KA BUKE O NĀ HALELŪ 141 - Ka Baibala Hemolele

HALELŪ CXLI.

He Halelū na Dāvida.

¹ ¶ E Iēhova, ke kāhea aku nei au iā ʻoe, E wikiwiki mai ʻoe iaʻu! E hoʻolohe hoʻi i ka leo o koʻu kāhea ʻana aku iā ʻoe!

² E hoʻolilo ʻia kaʻu pule i mōhai ʻala i mua ou; A ʻo ka hāpai ʻana hoʻi o koʻu mau lima i mōhai ahiahi.

³ E hoʻonoho mai ʻoe, e Iēhova, i mea kiaʻi ma kuʻu waha, A e mālama mai hoʻi ʻoe i ke pani o koʻu mau lehelehe.

⁴ Mai hoʻohuli aʻe ʻoe i koʻu naʻau i kekahi mea hewa, E hana i ka hana o ka poʻe lawelawe, Me ka poʻe hana kolohe; ʻAʻole hoʻi au e ʻai i ko lākou mea ʻono.

⁵ ¶ Na ka poʻe pono e hahau mai iaʻu, he aloha ia; E aʻo mai ʻo ia iaʻu he mea hamo maikaʻi ia, ʻAʻole ia e wāhi ai i kuʻu poʻo; No ka mea, e mau ana nō kaʻu pule no lākou, i loko o ko lākou pilikia.

⁶ Ua hāʻule ko lākou luna kānāwai ma nā wahi pōhaku, Ua lohe mai naʻe lākou i kaʻu pule; no ka mea, he ʻoluʻolu ia.

⁷ E like me ka mea kōhi a hōʻauʻauwaha i ka honua, Pēlā i hoʻoheleleʻi ʻia ai ko mākou iwi ma ke kaʻe o ka lua kupapaʻu.

⁸ ¶ Aia nō iā ʻoe koʻu mau maka, e Iēhova ka Haku, Iā ʻoe nō wau e hilinaʻi aku ai; Mai waiho pū mai ʻoe i koʻu ʻuhane me ko ka poʻe nele.

⁹ E mālama mai ʻoe iaʻu i ka hei a lākou i kaukau ai noʻu, A me ka ʻupena o ka poʻe hana hewa.

¹⁰ E hāʻule ka poʻe hewa i loko o ko lākou hei iho, A e pakele wale aku nō wau.