KA BUKE O NĀ HALELŪ 6 - Ka Baibala Hemolele

HALELŪ VI.

I ka Luna Mele ma nā kaula kani ʻewalu. He Halelū na Dāvida.

¹ ¶ E Iēhova, mai hoʻohewa mai ʻoe iaʻu me kou huhū; Mai hahau mai ʻoe iaʻu, me kou inaina nui.

² E aloha mai ʻoe iaʻu, e Iēhova; no ka mea, ua nāwaliwali au; E Iēhova, e lapaʻau mai ʻoe iaʻu; no ka mea, ua haʻalulu koʻu mau iwi.

³ Ua piʻoloke loa koʻu ʻuhane, Akā ʻo ʻoe, e Iēhova, pehea lā hoʻi ka lōʻihi?

⁴ ¶ E hoʻi mai, e Iēhova, e hoʻopakele mai i koʻu ʻuhane! E hoʻōla mai ʻoe iaʻu no ka pono o kou aloha!

⁵ No ka mea, ma loko o ka make ʻaʻohe manaʻo iā ʻoe; Ma loko o ka malu o ka make, ʻo wai lā ka mea e hoʻoleʻa aku iā ʻoe?

⁶ ¶ Ua luhi au i koʻu auē ʻana; I ka pō a pau i hoʻolana ai au i koʻu moena; Ua hoʻopulu au i koʻu wahi moe me koʻu waimaka.

⁷ Ua pau ʻē kuʻu maka no koʻu ʻehaʻeha; Ua kahiko ʻē nō ia no koʻu poʻe ʻenemi a pau.

⁸ ¶ E hele aku mai oʻu aku nei, e ka poʻe hana ʻino a pau; No ka mea, ua lohe mai ʻo Iēhova i ka leo o koʻu uē ʻana.

⁹ Ua lohe mai ʻo Iēhova i koʻu nonoi ʻana; E ʻae mai ana nō ʻo Iēhova i kaʻu pule.

¹⁰ E piʻoloke koʻu poʻe ʻenemi a pau me ka haʻalulu loa; E hoʻi nō lākou me ka hilahila koke.