KA BUKE O NĀ HALELŪ 44 - Ka Baibala Hemolele

HALELŪ XLIV.

I ka Luna Mele; na nā keiki a Kora, he hīmeni.

¹ ¶ E ke Akua, ua lohe mākou me ko mākou mau pepeiao, Ua haʻi mai ko mākou mau mākua iā mākou, I nā hana āu i hana ai i ko lākou mau lā, i nā wā kahiko.

² Kipaku akula ʻoe i nā lāhui kanaka me kou lima, a hoʻokomo mai iā lākou lā; Hoʻopilikia ihola ʻoe i nā kānaka a kiola akula;

³ No ka mea, ʻaʻole me kā lākou pahi kaua iho i loaʻa ai iā lākou ka ʻāina; ʻAʻole hoʻi no ko lākou lima ponoʻī i hoʻōla iho iā lākou iho; Akā, ʻo kou peʻahi ʻākau, a me kou lima, a me ka mālamalama o kou maka; No ka mea, ua lokomaikaʻi mai ʻoe iā lākou.

⁴ ¶ ʻO ʻoe nō koʻu Aliʻi, e ke Akua; E kauoha mai i ka hoʻōla ʻana iā Iakoba.

⁵ Ma ou lā e pahu aku ai mākou i ko mākou poʻe ʻenemi; Ma kou inoa e hehi iho ai mākou i ka poʻe kūʻē i luna iā mākou.

⁶ No ka mea, ʻaʻole ma kuʻu kakaka e hilinaʻi aku ai au; ʻAʻole hoʻi e hoʻōla mai kaʻu pahi kaua iaʻu.

⁷ Akā, nāu nō mākou i hoʻopakele i ko mākou poʻe ʻenemi, A ua hoʻohoka ʻoe i ka poʻe i inaina mai iā mākou.

⁸ I loko o ke Akua e kaena ai mākou a pō ka lā, A e hoʻomaikaʻi mau loa aku i kou inoa. Sila.

⁹ ¶ Akā, ua haʻalele aʻe nei ʻoe a ua hoʻohilahila iā mākou; ʻAʻole hoʻi ʻoe i hele pū me ko mākou poʻe kaua.

¹⁰ A ua hoʻohuli ʻoe iā mākou i hope mai ka ʻenemi mai; A ʻo ka poʻe hoʻowahāwahā iā mākou, ua hao mai lākou no lākou iho.

¹¹ Ua hāʻawi ʻoe iā mākou me he mau hipa lā e lilo i ʻai; Ua hoʻopuehu hoʻi iā mākou i waena o nā lāhui kanaka.

¹² Ua kūʻai hoʻolilo aku ʻoe i kou poʻe kānaka no ka mea ʻole, ʻAʻole hoʻi i hoʻomāhuahua ma ka uku no lākou.

¹³ Ua waiho ʻoe iā mākou he mea e hōʻino ʻia i waena o ko mākou poʻe hoa noho, He mea e hoʻowahāwahā ai a e henehene ai no ka poʻe e hoʻopuni ana iā mākou.

¹⁴ Ua hoʻolilo ʻoe iā mākou i hua ʻōlelo ʻino, A i luli poʻo ʻana i waena o nā lāhui kanaka.

¹⁵ E mau ana koʻu hōʻino ʻia i mua o koʻu maka; A ua uhi mai ka hilahila o koʻu maka iaʻu;

¹⁶ No ka leo o ka mea i hāʻiliʻili a i hōʻino wale mai; No ka ʻenemi hoʻi a me ka mea hoʻopaʻi.

¹⁷ ¶ Ua pau ia mea i ke kau mai ma luna o mākou, ʻAʻole hoʻi mākou i hoʻopoina iā ʻoe; ʻAʻole hoʻi i hoʻopunipuni mākou ma kou berita.

¹⁸ ʻAʻole i hoʻohuli ʻia ko mākou naʻau, ʻAʻole hoʻi i kāpae aʻe ko mākou mau kapuaʻi mai kou ʻaoʻao aʻe;

¹⁹ Ua hanapēpē loa ʻoe iā mākou ma kahi nahesa; A ua hoʻouhi mai ʻoe iā mākou me ka malu o ka make.

²⁰ ¶ Inā i hoʻopoina mākou i ka inoa o ko mākou Akua, Inā i kīkoʻo aku ko mākou mau lima i kahi akua wahaheʻe;

²¹ ʻAʻole anei i ʻimi ke Akua ia mea? No ka mea, ua ʻike ʻo ia i nā mea huna o ka naʻau.

²² ʻOiaʻiʻo, nou mākou i pepehi ʻia ai a pō ka lā; Ua manaʻo ʻia mākou me he mau hipa lā e hoʻomake ʻia.

²³ E ala aʻe, ʻo ke aha kou mea e hiamoe ai, e ka Haku? E kū mai hoʻi i luna, mai haʻalele mai iā mākou a mau loa.

²⁴ No ke aha lā i hūnā ai ʻoe i kou maka? A i hoʻopoina hoʻi i ko mākou pōpilikia, a me ko mākou hoʻoluhi hewa ʻia?

²⁵ No ka mea, ua kūlou iho ko mākou ʻuhane i ka lepo; Ua pili ko mākou ʻōpū i ka honua.

²⁶ E kū mai ʻoe e kōkua no mākou, A e hoʻōla iā mākou no kou aloha.