KA BUKE NO IOBA 8 - Ka Baibala Hemolele

1 Hoʻāhewa ʻo Biledada iā Ioba no ke kūʻē o kona manaʻo i ka pono o ke Akua. 4 I kona manaʻo, ua make paha kā Ioba mau keiki no ko lākou hewa, a aʻo mai nō iā ia e ʻimi i ke Akua. 8 Kuhikuhi akula ia i kā ka poʻe kahiko, i akāka ai ka make o ka poʻe hoʻokamani. 20 Hoʻopili aku kēia manaʻo iā Ioba.

MOKUNA VIII.

¹ ¶ A laila ʻōlelo maila ʻo Biledada, no Suha, ʻī maila,

² “Pehea lā ka lōʻihi o kāu ʻōlelo ʻana i kēia mau mea? A he makani ikaika nā hua ʻōlelo o kou waha?

³ “E hoʻokahuli anei ke Akua i ka pololei? A e hoʻokekeʻe anei ka Mea Mana i ka pono?

⁴ “Inā paha ua hana hewa kāu poʻe keiki iā ia, A laila kiola akula ia iā lākou, no ko lākou lawehala ʻana.

⁵ “Inā e ʻimi ʻoe i ke Akua, A e nonoi aku ʻoe i ka Mea Mana;

⁶ “Inā ua maʻemaʻe ʻoe a pono hoʻi; He ʻoiaʻiʻo nō, inā ua ala mai nō ia ʻānō nou, A ua hoʻomalu mai ia i ka hale o kou pono ʻana.

⁷ “Inā ua ʻuʻuku kou hoʻomaka ʻana i kinohou, ʻO kou hopena, e māhuahua loa ana nō ia.

⁸ ¶ “No ka mea, ke noi aku nei au iā ʻoe, e nīnau aku ʻoe i ka hanauna ma mua, A e hoʻomākaukau ʻoe e noʻonoʻo i ko lākou poʻe mākua;

⁹ (“No ka mea, i nehinei wale nō kākou, ʻaʻohe ʻike, A ʻo ko kākou mau lā ma ka honua, he aka nō ia).

¹⁰ “ʻAʻole anei lākou e aʻo mai iā ʻoe, a e haʻi mai iā ʻoe, A e hōʻike mai i nā ʻōlelo mai loko mai o ko lākou naʻau?

¹¹ ¶ “E ulu anei ke papuro ke ʻole ka lepo pohō? E ulu anei ka ʻakaʻakai ke ʻole ka wai?

¹² “I kona manawa uliuli, ʻaʻole i ʻoki ʻia, Ua mae nō ia ma mua o nā mauʻu ʻē aʻe a pau.

¹³ “Pēlā nō ka hope o ka poʻe a pau e hoʻopoina ana i ke Akua; A pēlā nō ka manaʻolana o ka ʻaiā e make ai.

¹⁴ “ʻO kona manaʻolana e ʻoki ʻia aku ia, A ʻo kona mea hilinaʻi, he pūnāwelewele nō ia.

¹⁵ “E hilinaʻi iho ʻo ia ma luna o kona hale; akā, ʻaʻole ia e paʻa. E hoʻopaʻa aku ʻo ia ia mea, ʻaʻole naʻe ia e kūpono.

¹⁶ “Ua uliuli ʻo ia i mua o ka lā, A kupu aʻe kona mau lālā ma kona kīhāpai.

¹⁷ “Ua ʻāwili ʻia kona mau aʻa ma ka waikahe, A ʻike ihola ia i kahi o nā pōhaku.

¹⁸ “Akā, e hoʻopau ʻia aku ia mea mai kona wahi aku, A laila e hōʻole mai ʻo ia iā ia, ‘ʻAʻole au i ʻike iā ʻoe.’

¹⁹ “Aia hoʻi, ʻo ia ka ʻoliʻoli o kona ʻaoʻao, A mai loko mai o ka lepo e kupu aʻe nā mea ʻē.

²⁰ “Aia hoʻi, ʻaʻole ke Akua e hoʻowahāwahā i ka mea pono, ʻAʻole hoʻi ia e kōkua aku i ka poʻe hana hewa.

²¹ “A hoʻopiha mai ia i kou waha i ka ʻakaʻaka, A i kou lehelehe i ka hoʻōho ʻoliʻoli.

²² “ʻO ka poʻe inaina iā ʻoe e hōʻaʻahu ʻia lākou i ka hilahila; A e lilo ka hale o ka poʻe hewa i mea ʻole.