KA BUKE O NĀ HALELŪ 71 - Ka Baibala Hemolele

HALELŪ LXXI.

¹ ¶ ʻO ʻoe e Iēhova, kaʻu mea e hilinaʻi ai; ʻAʻole au e hoʻohoka ʻia mai.

² E hoʻōla mai iaʻu, ma kou pono, E hoʻopakele hoʻi ʻoe iaʻu; E hāliu mai i kou pepeiao iaʻu a e hoʻōla iaʻu.

³ E lilo mai ʻoe i pōhaku e noho ai noʻu, Kahi e holo mau ai au; Ua kauoha aʻe nei ʻoe e hoʻōla iaʻu; No ka mea, ʻo ʻoe nō koʻu pōhaku me koʻu pā kaua.

⁴ E koʻu Akua, e hoʻopakele mai ʻoe iaʻu i ka lima o ka poʻe ʻaiā, Mai loko aku o ka poho lima o ka mea hewa aloha ʻole.

⁵ No ka mea, ʻo ʻoe nō koʻu Mea e manaʻolana ai, e ka Haku; E Iēhova, ka Mea aʻu i hilinaʻi ai, mai koʻu wā ʻōpiopio.

⁶ Nāu nō wau i hoʻokūpaʻa, mai ka ʻōpū mai; ʻO ʻoe nō kai lawe iaʻu mai loko mai o nā naʻau o koʻu makuahine; Nou mau aku nō hoʻi koʻu hoʻoleʻa ʻana.

⁷ ¶ Me he mea kupanaha lā au i ka lehulehu; Akā, ʻo ʻoe koʻu wahi paʻa e malu ai.

⁸ E piha koʻu waha i ka hoʻoleʻa nou, A me kou nani a pō ka lā.

⁹ Mai kiola aʻe ʻoe iaʻu i ka wā ʻelemakule; ʻAʻole hoʻi e haʻalele mai iaʻu i ka pau ʻana o koʻu ikaika.

¹⁰ No ka mea, ke ʻōlelo kūʻē mai nei koʻu poʻe ʻenemi iaʻu; A ua ʻōhumu pū ka poʻe hoʻohālua no kuʻu ʻuhane,

¹¹ ʻĪ maila, “Ua haʻalele mai ke Akua iā ia; E alualu ʻoukou iā ia, a e hopu iā ia; No ka mea, ʻaʻohe mea hoʻōla.”

¹² ¶ E ke Akua, mai hoʻomamao aku iaʻu; E koʻu Akua, e wikiwiki mai e kōkua iaʻu!

¹³ E hoʻohilahila ʻia, a e pau ʻē hoʻi ka poʻe kūʻē mai i kuʻu ʻuhane; E uhi ʻia me ka hōʻino ʻia a me ka hoʻāhewa ʻia ka poʻe ʻimi i hewa noʻu.

¹⁴ Akā, e lana mau koʻu naʻau, A e hoʻomāhuahua aʻe au i koʻu hoʻoleʻa ʻana iā ʻoe.

¹⁵ E hōʻike aku koʻu waha i kou pono, a me kou ola a pō ka lā; No ka mea, ʻaʻole au i ʻike i ko laila heluna.

¹⁶ E hele nō wau ma ka ikaika o ka Haku Iēhova; E hoʻoleʻa au i kou pono, ʻo kou wale nō.

¹⁷ ¶ E ke Akua, ua aʻo mai ʻoe iaʻu mai koʻu wā ʻōpiopio; A ua haʻi aku au i kāu mau hana kupanaha a hiki i kēia wā.

¹⁸ ʻĀnō hoʻi i koʻu ʻelemakule ʻana me ka poʻo hina. E ke Akua, mai haʻalele mai iaʻu; A hōʻike ʻē aku au i kou ikaika i kēia hanauna, A i kou mana hoʻi, i nā mea a pau e hiki mai ana.

¹⁹ He kiʻekiʻe loa kou pono, e ke Akua, Ka Mea i hana i nā mea nui; E ke Akua, ʻo wai lā ka mea like me ʻoe?

²⁰ E ka Mea i hōʻike iho nei iaʻu i ka pilikia ʻana he nui wale, E hoʻoikaika hou mai nō ʻoe iaʻu, A e hoʻopuka iaʻu mai loko o nā wahi hohonu o ka honua.

²¹ E hoʻomāhuahua aʻe ʻoe i koʻu nui ʻana, A e hōʻoluʻolu mai iaʻu ma kēlā ʻaoʻao, ma kēia ʻaoʻao.

²² ¶ E hula aku au iā ʻoe me ka viola ʻumi, I kou ʻoiaʻiʻo hoʻi, e koʻu Akua; E hīmeni aku hoʻi au iā ʻoe me ka lira, E ka Mea Hoʻāno o kā ʻIseraʻela.

²³ E hauʻoli nui koʻu mau lehelehe i koʻu ʻoli ʻana iā ʻoe; A me koʻu ʻuhane āu i hoʻōla mai nei.

²⁴ Eia hoʻi, e kamaʻilio aku kuʻu alelo i kou pono a pō ka lā; No ka mea, ua hoka, ua hoʻohilahila ʻia ka poʻe ʻimi i hewa noʻu.