KA BUKE O NĀ HALELŪ 87 - Ka Baibala Hemolele

HALELŪ LXXXVII.

He Mele Halelū na nā keiki a Kora.

¹ ¶ Aia nō kona mau kumu ma nā mauna hoʻāno.

² Ua ʻoi aku ka makemake o Iēhova i nā puka pā o Ziona, Ma mua o nā wahi noho ai a pau o kā Iakoba.

³ Ua ʻōlelo ʻia mai nā mea nani nou, E ke kūlanakauhale o ke Akua. Sila.

⁴ “I ka poʻe ʻike mai iaʻu, e kamaʻilio aku au no Rahaba, a me Babulona; Aia ʻo Pilisetia, a me Turo, a me ʻAitiopa, ‘ʻO ia kai hānau ʻia ma laila.’”

⁵ E ʻōlelo ʻia mai nō hoʻi no Ziona, “Ua hānau ʻia kēlā kanaka kēia kanaka ma loko ona”; A na ka Mea Kiʻekiʻe e hoʻokumupaʻa ia wahi.

⁶ Iā Iēhova e kākau ai i nā kānaka, E hōʻike mai nō ʻo ia, “Ua hānau ʻia ʻo ia nei ma laila.” Sila.

⁷ ʻO ka poʻe mele, a me ka poʻe hoʻokiokio, “Aia lā i loko ou, koʻu mau pūnāwai a pau.”