KA BUKE NO RUTA 2 - Ka Baibala Hemolele

1 Ka hōʻiliʻili ʻana o Ruta ma ka mahina ʻai o Boaza.

MOKUNA II.

¹ ¶ He hoahānau ko Naomi, no kāna kāne, he kanaka waiwai nui, no ka hanauna o ʻElimeleka, ʻo Boaza kona inoa.

² ʻĪ aʻela ʻo Ruta ka Moaba iā Naomi, “E hele au i ka mahina ʻai ʻeā, a hōʻiliʻili ma waena o nā ʻōpuʻu palaoa, ma muli o ka mea e aloha mai iaʻu.” ʻĪ maila ia, “Ō hele, e kuʻu kaikamahine.”

³ Hele akula ia a hiki, a hōʻiliʻili ihola ma ka mahina ʻai, ma muli o ka poʻe ʻokiʻoki. A loaʻa kāna puʻu ma kahi kīhāpai no Boaza, no ka hanauna ia o ʻElimeleka.

⁴ Aia hoʻi, hele maila ʻo Boaza, mai Betelehema mai, ʻī maila i ka poʻe ʻokiʻoki, “ʻO Iēhova pū kekahi me ʻoukou!” ʻĪ akula lākou iā ia, “Na Iēhova nō e hoʻopōmaikaʻi mai iā ʻoe!”

⁵ A laila, ʻī maila ʻo Boaza i kāna kauā i hoʻonoho ʻia ma luna o ka poʻe ʻokiʻoki, “Na wai kēia kaikamahine?”

⁶ ʻŌlelo akula ke kauā i hoʻonoho ʻia ma luna o ka poʻe ʻokiʻoki, ʻī akula, “Ke kaikamahine ia no Moaba, ʻo ka mea i hoʻi pū mai me Naomi, mai ka ʻāina ʻo Moaba mai.

⁷ “Nonoi mai ia, ‘ʻEā, e hōʻiliʻili paha au, a hoʻāhu ma hope o ka poʻe ʻokiʻoki, i waena o nā pūʻā.’ A laila, hele maila ʻo ia, a ua hoʻomau, mai ke kakahiaka a i kēia wā, hoʻomaha iki nō naʻe ma ka hale.”

⁸ ¶ A laila, ʻī aʻela ʻo Boaza iā Ruta, “E kuʻu kaikamahine, ʻaʻole anei ʻoe i lohe? Mai hele ʻoe e hōʻiliʻili i ka mahina ʻai ʻē aʻe, mai haʻalele ʻoe i kēia wahi. E hoʻopili ʻoe me koʻu poʻe kaikamāhine ma ʻaneʻi.

⁹ “E kau kou mau maka ma ke kīhāpai a lākou e ʻokiʻoki ai, a e hahai ʻoe ma muli o lākou. ʻAʻole anei au i kauoha aku i nā kānaka uʻi, i hoʻopā ʻole mai lākou iā ʻoe? A make wai ʻoe ʻeā, e hele ʻoe a inu i ka mea a nā kanaka uʻi i ukuhi ai.”

¹⁰ A laila, hāʻule ʻē ihola kona maka i lalo, a kūlou ʻo ia i lalo i ka honua, ʻī maila iā ia, “No ke aha lā i loaʻa mai ai iaʻu ka lokomaikaʻi ʻia mai i mua o kou mau maka, i ʻike mai ai ʻoe iaʻu; no ka mea, he malihini au?”

¹¹ ʻŌlelo akula ʻo Boaza, ʻī akula, “Ua hoʻākāka pono ʻia mai iaʻu nā mea a pau āu i hana aku ai i kou makuahōnōai wahine, ma hope mai o ka make ʻana o kāu kāne; a ua haʻalele ʻoe i kou makua kāne, a me kou makuahine, a me kahi āu i hānau ai, a ua hele mai hoʻi i ka poʻe kānaka āu i ʻike ʻole ai ma mua.

