KA BUKE O NĀ HALELŪ 20 - Ka Baibala Hemolele

HALELŪ XX.

I ka Luna Mele. He Halelū na Dāvida.

¹ ¶ E hoʻolohe mai ʻo Iēhova iā ʻoe i ka lā pōpilikia! I ola ʻoe i ka inoa o ke Akua no Iakoba!

² Mai kona keʻena kapu mai e hoʻouna mai ai ʻo ia i kou mea nāna e alu; Mai Ziona mai e kōkua mai ai ʻo ia iā ʻoe!

³ E hoʻomanaʻo mai hoʻi i kāu mau mōhai a pau; A e hoʻopono mai hoʻi i kāu mōhai kuni! Sila.

⁴ ¶ E hāʻawi mai hoʻi e like me kou naʻau iho, E hoʻokō mai hoʻi i kou manaʻo a pau!

⁵ I kou ola e hauʻoli ai mākou, A i ka inoa o ko kākou Akua e kau ai kākou i ka hae; E ʻae mai hoʻi ʻo Iēhova i kāu pule a pau.

⁶ ¶ ʻĀnō ua ʻike au, ua hoʻōla ʻo Iēhova i kona mea i poni ʻia; Ma kona lani hoʻāno nō ia e hoʻolohe mai ai iā ia, Me ka mana o kona lima ʻākau e ola ai.

⁷ Ma nā kaʻa kaua kekahi poʻe, ma nā lio kekahi i manaʻo ai; Akā, e hoʻomanaʻo kākou i ka inoa ʻo Iēhova ʻo ko kākou Akua.

⁸ Ua emi lākou, ua hāʻule i lalo; Akā, ua ala mai nei mākou a kū pono i luna.

⁹ E hoʻōla mai, e Iēhova; E hoʻolohe mai ke Aliʻi iā mākou i ko mākou kāhea ʻana.