KA BUKE NO RUTA 3 - Ka Baibala Hemolele

1 Ka moe ʻana o Ruta ma nā wāwae o Boaza.

MOKUNA III.

¹ ¶ A laila, ʻōlelo mai ʻo Naomi kona makuahōnōai wahine, “E kuʻu kaikamahine, ʻaʻole anei au e ʻimi i wahi e hoʻomaha ai nou, i mea e pōmaikaʻi ai ʻoe?

² “ʻAʻole anei no ko kākou hoahānau ʻo Boaza, nona nā kaikamāhine āu i noho pū ai? Aia hoʻi ke kānana nei ia i ka hua bale i kēia pō ma ke kahua hahi.

³ “No laila ʻeā, e holoi ʻoe iā ʻoe iho, a e hamo hoʻi, a e hoʻokomo i kou lole, a e iho ʻoe i lalo i ke kahua; a mai hōʻike aku ʻoe iā ʻoe iho i ua kanaka lā, a pau kāna ʻai ʻana, a me kāna inu ʻana.

⁴ “Eia hoʻi kekahi; i ka manawa āna e moe ai, e nānā pono ʻoe i kona wahi e moe ana, a e komo aku ʻoe, a e wehe i kona mau kapuaʻi, a moe iho, a nāna nō e haʻi mai iā ʻoe i ka mea āu e hana ai.”

⁵ ʻĪ akula kēia iā ia, “ʻO nā mea a pau āu e kauoha mai nei, e hana nō au.”

⁶ ¶ Iho akula ʻo ia i lalo i ke kahua, a hana ihola e like me nā mea a pau a kona makuahōnōai wahine i kauoha mai ai iā ia.

⁷ A ʻai ʻo Boaza, a inu, a ʻoliʻoli kona naʻau, a laila, hele akula ia e moe ma ka wēlau a ka puʻu ʻai; a hele mālie maila ia, a wehe ihola i kona mau kapuaʻi, a moe ihola.

⁸ A hiki i ke aumoe, makaʻu ihola ua kanaka lā; no ka mea, i kona ʻoni ʻana, aia hoʻi he wahine, e moe ana ma kona mau kapuaʻi.

⁹ ʻĪ maila ia, “ʻO wai ʻoe?” ʻĪ maila kēlā, “ʻO Ruta wau, ʻo kāu kauā wahine; no laila ʻeā, e hāliʻi mai i kou kapa ma luna o kāu kauā wahine; no ka mea, ʻo ʻoe nō kekahi mea i pili koko.”

¹⁰ ʻĪ maila ia, “E pōmaikaʻi ana ʻoe iā Iēhova, e kuʻu kaikamahine ē; no ka mea, ua ʻoi aku kou lokomaikaʻi hope, i ko ka mua, i kou hahai ʻole ʻana ma hope o nā kānaka uʻi, ʻaʻole i ka mea hune, ʻaʻole hoʻi i ka mea waiwai.

¹¹ “No laila ʻeā, mai makaʻu ʻoe, e kuʻu kaikamahine. ʻO nā mea a pau āu e ʻōlelo maila, naʻu ia e hana aku iā ʻoe; no ka mea, ua ʻike koʻu poʻe kānaka a pau, he kaikamahine pono ʻoe.

¹² “He ʻoiaʻiʻo nō, ʻo wau ka hoahānau pili iā ʻoe. Eia aʻe kekahi mea i pili mua aku, he hope au.

¹³ “I kēia pō e kakali ai a kakahiaka, a laila, inā nāna ʻoe e mare, ua pono, e mare nō ia; akā, inā ʻaʻole ia e makemake e mare mai iā ʻoe, ma ke ola ʻana o Iēhova, naʻu ʻoe e mare. E moe ʻoe a kakahiaka.”

¹⁴ ¶ Moe ihola ʻo ia ma kona mau kapuaʻi a kakahiaka. A ala maila ia ma mua o ka wā e hiki ai kekahi ke hoʻomaopopo i kona hoa. ʻĪ aʻela ia, “Mai haʻi aku i ka hele ʻana mai o ka wahine i ke kahua hahi.”

¹⁵ ʻĪ hou akula ia, “Hō mai ka pale ma luna ou, a e paʻa mai ia mea.” A i kona paʻa ʻana mai, ana ihola ia i ʻeono ana hua bale, a kau akula ma luna ona; a hoʻi akula ia i ke kūlanakauhale.

¹⁶ A hiki akula ia i kona makuahōnōai wahine, nīnau maila kēlā, “ʻO wai ʻoe, e kuʻu kaikamahine?” A haʻi akula kēia i nā mea a pau a ua kanaka lā i hana mai ai nāna.

¹⁷ ʻĪ akula, “ʻO kēia mau ana hua bale ʻeono kāna i hāʻawi mai ai iaʻu; no ka mea, ʻōlelo maila ia, ‘Mai hoʻi nele aku ʻoe i kou makuahōnōai wahine.’”

¹⁸ ʻŌlelo maila ia, “E noho mālie ʻoe, e kuʻu kaikamahine, a ʻike pono ʻoe i ka hope o kēia; no ka mea, ʻaʻole loa a noho hoʻomaha kēlā kanaka, a hoʻopau pono ʻo ia ia mea, i kēia lā.”