Biblia Todo Logo
Bìoball air-loidhne

- Sanasan -

KA BUKE NO IOBA 7 - Ka Baibala Hemolele


1 Hoʻākāka aku ʻo Ioba i ke ʻano o kona manaʻo e make ma ka pono ʻole. Ma ka ʻeha a ma ka haumia o kona ola ʻana. 7 ʻO kāna pule.


MOKUNA VII.

1 ¶ “ʻAʻole anei he kaua no ke kanaka ma ka honua? A like kona mau lā me nā lā o ka mea hoʻolimalima?

2 “E like me ke kauā i makemake nui i ka malu, A me ka hoʻolimalima i nānā i ka uku o kāna hana;

3 “Pēlā nō e lilo mai ai iaʻu nā malama luʻuluʻu, A e loaʻa iaʻu nā pō kaumaha.

4 “A i ka wā i moe ai au i lalo, ʻī iho nō au, ‘Āhea lā au e ala aʻe i luna? Āhea lā e hala aʻe ka pō?’ Ua piha au i ka hiaʻā ʻana a hiki i ka wanaʻao.

5 “Ua paʻapū koʻu kino i ka ilo a me ka pāpaʻa lepo; Ke ola mai nei kuʻu ʻili, a laila pūhā hou aʻela.

6 “Ua ʻoi ka māmā o kuʻu mau lā ma mua o ka lāʻau ulana lole, A holo aku me ke manaʻolana ʻole.

7 ¶ “E hoʻomanaʻo ʻoe, he makani kuʻu ola! ʻAʻole e ʻike hou koʻu maka i ka maikaʻi.

8 “ʻO ka maka o ka mea i ʻike iaʻu, ʻaʻole ia e ʻike hou iaʻu; Ma luna oʻu kou mau maka, a e ʻole auaneʻi au.

9 “E like me ke ao e nalowale ana a e hele aku ana; Pēlā ka mea e iho ana i ka lua kupapaʻu, ʻaʻole ia e ea hou aʻe i luna.

10 “ʻAʻole ia e hoʻi hou i kona hale, ʻAʻole hoʻi e ʻike hou kona wahi iā ia.

11 ¶ “No laila ʻaʻole au e hoʻopaʻa i kuʻu waha; E ʻōlelo aku au ma ka pilikia o kuʻu ʻuhane; E ʻulono ana au no ka ʻawaʻawa o kuʻu naʻau.

12 “He kai anei au, a he iʻa nui, I hoʻonoho mai ai ʻoe i ke kiaʻi ma luna oʻu?

13 “A ʻī iho au, ‘E hōʻoluʻolu kuʻu wahi moe iaʻu, E lawe aku kuʻu moe i koʻu ʻulono ʻana’;

14 “A laila hoʻomakaʻu mai ʻoe iaʻu ma nā moeʻuhane, A hoʻoweliweli mai ʻoe iaʻu i nā mea hihiʻo.

15 “No laila ke koho nei kuʻu naʻau i ke kāʻawe, A me ka make ma mua o kuʻu ola ʻana.

16 “Ke hoʻopailua nei au ia mea; ʻaʻole au makemake e ola loa; E waiho mai iaʻu; no ka mea, he hanu wale nō kuʻu mau lā.

17 “He aha lā ke kanaka, i hoʻonui mai ai ʻoe iā ia? A i kau mai ai ʻoe i kou manaʻo iā ia?

18 “A i ʻike mai ai ʻoe iā ia i kēlā kakahiaka kēia kakahiaka, A i hoʻāʻo mau mai ai ʻoe iā ia?

19 “Pehea ka lōʻihi o kou nānā ʻole ʻana mai i oʻu aku nei, A kuʻu ʻole mai iaʻu, a moni iho au i kuʻu kuha?

20 “Ua hana hewa au; he aha kaʻu e hana aku ai iā ʻoe, E ka Mea kiaʻi i nā kānaka? No ke aha lā ʻoe e hoʻokū aʻe iaʻu, i mea e hopu ai nou, I lilo ai hoʻi au i mea kaumaha noʻu iho?

21 “No ke aha lā ʻoe i kala ʻole mai ai i kuʻu hala, A i lawe aku hoʻi i koʻu hewa? No ka mea, ʻānō e moe auaneʻi au i ka lepo; A e ʻimi mai ʻoe iaʻu, ʻaʻole hoʻi wau.”

Ka Baibala Hemolele © Partners Development Foundation, 2018.

Partners in Development Foundation
Lean sinn:



Sanasan