KA BUKE O NĀ HALELŪ 5 - Ka Baibala Hemolele

HALELŪ V.

I ka Luna Mele ma ka lute. He Halelū na Dāvida.

¹ ¶ E Iēhova, e hoʻolohe mai kou pepeiao i kaʻu ʻōlelo, E manaʻo mai hoʻi ʻoe i kaʻu ʻulono ʻana.

² E hoʻolohe i ka leo o kuʻu hea ʻana aku, e kuʻu Aliʻi, a me kuʻu Akua; No ka mea, e pule aku nō au iā ʻoe.

³ E Iēhova, i ke kakahiaka e hoʻolohe mai ai nō ʻoe i koʻu leo; I ke kakahiaka au e hoʻopololei ai i koʻu manaʻo iā ʻoe, a e nānā aku ai i luna.

⁴ ¶ No ka mea, ʻaʻole ʻoe he Akua ʻoliʻoli i ka hewa; ʻAʻole hoʻi e noho pū ka ʻino me ʻoe.

⁵ ʻAʻole hoʻi e kū ka poʻe lalau i mua o kou alo; Ua inaina mai nō ʻoe i ka poʻe hana ʻino a pau.

⁶ E luku mai ana nō ʻoe i ka poʻe i ʻōlelo i ka mea wahaheʻe; E hoʻowahāwahā mai ana ʻo Iēhova i ke kanaka koko a me ka hoʻopunipuni.

⁷ Akā, ʻo wau nei lā, e komo au i kou hale i ka nui o kou lokomaikaʻi; Me ka makaʻu iā ʻoe e hoʻomana aku ai au ma kou luakini hoʻāno.

⁸ ¶ E Iēhova, e alakaʻi ʻoe iaʻu ma kou pono no koʻu poʻe ʻenemi; E hoʻopololei hoʻi i kou alanui i mua o koʻu alo.

⁹ No ka mea, ʻaʻole he ʻoiaʻiʻo i loko o ko lākou waha; He hewa ʻiʻo ko loko o lākou; A ʻo ko lākou kaniʻāʻī he hale lua hāmama; Ua malimali mai lākou me ko lākou alelo.

¹⁰ E hoʻohewa mai ʻoe iā lākou, e ke Akua; E hāʻule lākou i ko lākou manaʻo iho! E kipaku hoʻi ʻoe iā lākou i ka nui o ko lākou hewa; No ka mea, ua kipi wale aku lākou iā ʻoe.

¹¹ ¶ E hauʻoli ka poʻe a pau i hilinaʻi aku iā ʻoe; E hōʻoliʻoli mau nō hoʻi no kou mālama ʻana mai iā lākou; A e ʻoliʻoli ʻiʻo hoʻi iā ʻoe ka poʻe i makemake i kou inoa.

¹² No ka mea, e hoʻomaikaʻi ana nō ʻoe i ka mea pono, e Iēhova; Me ke aloha e hoʻopuni mai ai ʻoe iā ia me he pale kaua lā.