KA BUKE O NĀ HALELŪ 8 - Ka Baibala Hemolele

HALELŪ VIII.

I ka Luna Mele ma ka mea kani. He Halelū na Dāvida.

¹ ¶ E Iēhova, e ko mākou Haku, Kai ka hemolele o kou inoa ma ka honua a pau! Ua hohola ʻoe i kou nani ma luna o nā lani!

² No loko aʻe o ka waha o nā keiki hou a me nā mea omo, I hoʻomākaukau ai ʻoe i ka hoʻoleʻa no kou poʻe ʻenemi, I pili pū iā ʻoe ka ʻenemi, a me ka mea hoʻomaʻau.

³ ¶ I koʻu manaʻo ʻana aku i kou mau lani, ka hana o kou mau lima, I ka mahina a me nā hōkū āu i hoʻoponopono mai ai;

⁴ He aha ke kanaka i manaʻo mai ai ʻoe iā ia? A ʻo ke keiki a ke kanaka hoʻi i ʻike mai ai ʻoe iā ia?

⁵ Ua hana iho ʻoe iā ia ma lalo iho o ka poʻe ʻānela, Ua kau mai ʻoe iā ia i ka nani a me ka mahalo i lei nona;

⁶ Ua hoʻolilo ʻoe iā ia i haku no nā mea a kou mau lima i hana ai; Nāu nō i waiho nā mea a pau ma lalo aʻe o kona mau wāwae;

⁷ ʻO nā hipa, a me nā bipi a pau, ʻO ia, me nā holoholona o ke kula;

⁸ ʻO nā manu o ka lewa, a me nā iʻa o ke kai, A me nā mea a pau e holo ana ma nā ala o ka moana.

⁹ ¶ E Iēhova, e ko mākou Haku, Kai ka hemolele o kou inoa ma ka honua a pau!