KA BUKE O NĀ HALELŪ 21 - Ka Baibala Hemolele

HALELŪ XXI.

I ka Luna Mele. He Halelū na Dāvida.

¹ ¶ E Iēhova, e hauʻoli aku ke aliʻi i kou mana; Nani hoʻi kona ʻoliʻoli ʻana i kou ola!

² Ua hāʻawi mai ʻoe iā ia i ka mea a kona naʻau i makemake ai; ʻAʻole ʻoe i hōʻole i ka mea a kona lehelehe i noi aku ai. Sila.

³ A, ua hāʻawi ʻē mai ʻoe iā ia i pōmaikaʻi i ka pono; Ua kau mai ʻoe i ka lei gula maʻemaʻe ma luna iho o kona poʻo.

⁴ Ua noi aku ʻo ia iā ʻoe i ola, nāu nō ia i hāʻawi mai nona; ʻO ke ola loa i ka manawa pau ʻole.

⁵ He nui wale kona nani i kou ola; ʻO ka mahalo, a me ka hanohano kāu i kau mai ai ma luna iho ona.

⁶ Ua hoʻopōmaikaʻi ʻiʻo mau loa ʻoe iā ia; Ua hoʻohauʻoli loa ʻoe iā ia i kou maka.

⁷ ¶ No ka mea, ua hilinaʻi aku ke aliʻi iā Iēhova, No ka lokomaikaʻi o ka Mea Kiʻekiʻe Loa e kūlanalana ʻole ai ia.

⁸ E loaʻa nō i kou lima kou mau ʻenemi a pau; E loaʻa nō i kou lima ʻākau ka poʻe inaina iā ʻoe.

⁹ E hoʻohālike nō ʻoe iā lākou me he umu ahi lā i kou wā e huhū ai; E ale nō Iēhova iā lākou i kona inaina, e pau hoʻi lākou i ke ahi.

¹⁰ Nāu nō kā lākou hua e luku aku, mai ka honua aku, A me kā lākou mamo, mai waena aku o nā keiki a kānaka.

¹¹ No ka mea, ua hoʻopālahalaha lākou i ka ʻino nou; Ua kūkā lākou i ka manaʻo hewa, ʻaʻole hoʻi i hiki.

¹² No laila, e hoʻohuli mai ʻoe i ko lākou kua; Ke hoʻomākaukau ʻoe i nā pua i kāu mau kaula, i kū pono i ko lākou alo.

¹³ E hāpai ʻia aku ʻoe, e Iēhova, i kou ikaika; E ʻoli nō hoʻi mākou me ka hoʻoleʻa aku i kou mana.