KA BUKE O NĀ HALELŪ 7 - Ka Baibala Hemolele

HALELŪ VII.

ʻO ka Hoʻoleʻa a Dāvida i ʻoli ai iā Iēhova, no nā ʻōlelo a Kusa, ka pua a Beniamina.

¹ ¶ E Iēhova e koʻu Akua, ke hilinaʻi aku nei au iā ʻoe; E hoʻopakele ʻoe iaʻu i ka poʻe a pau nāna au i hoʻomaʻau mai; E hoʻōla mai hoʻi ʻoe iaʻu;

² O haehae mai ʻo ia i koʻu ʻuhane me he liona lā, A mokumoku au, ʻaʻohe mea e ola ai.

³ ¶ E Iēhova e koʻu Akua, inā i hana au i kēia; Inā he hewa i loko o koʻu mau lima;

⁴ Inā i hoʻihoʻi aku au i ka hewa i koʻu hoaaloha; A i lawe wale i kā ka mea i huhū hala ʻole mai iaʻu;

⁵ E pono e alualu mai ka ʻenemi i koʻu ʻuhane, a e hopu mai iaʻu; A e hehi mai hoʻi ia i koʻu ola i lalo i ka honua, A e waiho iho hoʻi i koʻu nani ma lalo o ka lepo. Sila.

⁶ ¶ E kū ʻoe i luna, e Iēhova, i kou huhū, E hoʻokiʻekiʻe aʻe iā ʻoe iho no ka hoʻokano o koʻu poʻe ʻenemi; E ala aʻe ʻoe noʻu i ka hoʻokolokolo āu i ʻōlelo mai ai.

⁷ ʻO ia, e hoʻopuni ai ke anaina kanaka iā ʻoe; No laila e hoʻi ʻoe i kahi kiʻekiʻe no lākou.

⁸ E hoʻokolokolo ʻo Iēhova i nā kānaka; E hoʻopono mai ʻoe iaʻu, e Iēhova, E like me koʻu pono, a me koʻu ʻoiaʻiʻo i loko oʻu.

⁹ Ke pule nei au e oki ka hana hewa o ka poʻe hewa; Akā, e hoʻokūpaʻa ʻoe i ka poʻe pono; No ka mea, na ke Akua pono i hoʻāʻo nā naʻau a me nā puʻupaʻa.

¹⁰ ʻO koʻu pākū, aia nō i ke Akua, Nāna i hoʻōla ka poʻe naʻau kūpono.

¹¹ Ua mālama mai ke Akua i ka poʻe pono, Ua huhū mai ke Akua i ka hewa i nā lā a pau.

¹² ¶ Inā i huli ʻole ia, e hoʻokala nō ia i kāna pahi kaua; Ua lena ʻo ia i kāna kakaka, ua hoʻoponopono nō ia.

¹³ Ua hoʻomākaukau nō hoʻi ia i nā mea e make ai nona; Ke pana ihola ʻo ia i nā pua ahi.

¹⁴ Aia hoʻi, ua nahunahu ia i ka hewa, Ua hoʻokauhua nō ia i ka ʻino, A ua hānau mai nō hoʻi ia i ka wahaheʻe.

¹⁵ Ua ʻeli ihola ʻo ia i ka lua a poʻopoʻo, Ua hāʻule ihola nō ia i lalo o ka ʻauwaha āna i hana ai.

¹⁶ E huli hou iho kāna hana hewa ʻana ma luna ona iho, A e hāʻule iho hoʻi kona kolohe ʻana ma luna o kona poʻo iho.

¹⁷ ¶ E hoʻomaikaʻi aku au iā Iēhova no kona pono, E hoʻoleʻa aku au i ka inoa ʻo Iēhova ke Kiʻekiʻe Loa.