¹² “Na Iēhova nō e uku mai i kāu hana, a e hāʻawi ʻia mai nō hoʻi iā ʻoe ka uku nui loa e Iēhova, ke Akua o kā ʻIseraʻela. Ua hele mai hoʻi ʻoe e hilinaʻi ma ka malu o kona mau ʻēheu.”

¹³ ʻĪ maila ia, “E loaʻa paha iaʻu ka lokomaikaʻi ʻia mai i nā maka o koʻu haku; no ka mea, ua hoʻomaha mai ʻoe iaʻu, a ua ʻōlelo mai hoʻi i ka naʻau o kāu kauā wahine nei, ʻaʻole naʻe au i like me kāu poʻe kauā wahine.”

¹⁴ ¶ ʻĪ akula ʻo Boaza iā ia, “I ka manawa e ʻai ai, e hele mai ʻoe e ʻai i ka berena, e hōʻū iho i kou hakina ma loko o ka vīnega.” Noho ihola ia ma ka ʻaoʻao o ka poʻe ʻokiʻoki; hāʻawi aʻela ʻo ia iā ia i ʻai i pūlehu ʻia, a ʻai ihola ia a māʻona, a koe nō.

¹⁵ A kū maila ia e hōʻiliʻili, a laila kauoha mai ʻo Boaza i kona poʻe kānaka uʻi, ʻī maila, “E hōʻiliʻili ʻo ia ma waena o nā pūʻā, mai hoʻohilahila iā ia.

¹⁶ “E unuhi hoʻi i kekahi, ma loko mai o nā pūʻā, a e waiho aku nāna, i hōʻiliʻili ai ʻo ia; mai pāpā aku iā ia.”

¹⁷ ¶ Hōʻiliʻili ihola ʻo ia ma ka mahina ʻai, a ahiahi, a kākā akula i ka mea āna i hōʻiliʻili ai, hoʻokahi paha ʻepa hua bale.

¹⁸ A lawe ihola ia, a hele akula i ke kūlanakauhale, a ʻike maila kona makuahōnōai wahine i ka mea āna i hōʻiliʻili ai; a lawe maila ia a hāʻawi mai iā ia i ke koena āna i mālama ai ma hope o kona māʻona ʻana.

¹⁹ Nīnau maila kona makuahōnōwai wahine iā ia, “Ma hea lā ʻoe i hōʻiliʻili ai i kēia lā, a ma hea ʻoe i hana ai? E hoʻopōmaikaʻi ʻia ka mea i ʻike mai iā ʻoe.” Hōʻike akula ʻo ia i kona makuahōnōai wahine i ka mea āna i hana pū ai, ʻī akula, “ʻO Boaza ka inoa o ka mea aʻu i hana pū ai i kēia lā.”

²⁰ ʻĪ maila ʻo Naomi i kāna hūnōna wahine, “E pōmaikaʻi ana iā Iēhova ka mea nāna i hoʻōki ʻole i kāna hana lokomaikaʻi ʻana i ka mea i ola, a me ka mea i make!” ʻĪ maila ʻo Naomi iā ia, “He hoahānau ia e pili koke ana iā kāua, ʻo ia hoʻi ko kāua mea i pili koko.”

²¹ ʻĪ akula ʻo Ruta ka Moaba, “Ua ʻōlelo mai nō hoʻi ʻo ia iaʻu, ‘E hoʻopili ʻoe me koʻu poʻe kānaka, a hoʻopau wale lākou i koʻu hōʻiliʻili ʻana.’”

²² ʻĪ mai ʻo Naomi iā Ruta, i kāna hūnōna wahine, “E kuʻu kaikamahine, he mea maikaʻi ke hele pū ʻoe me kona mau kaikamāhine, i loaʻa ʻole ʻoe iā lākou ma ka mahina ʻai ʻē aʻe.”

²³ No laila, pili paʻa loa ʻo ia me nā kaikamāhine o Boaza, a pau wale ka hōʻiliʻili ʻana i ka hua bale a me ka hōʻiliʻili ʻana i ka huapalaoa; a noho pū nō me kona makuahōnōai wahine.