KA BUKE O NĀ HALELŪ 1 - Ka Baibala Hemolele

HALELŪ I.

¹ ¶ Pōmaikaʻi ke kanaka i hele ʻole ma ke aʻo ʻia o ka poʻe ʻaiā, I kū ʻole hoʻi ma ka ʻaoʻao o ka poʻe hewa, I noho ʻole hoʻi ma ka noho o ka poʻe haʻakei!

² Akā, ma ke kānāwai o Iēhova kona ʻoliʻoli; A ma kona kānāwai ʻo ia i manaʻo ai i ke ao a me ka pō.

³ E like nō ia me ka lāʻau i kanu ʻia ma nā kahawai, I hoʻohua mai i kona hua i kona manawa; A ʻo kona lau hoʻi ʻaʻole e mae; A ʻo kona mea e hana ai e pono ana nō ia.

⁴ ¶ ʻAʻole hoʻi e like me nēia ka poʻe ʻaiā; Akā, ua like ia me ka ʻōpala i puehu i ka makani.

⁵ No laila, ʻaʻole e kū ana ka poʻe ʻaiā ma ka hoʻokolokolo ʻana, ʻAʻole hoʻi ka poʻe hewa i loko o kā ka poʻe pono anaina.

⁶ No ka mea, ua ʻike maila ʻo Iēhova i ka ʻaoʻao o ka poʻe maikaʻi; Akā hoʻi, ʻo ka ʻaoʻao o ka poʻe hewa, e make ana nō ia.