KA BUKE O NĀ HALELŪ 144 - Ka Baibala Hemolele

HALELŪ CXLIV.

Na Dāvida.

¹ ¶ E hoʻomaikaʻi ʻia ʻo Iēhova, koʻu Pōhaku, Ka Mea i aʻo mai i koʻu mau lima e hoʻouka, A me koʻu mau manamana lima e kaua.

² ʻO koʻu mea aloha, a me koʻu puʻukaua; ʻO koʻu puʻuhonua, a me koʻu Mea e pakele ai; ʻO koʻu pale kaua, ka Mea aʻu e hilinaʻi ai; Ka Mea i hoʻopio mai i koʻu poʻe kānaka ma lalo iho oʻu.

³ E Iēhova, he aha ke kanaka, i ʻike mai ai ʻoe iā ia? A me ke keiki a ke kanaka i manaʻo ai ʻoe iā ia?

⁴ Ua like ke kanaka me ka māhu; A ʻo kona mau lā hoʻi me he aka lā i hele aku.

⁵ ¶ E Iēhova, e hoʻokūlou mai ʻoe i nā lani a e iho mai i lalo; E hoʻopā i nā kuahiwi, a e piʻi aku ka uahi.

⁶ E hoʻoʻanapu mai i ka uila, a e hoʻopuehu iā lākou; E pana aku i kou mau pua, a e luku iā lākou.

⁷ E kīkoʻo mai ʻoe i kou lima mai luna mai; A e unuhi mai iaʻu a e hoʻopakele hoʻi iaʻu ma loko aku o nā wai nui, Mai ka lima aku hoʻi o nā keiki malihini;

⁸ Ka poʻe ʻōlelo wahaheʻe ma kā lākou waha, A ʻo ko lākou lima ʻākau, he lima ʻākau hoʻopunipuni.

⁹ ¶ E ke Akua, e ʻoli aku au i ke ʻoli hou iā ʻoe, Ma ka viola ʻumi he ʻumi nā kaula, e hoʻoleʻa aku ai au iā ʻoe.

¹⁰ Nāna nō e hāʻawi mai i ke ola no nā aliʻi; Nāna nō i hoʻopakele iā Dāvida i kāna kauā, I ka pahi kaua o ka hewa.

¹¹ E unuhi mai ʻoe iaʻu, a e hoʻopakele mai hoʻi iaʻu, I ka lima o nā keiki malihini, Ka poʻe mea waha ʻōlelo wahaheʻe, A ʻo ko lākou lima ʻākau, he lima ʻākau hoʻopunipuni;

¹² ¶ I like kā kākou poʻe keiki kāne me nā mea kanu, I ulu a nui i ko lākou manawa ʻōpiopio; I like hoʻi kā kākou poʻe kaikamāhine me nā pōhaku kihi, I ʻānai ʻia ma ke ʻano o ka luakini;

¹³ I piha hoʻi ko lākou hale papaʻa, E hāʻawi mai ana i mea o kēlā ʻano, kēia ʻano; I hānau mai ai kā kākou poʻe hipa ma nā tausani, Ma ka ʻumi tausani hoʻi ma nā alanui.

¹⁴ I hāpai hoʻi kā kākou poʻe bipi; I komo ʻole kekahi i loko, ʻaʻole hoʻi e puka i waho, A i ʻole hoʻi he mea ʻōhumu, ma ko lākou mau alanui!

¹⁵ Pōmaikaʻi ka lāhui kanaka i noho pēlā; Pōmaikaʻi nō ka lāhui kanaka ma muli o Iēhova, ko kākou Akua!