KA BUKE O NĀ HALELŪ 4 - Ka Baibala Hemolele

HALELŪ IV.

I ka Luna Mele ma nā mea kani. He Halelū na Dāvida.

¹ ¶ I kaʻu uolo ʻana aku e lohe mai iaʻu, e ke Akua oʻu e pono ai! Ua hoʻākea mai ʻoe iaʻu i koʻu pōpilikia; E aloha mai ʻoe iaʻu, e hoʻolohe mai hoʻi i kaʻu pule.

² ¶ E nā keiki a kānaka, pehea lā ka lōʻihi O ko ʻoukou hoʻolilo ʻana i koʻu nani i mea hilahila? No ke aha lā e aloha ai ʻoukou i ka lapuwale, A ʻimi hoʻi i wahaheʻe? Sila.

³ E ʻike hoʻi ʻoukou ua hoʻānaʻē ʻo Iēhova i ka mea haipule nona; E lohe mai nō ʻo Iēhova i koʻu kāhea ʻana aku iā ia.

⁴ ¶ E haʻalulu ʻoukou, mai hana hewa; E kūkākūkā me ko ʻoukou naʻau iho, Ma ko ʻoukou wahi moe e noho mālie ai. Sila.

⁵ E kaumaha aku ʻoukou i ka mōhai pono, E lelepau ko ʻoukou manaʻo iā Iēhova.

⁶ ¶ He nui nō ka poʻe i ʻōlelo mai, “ʻO wai ka mea e hōʻike mai i ka pono iā kākou?” E Iēhova, e hoʻomālamalama mai kou maka iā mākou.

⁷ Ua hoʻokomo mai ʻoe i ka ʻoliʻoli i loko o koʻu naʻau, A ʻoi aku koʻu i ko lākou i ka māhuahua ʻana aʻe o ka palaoa a me ka waina.

⁸ E moe au i lalo me ka maluhia, a hiamoe; No ka mea, ʻo ʻoe wale nō, e Iēhova, kai hoʻomalu mai i koʻu noho ʻana.