KA BUKE O NĀ HALELŪ 61 - Ka Baibala Hemolele

HALELŪ LXI.

I ka Luna Mele ma nā mea kaula; na Dāvida.

¹ ¶ E hoʻolohe mai, e ke Akua, i koʻu kāhea ʻana; E maliu pono mai i kaʻu pule.

² Mai ka wēlau o ka honua e kāhea aku ai au iā ʻoe, I ka paumākō o koʻu naʻau; E alakaʻi ʻoe iaʻu i ka pōhaku kiʻekiʻe ma luna oʻu.

³ No ka mea, ua lilo mai ʻoe i pākū noʻu; He hale kaua paʻa i mua o ka ʻenemi.

⁴ E noho wau ma loko o kou halelewa a mau loa; E kanāho au ma ka hoʻomalu ʻana o kou mau ʻēheu. Sila.

⁵ ¶ No ka mea, ua lohe ʻoe, e ke Akua, i kaʻu mau mea i hoʻohiki ai; Ua hāʻawi mai hoʻi ʻoe iaʻu i ka hoʻoilina o ka poʻe weliweli i kou inoa.

⁶ E hoʻolōʻihi nō ʻoe i nā lā o ke aliʻi; A i kona mau makahiki ia hanauna aku ia hanauna aku.

⁷ E noho ia i mua o ke Akua a mau loa; E hoʻomākaukau mai ʻoe i ke aloha a me ka ʻoiaʻiʻo, e ola ai ia.

⁸ Pēlā, e hīmeni mau loa aku au i kou inoa, E hoʻokō aku i kēlā lā i kēia lā i kaʻu mau mea i berita ai.