lawe loa aku au i koʻu lokomaikaʻi mai ona aku, ʻAʻole hoʻi au e hōʻole i koʻu lokomaikaʻi.

³⁴ “ʻAʻole au e ʻaʻe ma luna o kaʻu berita, ʻAʻole hoʻi e hoʻololi i ka ʻōlelo i puka aku ma koʻu lehelehe.

³⁵ “Hoʻokahi nō koʻu hoʻohiki ʻana i koʻu hemolele, ʻAʻole au e wahaheʻe aku iā Dāvida.

³⁶ “E mau loa ana nō kāna poʻe mamo, A me kona noho aliʻi, e like me ka lā i mua oʻu.

³⁷ “E hoʻopaʻa mau loa ʻia nō hoʻi ia, e like me ka mahina, Me he mea hōʻike ʻoiaʻiʻo lā ma ke aouli.” Sila.

³⁸ ¶ Akā, ua hōʻoki mai ʻoe, a ua hoʻopailua mai, A ua huhū mai nō hoʻi ʻoe i kāu mea i poni ai.

³⁹ Ua hōʻole mai nō hoʻi ʻoe i ka berita o kāu kauā; Ua hoʻolei ʻoe i kona lei aliʻi i lalo i ka lepo.

⁴⁰ Ua wāwahi nō hoʻi ʻoe i kona mau pā a pau, Ua hāʻawi mai nō hoʻi ʻoe i kona mau pā kaua i ka luku ʻia.

⁴¹ Hao wale iā ia ka poʻe a pau e māʻalo aʻe ana ma laila; He mea hoʻomāʻewaʻewa ia i kona poʻe hoalauna.

⁴² Ua hoʻokiʻekiʻe ʻoe i ka lima ʻākau o kona poʻe ʻenemi; Ua hoʻohauʻoli ʻoe i ka poʻe a pau i inaina mai iā ia.

⁴³ Ua hoʻohuli aʻe nō hoʻi ʻoe i ka maka o kāna pahi kaua, ʻAʻole hoʻi ʻoe i hoʻokūpaʻa iā ia ma ke kaua.

⁴⁴ Ua hoʻōki mai ʻoe i kona nani, A ua hoʻolei i kona noho aliʻi i lalo i ka lepo.

⁴⁵ Ua hoʻopōkole mai ʻoe i nā lā o kona wā ʻōpiopio; Ua uhi mai nō hoʻi ʻoe iā ia i ka hilahila. Sila.

⁴⁶ ¶ Pehea lā ka lōʻihi o kou hoʻonalo ʻana iā ʻoe iho, e Iēhova? E mau loa anei? E ʻā mai nei anei kou huhū me he ahi lā?

⁴⁷ E hoʻomanaʻo mai ʻoe iaʻu, pehea lā ka lōʻihi o ke ola ʻana? No ke aha lā ʻoe i hana makehewa ai i nā kānaka a pau?

⁴⁸ ʻO wai ke kanaka e ola nei, ʻaʻole ʻo ia e ʻike i ka make? E hoʻopakele anei ʻo ia i kona ola, mai ka lima aku o ka mea make? Sila.

⁴⁹ ¶ ʻAuhea lā kou lokomaikaʻi o nā manawa kahiko, e ka Haku? Ka mea āu i hoʻohiki ai iā Dāvida ma ka ʻoiaʻiʻo?

⁵⁰ E hoʻomanaʻo mai ʻoe, e ka Haku, i ka hōʻino ʻia o kāu kauā; Ua lawe nō wau ma kou umauma i nā lehulehu a pau o kou poʻe kānaka.

⁵¹ No ka mea, ua hōʻino wale mai kou poʻe ʻenemi, e Iēhova, Ua hōʻino wale mai hoʻi i nā kapuaʻi o kou mea i poni ʻia.

⁵² ¶ E hoʻomaikaʻi ʻia ʻo Iēhova, a i ka manawa pau ʻole! ʻĀmene, ʻĀmene.