KA BUKE O NĀ HALELŪ 57 - Ka Baibala Hemolele

HALELŪ LVII.

Luna Mele, Mai Luku, he Mele na Dāvida i ka wā i holo aku ai ia mai o Saula i ke ana.

¹ ¶ E aloha mai iaʻu, e ke Akua, e aloha mai ʻoe iaʻu; No ka mea, ke hilinaʻi aku nei koʻu ʻuhane iā ʻoe; ʻOiaʻiʻo ma ka malu o kou mau ʻēheu e kanāho ai au, A hala loa aku kēia mau mea e pōʻino ai.

² E kāhea aku au i ke Akua Kiʻekiʻe Loa, I ke Akua nāna i hana mai noʻu.

³ E hoʻouna mai nō ʻo ia mai ka lani mai, A e hoʻopakele mai iaʻu i ka nuku ʻana o nā mea manaʻo e ale mai iaʻu. Sila. E hoʻouna nō ke Akua i kona aloha a me kona ʻoiaʻiʻo.

⁴ ¶ Eia koʻu ʻuhane i waena o nā liona; Ke moe nei au me ka poʻe i hoʻā ʻia, Nā keiki a kānaka o ko lākou mau niho he mau ihe me nā pua; A he pahi kaua ʻoi ko lākou alelo.

⁵ E hāpai ʻia aku ʻoe, e ke Akua, ma luna o nā lani; A ʻo kou nani hoʻi ma luna o ka honua a pau.

⁶ Ua hoʻomākaukau lākou i ka ʻupena no koʻu mau kapuaʻi; Ua kūlou iho koʻu ʻuhane; Ua ʻeli lākou i ka lua ma mua oʻu, A i waenakonu ona i hāʻule ai lākou. Sila.

⁷ ¶ Ua paʻa koʻu naʻau, e ke Akua, ua paʻa koʻu naʻau, E ʻoli aku au, a e hoʻoleʻa hoʻi!

⁸ E ala aʻe, e kuʻu nani, e ala, e ka viola ʻumi a me ke kinora! ʻO wau nei hoʻi kekahi e ala aʻe i ka wanaʻao.

⁹ E hoʻoleʻa aku au iā ʻoe i waena o nā kānaka, e ka Haku; E hīmeni aku au iā ʻoe i waena o nā lāhui kanaka.

¹⁰ No ka mea, he nui kou aloha a hala i nā lani, A me kou ʻoiaʻiʻo a hiki i nā ao.

¹¹ E hāpai ʻia aku ʻoe, e ke Akua, ma luna o nā lani; A me kou nani ma luna o ka honua a pau.