KA BUKE O NĀ HALELŪ 128 - Ka Baibala Hemolele

HALELŪ CXXVIII.

He Hīmeni ʻĀnuʻunuʻu.

¹ ¶ Pōmaikaʻi ka poʻe a pau i makaʻu aku iā Iēhova, A hele hoʻi ma kona mau alanui.

² E ʻai nō ʻoe i ka waiwai o kou mau lima, He pōmaikaʻi nō kou, a he pono nō hoʻi.

³ E like nō kāu wahine me nā kumu waina hua nui, Ma nā ʻaoʻao o kou hale; E like nō hoʻi kāu mau keiki me nā lāʻau ʻoliva, E kū puni ana i kou papa ʻaina.

⁴ Aia hoʻi! Pēlā e hoʻopōmaikaʻi ʻia mai ai ke kanaka, Nāna e makaʻu aku iā Iēhova.

⁵ ¶ E hoʻomaikaʻi mai ʻo Iēhova iā ʻoe mai Ziona mai; A e ʻike nō ʻoe i ka pono o Ierusalema, I nā lā a pau o kou ola ʻana.

⁶ E ʻike nō hoʻi ʻoe i nā keiki o kāu poʻe keiki, A me ka maluhia ma luna o kā ʻIseraʻela!