KA BUKE O NĀ HALELŪ 88 - Ka Baibala Hemolele

HALELŪ LXXXVIII.

He Mele na nā keiki a Kora e mele ai. Na nā Luna Mele e popoʻi ai ma ka hoʻokiokio. He Halelū na Hemana no ʻEzera.

¹ ¶ E Iēhova, ke Akua o koʻu ola, Ua kāhea aku nō au i mua ou i ke ao a me ka pō.

² E hoʻokomo aku i kaʻu pule i mua ou; E hāliu mai hoʻi kou pepeiao i kaʻu kāhea ʻana!

³ No ka mea, ua ana koʻu ʻuhane i nā pōpilikia; Ke hoʻokokoke nei koʻu ola i ka luapō.

⁴ Ua helu pū ʻia nō wau me ka poʻe iho i lalo i ka lua; Ua like hoʻi au me ke kanaka, ʻaʻohe ona ikaika;

⁵ Ua waiho wale ʻia i waena o ka poʻe make, Ua like hoʻi me ka poʻe i hou ʻia e moe ana ma ka lua, ʻAʻole ʻoe e hoʻomanaʻo hou iā lākou; Ua hōʻoki ʻia lākou, mai kou lima aku.

⁶ Ua hoʻomoe ʻoe iaʻu i loko o ka lua hohonu loa, Ma loko o ka pouli, a me nā hohonu.

⁷ Ua kaumaha mai kou huhū ma luna oʻu, Ua hoʻopilikia mai ʻoe iaʻu i kou mau ʻale a pau. Sila.

⁸ Ua hoʻokaʻawale loa aku ʻoe i koʻu makamaka mai oʻu aku, Ua hoʻolilo mai ʻoe iaʻu i mea hoʻopailua no lākou; Ua paʻa nō hoʻi au, ʻaʻole e hiki iaʻu ke hele aku.

⁹ Ua hōkiʻi koʻu mau maka no ka pōpilikia; Ua kāhea aku nō wau iā ʻoe, e Iēhova, i nā lā a pau, Ua kīkoʻo aku nō hoʻi au i koʻu lima iā ʻoe.

¹⁰ ¶ E hōʻike anei ʻoe i nā hana mana no ka poʻe i make? E ala mai anei nā lapu e hoʻoleʻa aku iā ʻoe? Sila.

¹¹ E haʻi ʻia anei kou lokomaikaʻi ma ka lua kupapaʻu? A me kou ʻoiaʻiʻo hoʻi ma loko o ka pō?

¹² E ʻikea anei kāu hana mana ma loko o ka pouli? A me kou pono hoʻi ma loko o ka ʻāina meki?

¹³ ¶ E kāhea aku naʻe au iā ʻoe, e Iēhova; I ke kakahiaka hoʻi e hālāwai no kaʻu pule me ʻoe.

¹⁴ E Iēhova, no ke aha lā ʻoe e hoʻopailua mai i koʻu ʻuhane? A hūnā hoʻi i kou maka iaʻu?

¹⁵ Ua pilikia au, a kokoke nō i ka make, mai koʻu wā ʻuʻuku mai; Iaʻu i loʻohia ai i kou mea makaʻu, ua kūpikipikiʻō au.

¹⁶ Ua hele aʻe ma luna oʻu kou huhū wela; Ua hōʻoki loa hoʻi kou mau mea makaʻu iaʻu.

¹⁷ Hele pōʻai maila lākou iaʻu, me he wai lā; Hoʻopuni maila lākou iaʻu.

¹⁸ Ua hoʻokaʻawale loa ʻoe i koʻu mea aloha, a me koʻu makamaka, mai oʻu aku, Aia hoʻi koʻu hoalauna ma ka pouli.