KA BUKE O NĀ HALELŪ 12 - Ka Baibala HemoleleHALELŪ XII. I ka Luna Mele ma nā kaula kani ʻewalu. He Halelū na Dāvida. 1 ¶ E kōkua mai, e Iēhova; no ka mea, ua oki ke kanaka lokomaikaʻi; Ua pau hoʻi ka poʻe hoʻopono i waena o nā keiki a kānaka. 2 Ke kamaʻilio nei kekahi i kekahi i ka mea lapuwale, Me nā lehelehe malimali a me ka naʻau lua e ʻōlelo nei lākou. 3 E ʻoki ana nō ʻo Iēhova i nā lehelehe malimali a pau, A me ke alelo e haʻanui ana i nā mea nui; 4 Kai ʻōlelo iho, “Me ko kākou alelo e lanakila ai kākou No kākou nō ko kākou mau lehelehe; ʻO wai lā ka haku ma luna o kākou?” 5 “No ka luhi hewa ʻana o ka poʻe ʻilihune, No ka auē ʻana o ka poʻe kaniʻuhū, E kū ai au i luna ʻānō,” wahi a Iēhova, “E hoʻonoho au iā ia i kahi ola, ke puhi ʻia mai ia.” 6 ¶ ʻO nā ʻōlelo a Iēhova, he mau ʻōlelo maʻemaʻe nō ia, Me he kālā lā i hoʻāʻo ʻia i ka umu lepo, ʻehiku ka hoʻomaʻemaʻe ʻana. 7 Nāu nō lākou e mālama mai, e Iēhova, Nāu nō lākou e hoʻōla, mai kēia hanauna aku a i ka manawa pau ʻole. 8 E hele ana nō ka poʻe hewa i kēlā ʻaoʻao a i kēia ʻaoʻao, I ka manawa i hoʻokiʻekiʻe ʻia ai nā kānaka ʻino loa. |
Ka Baibala Hemolele © Partners Development Foundation, 2018.
Partners in Development Foundation