KA BUKE NO IOBA 9 - Ka Baibala Hemolele

1 Aʻo aku ʻo Ioba me ka hoʻonani i ka pono, i ka noʻiau, i ka mana a me nā hua kupanaha o ke Akua. 14 ʻAʻole ia i hoʻāpono iā ia iho. 22 ʻAʻole i akāka ko ke kanaka pono ma nā mea ʻino i hiki mai ma luna ona i kēia ao. 25 Hōʻike mai nō ia i kona ʻehaʻeha; akā ʻaʻole ia i hakakā pū me ka mea nāna i kau mai ia mea.

MOKUNA IX.

¹ ¶ A laila ʻōlelo maila ʻo Ioba, ʻī maila,

² “Ua ʻike nō au, he ʻoiaʻiʻo nō; A, pehea lā e hoʻāpono ʻia ai ke kanaka i mua o ke Akua?

³ “Inā makemake ʻo ia e hoʻopaʻapaʻa me ia, ʻAʻole e hiki ke hoʻāpono i mua ona i kekahi hapa tausani.

⁴ “He akamai ia ma ka naʻau, a ua nui ka ikaika; ʻO wai lā ka mea hoʻopaʻakikī kūʻē iā ia, a ua pōmaikaʻi?

⁵ “ʻO ia ka mea hoʻoneʻe aku i nā mauna, ʻaʻole lākou i ʻike; Ka mea hoʻohiolo iā lākou ma kona inaina;

⁶ “Ka mea hoʻonaue i ka honua mai kona wahi aku, A haʻalulu kona mau kūkulu;

⁷ “Ka mea ʻōlelo aku i ka lā, ʻaʻole ia i puka mai, A hoʻopaʻa aku hoʻi ia i nā hōkū;

⁸ “ʻO ka mea wale nō nāna i hohola nā lani, A hele hoʻi ma luna o nā ʻale kiʻekiʻe o ke kai;

⁹ “ʻO ka mea nāna i hana ʻo ʻUresa nui, me ʻOriona, A me Peleiade, a me ke kūkulu hema loa aku;

¹⁰ “ʻO ka mea i hana i nā mea nui hiki ʻole ke huli ʻia; A me nā mea kupanaha hiki ʻole ke helu ʻia.

¹¹ “Aia hoʻi, māʻalo aʻe ia ma oʻu nei, ʻaʻole au i ʻike; Hele mai hoʻi ʻo ia; akā, ʻaʻole au i hoʻomaopopo iā ia.

¹² “Aia hoʻi, lawe wale aku nō ia, ʻo wai lā ke pale aku iā ia? ʻO wai lā ka mea e ʻōlelo aku iā ia, ‘He aha kāu e hana nei?’

¹³ ¶ “I hoʻopau ʻole aʻe ke Akua i kona inaina, Kūlou iho nā kōkua haʻaheo ma lalo ona.

¹⁴ “Pehea lā hoʻi wau e ʻōlelo aku ai iā ia, A e wae aʻe i nā hua ʻōlelo i mua ona?

¹⁵ “Inā he pono koʻu, ʻaʻole au e ʻōlelo aku iā ia, E nonoi aku nō wau i kuʻu luna kānāwai.

¹⁶ “Inā ua kāhea aku au, a ua lohe mai kēlā; ʻAʻole au e hōʻoiaʻiʻo, ua hoʻolohe mai ia i koʻu leo.

¹⁷ “ʻO ka mea e ʻulupā mai iaʻu me ka ʻino, A hoʻonui wale mai ia i koʻu mau palapū.

¹⁸ “ʻAʻole ia e ʻae mai iaʻu e hanu i kuʻu hanu, Akā, hoʻopiha mai nō ia iaʻu i nā mea ʻawaʻawa.

¹⁹ “Inā e ʻōlelo iho au no ka ikaika, aia hoʻi, ʻo ia ka ikaika; A inā no ka hoʻoponopono ʻana, ʻO wai lā ke haʻi mai i ka manawa?

²⁰ “Inā ʻo wau e hoʻāpono iaʻu iho, hoʻohewa mai kuʻu waha iaʻu; Inā ʻōlelo iho au, ‘Ua hala ʻole, inā ua hoʻokahuli mai ia iaʻu.’

²¹ “Inā ua hala ʻole au, ʻaʻole hoʻi au e ʻike i kuʻu ʻuhane; E hoʻowahāwahā nō au i kuʻu ola.

²² “Ua hoʻokahi nō ia; no laila, e ʻōlelo aku au, ‘Ke luku nei nō ia i ka mea hala ʻole a me ka mea hewa.’

²³ “Inā e pepehi koke mai ka mea uhau, E ʻakaʻaka mai nō ia i ka ʻeha ʻana o ka poʻe hala ʻole.

²⁴ “Ua hāʻawi ʻia aku ka honua i loko o ka lima o ka poʻe hewa; Ua uhi mai ia i nā maka o kona mau luna kānāwai; A i ʻole ia, ʻauhea lā, ʻo wai lā hoʻi ʻo ia?

²⁵ ¶ “Ua ʻoi ka māmā o kuʻu mau lā ma mua o ka mea holo; Ke holo aʻe nei lākou, Ke ʻike ʻole nei lākou i ka maikaʻi.

²⁶ “Ua hala akula lākou e like me nā moku holo; E like me ka ʻaeto e lele ana i ka mea ʻai.

²⁷ “Inā ʻōlelo iho au, e hoʻopoina nō wau i kuʻu kanikau ʻana, E waiho aku au i kuʻu maka kaumaha, a e hōʻoluʻolu iaʻu iho;

²⁸ “Makaʻu ihola au i kuʻu mea ʻehaʻeha a pau, Ua ʻike au, ʻaʻole ʻoe e hoʻāpono mai iaʻu, he hala ʻole.

²⁹ “Inā ua hewa au, No ke aha lā hoʻi wau e luhi makehewa nei?

³⁰ “Inā e holoi au iaʻu iho i ka wai hau, A e hoʻomaʻemaʻe au i kuʻu mau lima i ka sopa;

³¹ “A laila, e kiola iho ʻoe iaʻu i loko o ka lua lepo, A e hoʻopailua koʻu mau kapa iaʻu.

³² “No ka mea, ʻaʻole ia he kanaka e like me aʻu, e paio aku ai au iā ia, A hālāwai māua i ka hoʻokolokolo ʻana.

³³ “ʻAʻole hoʻi he mea nāna e ʻuao i waena o māua, I kau mai ai ia i kona lima ma luna o māua ʻelua.

³⁴ “E lawe aku ia i kona koʻokoʻo mai oʻu aku nei, A mai hoʻoweliweli mai kona makaʻu iaʻu.

³⁵ “A laila e ʻōlelo aku au, ʻaʻole hoʻi wau e makaʻu iā ia, Akā, ʻaʻole pēlā wau iaʻu iho.