KA BUKE O NĀ HALELŪ 3 - Ka Baibala Hemolele

HALELŪ III.

He Halelū a Dāvida i ka manawa i holo aku ai ia mai ke alo aku o kāna keiki ʻo ʻAbesaloma.

¹ ¶ E Iēhova, ua māhuahua aʻe nei koʻu poʻe ʻenemi! Ua nui nō hoʻi ka poʻe i kūʻē mai iaʻu.

² Lehulehu nā mea i ʻōlelo mai no koʻu ʻuhane, “ʻAʻole ona kōkua i loko o ke Akua.” Sila.

³ ¶ Akā, ʻo ʻoe, e Iēhova, ka pākū noʻu; ʻO koʻu nani, ka Mea nāna kuʻu poʻo e hāpai.

⁴ Ua kāhea aku wau iā Iēhova me koʻu leo; Ua hoʻolohe mai nō ia iaʻu ma kona mauna hoʻāno. Sila.

⁵ Ua moe ihola au i lalo a hiamoe; Ua ala aʻela hoʻi, no ko Iēhova mālama ʻana mai iaʻu.

⁶ ʻAʻole au e makaʻu aku i nā ʻumi tausani o kānaka, ʻO ka poʻe e kūʻē mai iaʻu a puni.

⁷ ¶ E kū mai ʻoe, e Iēhova, e hoʻōla mai iaʻu, e kuʻu Akua! Ua pepehi ʻoe i koʻu poʻe ʻenemi a pau ma ke ā; Ua uhaʻi ʻoe i nā niho o ka poʻe ʻaiā.

⁸ No Iēhova ke ola; ʻO kou hoʻomaikaʻi ʻana ma luna iho o kou poʻe ʻōhua! Sila.