KA BUKE O NĀ HALELŪ 83 - Ka Baibala Hemolele

HALELŪ LXXXIII.

He Mele Halelū na ʻAsapa.

¹ ¶ E ke Akua ē, mai noho wale ʻoe; Mai hoʻokuli iho, ʻaʻole hoʻi e noho leo ʻole, e ke Akua.

² No ka mea, aia hoʻi, ua hoʻohaunaele kou poʻe ʻenemi, A ʻo ka poʻe inaina aku iā ʻoe, ua hoʻokiʻekiʻe lākou i ke poʻo.

³ Ua ʻimi maʻalea lākou e kūʻē i kou poʻe kānaka, Ua kūkākūkā lākou e kūʻē i ka poʻe āu i hūnā ai.

⁴ ʻĪ aʻela lākou, “E hele mai, e hōʻoki kākou i ko lākou noho aupuni ʻana, I hoʻomanaʻo hou ʻole ʻia ka inoa o kā ʻIseraʻela.”

⁵ No ka mea, ua kūkākūkā lōkahi pū lākou; Ua hana nō lākou i berita kūʻē iā ʻoe.

⁶ ʻO ko ka halelewa o ʻEdoma, a me ko ʻIsemaʻela; ʻO ko Moaba, a me ko Hagara;

⁷ ʻO ko Gebela, a me ko ʻAmona, a me ko ʻAmeleka; ʻO ko Pilisetia pū, a me ka poʻe e noho ma Turo;

⁸ Ua hui pū hoʻi ko ʻAsuria me lākou; ʻO lākou kai hoʻoikaika i nā moʻopuna a Lota. Sila.

⁹ ¶ E hana aku ʻoe iā lākou, e like me ko Midiana; E like hoʻi me Sisera, a me Iabina Ma ke kahawai ʻo Kisona;

¹⁰ Nā mea i luku ʻia ma ʻEnedora, A lilo lākou i kīpulu no ka ʻāina.

¹¹ E hoʻohālike ʻoe i ko lākou poʻe koʻikoʻi me ʻOreba, a me Zeʻeba; I ko lākou poʻe aliʻi hoʻi, me Zeʻeba a me Zalemuna;

¹² Nā mea i ʻōlelo, “E lawe kākou no kākou iho Nā wahi noho o ke Akua.”

¹³ ¶ E koʻu Akua ē, e hoʻohālike ʻoe iā lākou me ka ʻōpala, Me ke oka palaoa hoʻi i mua o ka makani.

¹⁴ E like me ke ahi i hoʻopau i nā ulu lāʻau, A me ka lapalapa ahi i hoʻā i nā kuahiwi;

¹⁵ Pēlā ʻoe e hahai iā lākou i kou ʻino, A e hoʻoweliweli iā lākou i kou puahiohio.

¹⁶ E hoʻopiha ʻoe i ko lākou maka i ka hilahila; A laila, e ʻimi lākou i kou inoa, e Iēhova.

¹⁷ E hoʻohilahila ʻia mai lākou, me ka hoʻopilikia mau loa ʻia; E hoʻohilahila ʻia mai lākou, a make hoʻi;

¹⁸ I ʻike lākou, ʻo ʻoe, ka Mea wale nō nona ka inoa ʻo IĒHOVA; ʻO ʻoe nō ka Mea Kiʻekiʻe Loa ma luna o ka honua a pau.