KA BUKE O NĀ HALELŪ 2 - Ka Baibala Hemolele

HALELŪ II.

¹ ¶ No ke aha lā e kūpikipikiʻō ai ko ka ʻāina ʻē? A e noʻonoʻo ai ka poʻe kānaka i ka mea lapuwale?

² Ua kūʻē aku nā aliʻi o ka honua, Ua ʻōhumu pū aku nō hoʻi nā luna, Iā Iēhova, a i kona Mea i poni ʻia,

³ “E moku aku kākou i kā lāua mau mea paʻa, A e hoʻolei aku hoʻi mai o kākou aku nei i kā lāua mau kaula!”

⁴ ¶ ʻO ka Mea e noho ana ma ka lani, e ʻaka mai nō ia; A e hoʻomahua mai nō hoʻi ʻo ka Haku iā lākou.

⁵ A laila e ʻōlelo mai ʻo ia iā lākou i kona inaina, A e hoʻomaka ua mai hoʻi iā lākou i kona huhū nui.

⁶ “Ua poni aʻe nei au i kaʻu Aliʻi ma luna o Ziona, Ma luna iho o koʻu mauna hoʻāno.”

⁷ ¶ “E haʻi aku au i ke kauoha; Ua ʻōlelo maila ʻo Iēhova iaʻu, ‘ʻO ʻoe nō kaʻu Keiki; I kēia lā nō, ua hoʻohānau aku wau iā ʻoe.

⁸ ‘E noi mai ʻoe iaʻu, a e hāʻawi aku au iā ʻoe I nā lāhui kanaka i hoʻoilina nou, A i waiwai hoʻi nou nā welelau o ka honua.

⁹ ‘E uhaʻi ʻoe iā lākou me ke koʻokoʻo hao; E ʻulupā hoʻi ʻoe iā lākou me he ipu lepo lā.’”

¹⁰ ¶ No ia hoʻi, e hoʻonaʻauao ʻoukou, e nā aliʻi; E ao ʻia aku nō hoʻi ʻoukou, e nā luna kānāwai o ka honua.

¹¹ E mālama iā Iēhova me ka weliweli, E hauʻoli hoʻi ʻoukou me ka haʻalulu.

¹² E honi aku i ke Keiki, o huhū mai ia, O make hoʻi ʻoukou ia ʻaoʻao, ke hoʻā iki ʻia mai kona inaina. Pōmaikaʻi wale ka poʻe a pau i hilinaʻi aku iā ia!